Egaununo 95

Jesus ta rongo kuhamena elizumbo ntani nokuhara vanona

JESUS novarongwa vendi kwa kere monzira zawo zokuza koJerusarema mokukakara poPaska zomo-33 S.N. Awo kwa zire mesinya mwina lyaJorodana ntani kwa gendere nzira zokupita momukunda gwaPereya. Apo kwa pitire po yivike yongandi apa ga kere moPereya, makura age kwa mu zigidire koJudeya morwa kaume kendi Rasarusa kwa verere. Apa ga kere moPereya, Jesus kwa uyungire noVafalisayi kuhamena elizumbo, ano apa kwa yi mu pulire hena.

MoVafalisayi kwa kere mo marongo gokulisiga kuhamena elizumbo. Mosesa kwa uyungire asi mukadi kuvhura kumuzumba nsene vana “mu mono yuma yoyidona.” Vamwe kwa yi pulire asi eyi kwa tembe tupu koruhonda. Nye vamwe kwa tere “yuma yoyidona” asi kwa kwaterere mo nkenye kapukogona. Yipo nye Vafalisayi, mokuheteka Jesus, tava mu pura asi: “Mugara kuvhura kuzumbira mukadendi mokonda nkenye ezi ndi?” Awo kwa huguvarere asi nkenye eyi na uyunga Jesus nayi mu twaredesa moudigu koVafalisayi ava va kere negano lyapeke.

Jesus ta limburura epuro eli noukotoki, kapi ga kwatesere ko magano govantu, nye age kwa tumbwire eyi ga uyungire Karunga apa ga tulisire po nonkwara. Age ta va pura asi: “Kapi mwa resa asi, ‘Ogu ga ungire muntu petameko, kwa va rugene va kare mugara nomukadi,’ yiyo ga tente asi, ‘Yipo nye na sigira mugara oguhwe nozina, a hamene mukadendi, ano mouvali wawo makura va kare nye rutu rumwe tupu.’ Awo kapisi vavali hena, awo rutu rumwe tupu. Eyi ga gwanekedesa Karunga, muntu walye a yi gaununa.”

Jesus kwa likidire asi sitambo saKarunga kuna kara asi valikwali va likwatakane kumwe, awo nokulizumba si. Nsene asi yimo ngoso, Vafalisayi tava mu pura asi: “Morwasinke ga pangerere Mosesa kupa mukadi mbapira zomaligaunuko, va mu zumbe?”

Jesus ta limburura asi: “Morwaukukutu wonomutjima deni ga yi sigilire Mosesa yokuzumba vakadi veni, nye petameko kapisi yimo ngoso ya kere.” Yimo, apa ga tulisire po Karunga nompango douhunga kononkwara mosipata saEdeni, age kapi ga tulire po ewapaiko lyelizumbo.

Jesus ta twikire ko kutantera Vafalisayi asi: “Nye ame tani mu tantere asi, ogu a zumbu mukadendi, nye pwa hana konda zehondero [konkango zoRugereka porineya], a ka kware nagepeke, nonkwara a teza.” Pokurugana ngoso, age kwa likida asi porineya, ndi yirugana yokunyata yoruhonda, yizo konda zelike ga pulisira Karunga mokulizumba.

Pokunongonona asi nonkwara da hepa kukara elikwatakano lyokukarerera ntani konda zimwe tupu zokupulisira elizumbo, varongwa vendi kwa va tumangedere pokutanta asi: ‘Nsenesi yimo va likara vantu namukadendi ngoso, yoyiwa po nani yokudira kukwara.’ Yosili muntu ogu ana kugazadara nonkwara ga hepa kutarurura nawa-nawa ekarereropo lyelikwatakano lyononkwara!

Jesus makura ta uyunga kuhamena udike. Age kwa fatwilire asi vamati vamwe kwa va reta va hana yilyo yoruvharo, kapi tava vhuru kukwara. Vamwe kwa va rutura yilyo yawo yoruvharo vantu wonyanya. Ano vantu vamwe kupangera madowo gawo gokukwara nokuligwanekera panyama yipo va ligave vene mokurugana unene yirugana yoUhompa weguru. Jesus ta hulisa asi: “Nkenye ogu na vhura kutambura [udike, NW], a yi tambure.”

Makura vantu tava tameke kuretera Jesus vanona vawo. Nye, varongwa tava tugumukire vanona ntani nokuhetekera ko kuvatengwida, morwa kwa here kupopera Jesus kosinka sa hana hepero. Nye Jesus ta tanta asi: “Sigeni vanona va wize kwange. Mwa ha va silika, yeeyi vangoso yiwo wa hamena Untungi waKarunga. Yosili nina kumutantera asi, nkenye ogu a dili kutambura Untungi waKarunga ponkedi zopanona, kapi nga za mo!”

Yirongwa musi kouwa ga geve Jesus! Mokutambura Uhompa waKarunga, twa hepa kutemwinina elinunupiko lyovanona nosikara sawo sokulironga. Nye sihonena saJesus kwa likidire hena omu ya kara nomulyo, unene po kovakurona, mokukara kumwe novana vawo. Jesus makura ta likida eharo lyendi kovanonagona pokuvadingilikida mawoko gendi nokuvatungika. Mateusa 19:1-15; Deuteronomium 24:1; Rukasa 16:18; Marukusa 10:1-16; Rukasa 18:15-17.

▪ Magano musinke gokulisiga-siga va kere nago Vafalisayi kuhamena elizumbo, ntani ngapi omu va hetekere Jesus?

▪ Ngapi omu ga limbwilire Jesus eheteko lyoVafalisayi, ntani konda musinke zelike ga geve zokulizumba?

▪ Morwasinke va uyungilire varongwa vaJesus asi yoyiwa po nani yokudira kukwara, ntani ekorangedo musinke ga va pere Jesus?

▪ Yinke ana kuturonga Jesus meruganeno lyendi kumwe novanona?