Egaununo 54

“Mborotozuni zemeguru”

JESUS kwa kutikire mayovi pasitetu makura ta henduka apa va mu sininikire vantu asi va mu tumbe a kare hompa. Masiku ogo age kwa gendere pomema pEkurudiva lyaGalireya; kwa poperere Peturusa, ogu ga here kudama apa ga gendere pomema mepepo; ntani kwa mwenekedere mamunkumpi mokupopera varongwa vendi. Alyo sili kwa kere ezuva lyoyiviyauka.

Ezuva lyokukwama ko, vantu ava ga kutikire pasitetu korwaMuzogo-pumezuva lyEkurudiva lyaGalireya tava ya gwana Jesus pepi naKaperenaumu makura tava mu pura asi: “Siruwoke ono wiza ko oku?”Jesus ta va nyokere nokutanta asi awo kwa mu paparerere tupu morwa kwa ndindilire asi nava gwana ko hena nondya domawoko-woko. Age kwa va korangedere asi walye ava ruganene nondya edi adi haga, nye ava ruganene nondya edi adi karerere dogoro komwenyo gwanarunye. Vantu makura tava mu pura asi: “Eyi natu rugana yinke, asi tu rugane yirugana yaKarunga?”

Jesus kwa tumbwire sirugana somulyo unene. Age ta faturura asi: “Sirugana esi ga hara Karunga asi mu si rugane yiso esi asi, omu pure ogu ga tuma Karunga.”

Nye nampili ngomu ga rugene Jesus yitetu yoyinzi, vantu kapi va likidire epuro mwendi. Kutetukisa, nampili konyima zokurugana yininke nayinye yoyitetu, awo tava mu pura asi: “Sitetu musinke no rugana, tu vhure kusimona, nkumwe tu ku pure? Yisinke eyi no rugana? Ozinyakurwetu ngava li mana momburundu, moomu va tjanga asi, ‘Age nga va pe mboroto zemeguru, va lye.’”

Mokulimburura epuro lyawo lyokuhamena sitetu, Jesus kwa zeresere nawa-nawa ntundiliro zomakutiko gopasitetu pokuuyunga asi: “Eyi nga mu pe Mosesa, kapisi mboroto zemeguru, nye Tate yige a mu pe mborotozuni zemeguru. Yeeyi mboroto zaKarunga googu ga tunda meguru, a ya pe uzuni mwenyo.”

Vantu tava mu tantere asi: “Tate, omu tu paape mboroto ozo.”

Jesus ta va fatwilire asi: “Ame nyame mboroto zomwenyo. Ogu gokuwiza kwange, narumwe si hena kufa nzara, ano ogu gokupura nge nokufa si hena enota. Nye na mu tantera asi, kumona mwa mona nge, nye one nokupura si. Navenye ava a pe nge Tate, kuwiza kwange. Ano gokuwiza kwange ame nokumutjida si. Yeeyi ame kapi na tundire meguru asi, ni ya rugane eharo lyanyamwange, nye asi ni ya rugane eharo lyogu ga tuma nge. Ano eharo lyogu ga tuma nge yilyo eli asi, navenye ava ga pa nge, nokuzumba po si nampili gumwe, nye asi ngani va pindure mezuva lyokuhulilira. Eharo lyaTate yilyo eli asi, nkenye ogu gokumona Muna, nye a mu pure, yige nga kara momwenyo gwanarunye.”

Kweyi ga uyungire Jesus makura Vajuda tava tameke kumuvhungutira, morwa ga tente asi: “Nyame mboroto ezi za tunda meguru.” Awo kwawo kwa monekere asi age munwa govantu tupu wopanyama ngwendi moomu va mu tere vantu womoNasareta, awo kwa patanesere pokuuyunga asi: “Ogu nani kapisi yige Jesus, munwaJosefa, guhwe nazina vaava twa diva? Ngapi nye na tanta asi, ame meguru na tunda?”

Jesus ta limburura asi: “Mwa ha vhunguta mokatji keni. Nagumwe si a vhuru kuwiza kwange, ntudi Tate ogu ga tuma nge yige a mu koke, ano ame ngani mu pindura mezuva lyokuhulilira. Vaporofete kwa tjanga asi, ‘Navenye Karunga nga va ronga.’ Nkenye ogu ga yi zuvha yiyo ga yi lironga koTate, yige gokuwiza kwange. Kapisi asi kweli ogu ga mona Tate, ntudi googu ga tunda kwaKarunga, yige ga mona Tate. Yosili nina kumutantera, ogu a pura nge, kukara nomwenyo gwanarunye.”

Jesus ta twikire ko pokurugurura asi: “Ame nyame mboroto zomwenyo. Ozinyakurweni ngava li mana momburundu, nye va fa. Nye mboroto zokutunda meguru zangesi asi nkenye ogu a zi li, nokufa si. Ame nyame mboroto zomwenyo, ezi za tunda meguru. Nsene muntu a lya mboroto ezi, nga kara nomwenyo dogoro narunye.” Yimo, pokupura mwaJesus, ogu ga tuma Karunga, vantu kuvhura kukara nomwenyo gwanarunye. Kapisi mana ndi nkenye mboroto kuvhura kugava mwenyo gwangoso!

Nzogera zokuhamena mboroto zemeguru kwa tamekere konyima tupu apa va mu gwene Jesus vantu pepi naKaperenaumu. Nye nzogera simpe za ka twikilire konyima apa Jesus ga ka rongere mosinagoge moKaperenaumu. Johanesa 6:25-51, 59; Episarome 78:24; Jesaya 54:13; Mateusa 13:55-57.

▪ Yihorokwa musinke ya horokere komeho zonzogera zaJesus kuhamena mboroto zemeguru?

▪ Mokutura megano eyi ga rugene Jesus, morwasinke ehundiro lyositetu lya pililire kuwapera?

▪ Morwasinke va vhungutilire Vajuda apa ga uyungire Jesus asi yige mborotozuni zemeguru?

▪ Kupi oku nzogera zokuhamena mboroto zemeguru za tamekererere?