Egaununo 96

Jesus nomupangeli gomumati gongawo

NGOMU ga pitire Jesus momukunda gwaPereya a ze koJerusarema, tapa wiza mumati nokuyamutwira nongoro. Mumati kwa kere mupangeli, kutanta asi nampo age kwa kere nosipundi sekuto mosinagoge zomomukunda ndi kwa kere muhameni gosigongi somasimbi. Hena, age kwa kere ngawo zonene. Ta pura Jesus asi: “Murongi gomuwa, yisinke nye nani rugana ni gwane mwenyo gwanarunye?”

Jesus ta limburura asi: “Yisinke yokutumbwira nge asi ni muwa? Patupu ogu ga wapa, ntudi gumwe tupu, Karunga googo.” Mumati kwa ruganesere nkango “muwa” ngositumbwisiso, yipo nye Jesus ga mu divisire asi situmbwisiso sangoso kwa wapera tupu Karunga.

Jesus ta twikire ko asi: “Ano nsenesi wa hara kuza momwenyo gwanarunye, o sikise mo yipango.”

Mumati ta mu pura asi: “Yipi yo?”

Pokutemwinina yitano yomoYipango Murongo, Jesus ta limburura asi: “Walye o dipaga; walye o hondere; walye o vaka; walye o tanta yimpempa. O fumadeke guho nanyoko.” Ntani ta gwederere ko nye sipango somulyo po unene, pokutanta asi: “Ove hena o hare mukweni moomu wa lihara nyamoge.”

Mumati ta limburura nousili asi: “Nayinye oyo ame kwa gusa kuyisikisa kutunda kounona wange. Yisinke hena ya hupa nge ko?”

Jesus pokupurakena kehundiro lyomupampi lyomumati, age kwa mu zire komutjima. Nye Jesus ta nongonona asi mumati kwa here unene emona, makura ta mu tantere asi: “Simwe tupu sina ku hupire po: zende o ka randese nayinye eyi wa weka, o ka yi gavere vahepwe ngo ka gwane emonazuni meguru. Ntani no wiza o ya kwame nge.”

Jesus ta tara nonkenda ngomu mumati ga katukire nokukaza age ana guvarara. Emona lyendi kwa mu ninkisire a dire kunongonona mulyo gwemona lyene-lyene. Jesus noruguwo ta tanta asi: “Ani udigu unene kwava va weka yoyinzi kuza moUntungi waKarunga.”

Nonkango daJesus kwa pwagesere nomutjima dovarongwa. Nye awo kwa va tetukisire unene apa ga twikilire ko pokutanta asi: “Yokupita ngameru mezuru lyonsonga hasa ureru, ya livhura neyi yokuza ngawo moUntungi waKarunga.”

Varongwa makura kwa here kudiva asi: “Nsene yimo ngoso, yilye nye ogu nga vhura kuparuka?”

Jesus ta va tarurura ta limburura asi: “Kovantu eyi yidigu, nye kapisi kwaKarunga, yeeyi kwaKarunga, nayinye yireru.”

Pokudidilika asi awo kwa tura po etokoro lyokulisiga unene neli lyomumati gomupangeli gongawo, Peturusa ta tanta asi: “Ko tara si, ose amesi nayinye twa siga, yiyo atu ku kwama.” Age makura ta pura asi: “Yinke eyi ngatu ka gwanena po?”

Jesus ta va tumbwidire asi: “One ava mwa kwama nge, none ngomu ka hingira poyipundi murongo nayivali, ngomu pangure mazimo murongo nagavali gaIsraeli, apa nga hingira MunwaMuntu posipundi souyerere wendi pesitururo lyouzuni.” Jesus kwa likidire asi maukaro gepevhu ngava ga siturura ga kare ngwendi moomu ya kere mosipata saEdeni. Peturusa ntani novarongwa vakwawo ngava gwana mfuto mokukapangera Paradisa zepevhu kumwe naKristusa. Yosili, mfuto zonene ngoso kuna kara nomulyo kwankenye elizambero!

Nampili ngomu pwa kara mfuto, Jesus kwa tumbwire nononkondo asi: “Kutupu muntu ogu a sigi embo lyendi ndi vana vazina ndi ozina noguhwe ndi mukadendi ndi vana vendi nomapya gendi mokonda zange noMbudi zoNgwa, a dire kumurugwida kuwoko rwantaantani, mambo novanazina novana nomapya. Nampili tava mu hepeke simpe, nye mouzuni wokomeho nga gwana mwenyo gwanarunye.”

Ngomu ga yi tumbwidira Jesus, nkenye oku ava zi varongwa vendi mouzuni, awo kuhafera elikwatakano kumwe noVakriste vakwawo eli lya nenepa ntani lyomulyo unene kupitakana eyi va haferere kumwe nekoro lyawo. Mumati gomupangeli gongawo kwa zumbanesere mfeto ezi ntani nezi zomwenyo gwanarunye moUhompa waKarunga wemeguru.

Konyima zeyi, Jesus ta gwederere ko asi: “Nye sinzi sava wokuhova ngava kara vahulilili, ano vahulilili yiwo ngava kara wokuhova.” Yisinke ga tembe Jesus?

Age kwa tembe asi vantu wovanzi ava va kere “wokuhova” mokuhafera yitumbukira yomaukarelikarunga goVajuda, ngwendi mumati gomupangeli gongawo, kapi ngava za moUhompa. Awo ngava ka ‘hulilira.’ Nye wovanzi, kwa kwatera mo varongwa vaJesus wokulinunupika, ava ngava tara Vafalisayi wouyilipaki asi kwato mulyo ntani ngwendi ‘wokuhulilira’ ngovantu wosirongo, ndi ngava va tumbura asi amaharetisi ngava kara “wokuhova.” Mokukara kwawo “wokuhova” kutanta asi ngava tambura situmbukira sokuyakara vapangeli kumwe naKristusa moUhompa wendi! Marukusa 10:17-31; Mateusa 19:16-30; Rukasa 18:18-30.

▪ Mupangeli musinke ga kere mumati gongawo?

▪ Morwasinke ga nyokerere Jesus mokumutumbura asi muwa?

▪ Ngapi omu sihorokwa somumati gomupangeli sa likida siponga sokukara ngawo?

▪ Mfeto musinke ga tumbwidilire Jesus vasikuli vendi?

▪ Ngapi omu wokuhova ngava kara vahulilili, ano vahulilili ngava kara wokuhova?