Egaununo 88

Mugara gongawo naRasarusa

JESUS kwa uyungire novarongwa vendi kuhamena eruganeso nawa emona, pokuvafatwilira asi kapi tatu vhuru kukara vakareli valyo ntani posiruwo sooso tu kare vakareli vaKarunga. Ano Vafalisayi ava va dowokerere yimaliwa, apa va yi zuvhire nayinye eyi, makura tava mu zoro Jesus sirungu. Jesus makura ta va tantere asi: “Nyone omu lihungamesa koyipara yovantu, nye Karunga ga diva nomutjima deni. Yeeyi eyi va fumadeka vantu, yiyo ga nyenga Karunga.”

Siruwo sa sikire mo sokugurumwisa ava va ngawopere memona nomoupolitika ntani nomoukarelikarunga. Ano, siruwo sokuzerura vantu ava va nongwenene yihepwa yawo yopampepo naso sa sikire mo. Jesus kwa likidire marunduruko gangoso apa ga twikilire kuuyunga noVafalisayi asi:

“Veta zaMosesa novaporofete kwa ya hagera mwaJohanesa Mukuhwi. Kutunda opo makura Mbudi zoNgwa zoUntungi waKarunga yiyo ava zi udisa, navenye yiyo ava dukire mo kononkondo. Eguru nevhu ereru kudongonoka po, nye koVeta nokaninke si kaaka ngaka tunda ko.”

Valirongi womatjangwa noVafalisayi kwa linenepekere pokutanta asi awo kukwama Veta zaMosesa. Diworoka asi apa ga mahwire Jesus pasitetu mugara gumwe moJerusarema, awo kwa likangangere asi: “Ose varongwa vaMosesa. Tuna yi diva asi, Karunga nga uyunga naMosesa.” Nye Veta zaMosesa za sikisire mo sitambo sazo pokutwara valinunupiki kwaHompa Jesus Kristusa, ogu ga horowora Karunga. Yipo nye kutundilira posirugana saJohanesa, vantu, unene po valinunupiki nava wokuhepa, kwa kondjere mokukara vapangerwa woUhompa waKarunga.

Jesus kwa sikisire mo Veta zaMosesa, ano azo za hege ponomfa dendi. Veta kwa pulisilire elizumbo monokonda dokulisiga-siga, nye Jesus kwa tente asi: “Nkenye ogu a zumbu mukadendi, nye a kware nage peke, ta hondere. Ano ogu a kwara mukadi ogu va zumba, nage ta hondere.” Matumburo gangoso kwa nyegenyesere Vafalisayi, morwa awo kwa pulisilire elizumbo monokonda dononzi!

Pokuuyungira Vafalisayi, Jesus kwa simwitire sifanekeso esi sa likidire vagara vavali ava maukaro gawo ga ya rundurukire unene konyima. Kuvhura o nongonone asi wolye va fanekesere vagara ntani yisinke aga tanta marunduruko goukaro wawo?

Jesus ta faturura asi: “Pwa kere mugara gumwe gongawo. Age nga dwara yikoverero yopurupuli neyi yoyizera yokurerema, nga hafa nkenye ezuva, ta litumbu. Pwa kere hena muhepwe gumwe, edina lyendi Rasarusa. Age ga zulire masina, nga rara pevero lyongawo. Age nga hara asi a likutike noyintau eyi ngayi gu kosiliro songawo. Hawe, nonombwa deedi ngadi wiza di ya pehagure masina gendi.”

Jesus apa kwa ruganesere mugara gongawo mokufanekesa vampitisili womaukarelikarunga goVajuda, kapisi Vafalisayi novalirongi womatjangwa tupu, va kwatera mo hena noVasadukayi ntani novapristeli wovanene. Awo kwa ngawopere moyitumbukira yopampepo, ntani awo kwa kere ngwendi mugara gongawo. Yikoverero yawo yopurupuli kwa fanekesere yipundi yawo yokuzeruka ano yoyizera yokurerema kwa fanekesere uyilipaki wawo wokulihungika vene.

