Egaununo 22

Jesus ta zigida varongwa vane

KONYIMA zokuhara kumudipaga Jesus mositata sawo saNasareta, makura ta zi mositata saKaperenaumu pepi nEkurudiva lyaGalireya. Eyi kwa sikisire mo uporofete umwe hena waJesaya, ou wa tanta asi vantu womoGalireya ava va tunga kekurudiva ngava mona uzera wounene.

Moyirugana yendi yokuzuvhisa Uhompa kEkurudiva lyaGalireya, yiko ga ka gwene varongwa vendi vane. Awo vaava va gendere nendi pomuhowo, nye apa va ka tundire koJudeya awo tava tengwire koyirugana yawo yokukwata nomfi. Jesus kwa va paparere hena, morwa siruwo sa sikire mo sokukara novavateli wokukarerera ava nga vhura kudeura mokutwikira kuzuvhisa konyima zonomfa dendi.

Jesus haga za mokugenda konontere dekurudiva, ta mono Simoni Peturusa novakwawo kuna kukuhwa makwe gawo, makura ta zi kwawo. Jesus makura ta perama mowato waPeturusa ntani ta mu ninki asi a sure a u gorese ko konontere. Apa va ligorere ko nakauke, makura Jesus ta hingire mowato a tameke kuronga mbunga ezi za kere konontere.

Apa ga mene kuuyunga, makura ta tantere Peturusa asi: “Dugira petondo, makura mu ka tege makwe geni, mu kwate.”

Peturusa makura ta mu limburura asi: “Murongi, ose kuna rugana masiku mudima, nye nayimwe si tuna kwata. Nye konkango zoge nani li tegera ekwe.”

Apa va tegere ekwe, kwa kwete nomfi dononzi, ekwe kuna kuhara kutomoka. Makura tava rapa vakwaawo, ava va kere mowato umwe, va ya va kwafe. Naruvali si mawato nagenye taga zura, kuna kuhara kudama. Peturusa eyi ga yi mwene, ta ligandere konongoro daJesus, ta tanta asi: “Tunda po pwange, Hompa, morwa ame mugara gomunanzo.”

Jesus ta limburura asi: “Neisi nagu ku pwagera; kutunda apa, ove ngo kwata nye vantu.”

Makura Jesus ta zigida hena mumbyaPeturusa, Andiliyasa. Age ta va tantere asi: “Kwameni nge, ni ka mu ninke mu kare vakwati wovantu.” Vakwati wonomfi vakwawo oJakopo naJohanesa vana vaSebede, nawo kwa va zigidire, ntani awo kwa tambwire ezigido va hana kulikata-kata. Navenye moune wawo kwa zumbire yirugana yawo yokukwata nomfi, makura tava ya kara vasikuli vaJesus wokuhova wokukarerera. Rukasa 5:1-11; Mateusa 4:13-22; Marukusa 1:16-20; Jesaya 9:1, 2.

▪ Morwasinke ga zigidilire Jesus varongwa vendi mokumukwama, ntani yiwo wolye?

▪ Sitetu musinke sa tjilisire Peturusa?

▪ Ekwato musinke ga va zigidilire Jesus varongwa vendi va rugane?