Egaununo 49

Rugendo rumwe hena rokuzuvhisa moGalireya

KONYIMA zonomvhura mbali dezuvhiso lyenene, Jesus ga hagekere nokupwizumuka ko ndi? Hawe, ga nenepekere sirugana sendi sezuvhiso pokutameka norugendo rwautatu koGalireya. Ta gendagura moyitata nayinye nomonomukunda nadinye, oku ta rongo monosinagoge ntani nokuzuvhisa mbudi zongwa zoUhompa. Eyi ga mwene morungedo oru ya mu nongwenesere asi mulyo unene kulitura mo mokuzuvhisa kupitakana pwanare.

Nkenye oku nga zi Jesus, nga mono mbunga zovantu zina hepa ehengagwido neveruro lyopampepo. Awo va hepere ntani va lifene nononzwi dokuzumbana da hana musita makura ta va fire nkenda. Ta tantere varongwa vendi asi: “Muzangu gwene munzi, nye varugani vasesu. Yipo nye nomu hundilira mwenyamuzangu, asi a tume komuzangu gwendi varugani.”

Jesus kwa kere nosirugana megano. Makura ta zigida vapositoli vendi 12, ava ga horowere ure womvhura zimwe. Ta va tura vavali-vavali ntani nokuvapa mavyukiso. Ta va fatwilire asi: “Mwa ha ka za kovapagani ndi mu ka hwilire moyitata yoVasamaliya. Yoyiwa po yokuza kononzwi edi da zumbana domomuhoko gwaIsraeli. Zendeni mu ka udise asi, ‘Untungi waKarunga pepi una kara.’”

Uhompa ou va ka zuvhisire kuna kara ou ga va rongere Jesus mekanderero lyosihonena va u kanderere. Uhompa kwa hederere pepi morwa Hompa ogu ga tura po Karunga, Jesus Kristusa, yipo ga kere. Mokutulisa po umbangi asi varongwa vendi awo yiwo vakarelipo wouhompa wina wononkondo, Jesus kwa va pere nonkondo dokukaverura vaveli ntani nokupindura vafe. Age ga va pangerere mokurugana yirugana eyi mawoko-woko.

Makura Jesus ta tantere varongwa vendi mokudira kuliwapaikira yininke yopanyama morugendo rwawo rwezuvhiso. “Mwa ha lisimbira yimaliva yongorodo ndi yosisiliveli nankenye tupu yimaliva monongama deni, nondjato si zeezi zomorugendo ndi yikoverero yivali, ndi nonkaku ndi mpango, yeeyi murugani kuparukira moyirugana yendi.” Owo va tambwire mbudi ngano va geve nondya nomararo. Ngamoomu ga uyungire Jesus asi: “Mwankenye sitata ndi mukunda ogu ngomu za, pulideni mo muntu gomuwa, mu kare nendi dogoro noku ngomu ka tunda mo.”

Jesus makura ta gava mapukururo omu va vhulire kukahedera mwenya embo nombudi zoUhompa. Ta va pangere asi: “Muna kuza ponzugo, tanko tomu gava mbili. Nsenesi nzugo ozo ngwa, mpora zeni tazi zi wizire. Ano nsenesi kapi za kara yoyiwa, mpora zeni tazi mu tengwire nyamweni. Oku nava ka nyoka kumutambura, va dire kupurakena kononkango deni, tomu ka tunda po ponzugo ozo ndi mositata oso, oku tomu likukumuna mbundu ezi zina mu kara konompadi deni.”

Yitata eyi ya nyokere mbudi zawo, Jesus ga likidire asi mpanguro zawo ngazi kara zonene. Ta faturura asi: “Yosili nina kumutantera asi, yosirongo saSodoma naGomora ngayi kara hasa mEzuva lyoMpanguro, nye yositata oso ngayi rura!” Mateusa 9:35–10:15; Marukusa 6:6-12; Rukasa 9:1-5.

▪ Siruwoke ga tamekere Jesus norugendo rwautatu rwezuvhiso moGalireya, ntani yinke ya mu tumangedere?

▪ Apa ga tumine vapositoli 12 mokukazuvhisa, mapukururo musinke ga va pere?

▪ Morwasinke ya karerere mouhunga kovarongwa mokuronga asi Uhompa pepi wa kere?