Mbunga ezi zelinenepeko zomugara ogu gongawo kwa tere woruhepo asi kwato mulyo, ngava va tumbura asi amaharetisi, ndi vantu wosirongo. Rasarusa gomuhepwe kwa fanekesere vantu ava vampitisili womaukarelikarunga ngava nyokesa nondya noyitumbukira yoyiwa yopampepo. Ngwendi Rasarusa ogu ga zulire masina, vantu ava kwa va tere ngwendi wokuvera pampepo ntani awo va fira tupu kulikwatakana nonombwa. Nye, wombunga zaRasarusa kwa fire nzara nenota lyoyininke yopampepo, ano awo kwa paparere nkenye yintau yonondya dopampepo eyi ngayi gu kosiliro songawo.

Jesus ta twikire kusingonona marunduruko goukaro womugara gongawo nou waRasarusa. Marunduruko musinke, ntani yinke ga fanekesere?

Mugara gongawo naRasarusa tava ligwanekere nomarunduruko

Mugara gongawo kwa fanekesere vampitisili womaukarelikarunga ava va pere yitumbukira yopampepo, ntani Rasarusa kwa fanekesere vantu ava va kere nonzara zonondya dopampepo. Jesus ta twikire nesimwititi lyendi pokusingonona erunduruko lyokutetukisa moukaro wovagara ava.

Jesus ta tanta asi: “Ano muhepwe ogu apa ga fire, vaengeli tava mu damuna va mu tware mevha lyaAbirahamu. Ngawo nazo tazi fu, tava zi vhumbike. Eyi ga kankura meho mosirongo sovafe, morunyando rwendi, ta mono Abirahamu koure naRasarusa mevha lyendi.”

Mokumona asi mugara gongawo naRasarusa kapisi vantu vene-vene nye kwa fanekesere nombunga dovantu, yipo nye nonomfa dawo nado kwa kere sifanekeso. Yisinke da fanekesere nomfa dawo?

Komeho zokugava sifanekeso esi, Jesus kwa likidire komarunduruko moukaro pokuuyunga asi ‘Veta zaMosesa novaporofete kwa ya hagera mwaJohanesa Mukuhwi, nye kutunda opo makura uhompa waKarunga yiyo ava u udisa.’ Yipo nye, mezuvhiso lyaJohanesa naJesus Kristusa mugara gongawo naRasarusa navenye kwa fire koukaro wawo wanare.

Mbunga zaRasarusa zovalinunupiki zokulitezurura kwa fire koukaro wawo wanare woruhepo ropampepo nokukara nelikwatakano lyewa naKarunga. Awo pomuhowo kwa tere kovampitisili womaukarelikarunga koyintau eyi ngayi gu kositafura sopampepo, nye konyima mausili goPatjangwa aga ga geve Jesus kwa sikisire mo yihepwa yawo. Awo kwa va retere mevha lyaAbirahamu goMunene, kutanta asi melikwatakano lyewa naJehova Karunga.

Ava va tulisa po mbunga zomugara gongawo, Karunga ga va nyokere morwa kutwikira kwawo kunyoka kutambura mbudi zoUhompa ezi nga rongo Jesus. Awo kwa fire melikwatakano eli va gazarere asi va kere nalyo naKarunga. Awo kwa kere morunyando ropasifanekeso. Mugara gongawo makura ta uyunga asi:

“Tate Abirahamu, fira nge nkenda o tume Rasarusa, a twe nyara zendi momema, a ya nengedeke eraka lyange. Yeeyi ame moudigu wounene na kara omu momundiro gokutwera.” Mbudi zompanguro zaKarunga ezi va zuvhisire varongwa vaJesus kwa kere ngwendi mundiro ogu gwa nyandesere womombunga zomugara gongawo. Awo kwa here varongwa va liguminine mokudivisa mbudi ozo, yipo va gwane ko epwizumuko komarunyando gawo.

“Nye Abirahamu ta limburura asi, ‘Munwange, gazara asi ove kwa gwene yoyiwa apa wa kere nomwenyo, ano Rasarusa age kwa gwene yoyidona. Nye age ntaantani tava mu hengagwida, nye ove to mono nye udigu wounene. Unene po hena empompwa eli va tura pokatji ketu lyokuninka asi, ava womu mpili va hare asi va taguruke va wize kweni, nokuvhura si, ano owo womo, nawo si nokuvhura si kutaguruka va wize kwetu.’”

Eh, omu tupu ga wepe marunduruko gangoso gomanene aga ga horokere pokatji kombunga zaRasarusa nombunga zomugara gongawo! Marunduruko momaukaro kwa sikilire mo mezuva lyoPentekoste zomo-33 S.N, apa egwanekero lyoVeta zanare va li pinganesere po negwanekero lyepe. Makura ayo kwa zerere nawa-nawa asi varongwa kwa va haferere Karunga, kapisi Vafalisayi novampitisili womaukarelikarunga. “Empompwa” eli lya gawinine mugara gongawo gomosifanekeso kovarongwa vaJesus kwa fanekesa mpanguro zaKarunga zouhunga zokudira kurunduruka.

Mugara gongawo ta hundire “Tate Abirahamu” asi: “Mu tuma [Rasarusa] nye kembo lyotate. Yeeyi ame kwa kara novamumbya vange wovagara vatano.” Yangesi mugara gongawo ga likidire asi ga kara nelikwatakano lyenene naguhwe gwapeke, kutanta asi Satana Muzonaguli. Mugara gongawo kwa hundilire asi Rasarusa a nengedeke kuuyunga mbudi zompanguro zaKarunga yipo va dire kukara “mevega eli lyorunyando” ‘vamumbya vendi wovagara vatano,’ ava va fanekesere vakwawo womoukarelikarunga.

“Abirahamu ta mu tantere asi, ‘Mosesa novaporofete nawo va kara, owo yiwo nava zuvha.’” Yimo, mokuhenduka runyando ngano ‘vamumbya vendi wovagara vatano’ va hepere kupurakena matjangwa gaMosesa noVaporofete aga aga likida asi Jesus yige Mesiyasa ntani nokuyakara varongwa vendi. Nye mugara gongawo ta patana asi: “Hawe, tate Abirahamu, ngano mufe gumwe ana zi ko, ngano tava litezurura.”

Nampili ngoso Abirahamu ta mu tantere asi: “Nsene kapi vana kuzuvha Mosesa novaporofere, nokukapura si, nampili mu tunde gumwe koufe.” Karunga kapi nga gava yidiviso ndi yitetu yokulikarera mokuninka vantu va pure. Awo va hepa kuresa nokusikisa mo Matjangwa nsene vana hara kukara nelikwatakano naKarunga! Rukasa 16:14-31; Johanesa 9:28, 29; Mateusa 19:3-9; Vagarata 3:24; Vakorosi 2:14; Johanesa 8:44.

▪ Yinke ayi likida asi nomfa domugara gongawo nedi daRasarusa da karera sifanekeso, ntani yinke adi fanekesa?

▪ Kutundilira kosirugana saJohanesa, marunduruko musinke ga likidire Jesus ga horokere?

▪ Yinke va hagekesere po konyima zonomfa daJesus, ntani ngapi eyi omu ya kundamene yuma yelizumbo?

▪ Mosifanekeso saJesus, wolye va fanekesere mugara gongawo ntani naRasarusa?

▪ Marunyando musinke ga hepere mugara gongawo, ntani kupitira mosinke ga hundilire asi ga hage po?

▪ Yisinke lya fanekesere “empompwa”?

▪ Yilye nawa-nawa guhwe gomugara gongawo, ntani wolye vamumbya vendi wovagara vatano?