Egaununo 97

Varugani womosikunino sovhinyu

JESUS kwa uyungire asi: “Sinzi sava wokuhova ngava kara vahulilili, ano vahulilili yiwo ngava kara wokuhova.” Makura ta fanekesa eyi pokusimwitira esimwititi. Ta tameke asi: “Untungi weguru kwa lifana nanturagumbo, ogu ga menekerere ngura-ngura zonene kokukakonga varugani womosikunino sendi sovhinyu.”

Jesus ta twikire ko asi: “Makura tava lizuvhu [nanturagumbo] komfuto zedenali limwe . . . , ta va tumu mosikunino. Movili zautano-nane ta zi ko hena, ta ka gwana vamwe, awo vana sikama pomarandero, neisi vana kurugana. Makura age ta va tantere asi, ‘None zendeni mosikunino sange sovhinyu, nani ka mu futa mouhunga.’ Makura nawo tava ka za. Ano eyi ga za ko hena koyiha yovili zomurongo nambali nomontatu, ta ka rugana ngorooro. Movili zautano ta zi ko hena, ta ka gwana ko hena vamwe, awo vana sikama. Makura ta va pura asi, ‘Yisinke eyi muna sikamene apa ezuva mudima, one mwa hana kurugana yuma?’ Awo tava mu limburura asi, ‘Yeeyi sa ana dili kutukuta muntu.’ Age makura ta va tantere asi, ‘None zendeni mosikunino sange sovhinyu.’”

Nturagumbo, ndi mwenyasikunino, kuna kara Jehova Karunga, ntani sikunino kuna kara muhoko gwaIsraeli. Varugani womosikunino sovhinyu kwa kere vantu ava va kere meligwanekero lyoVeta; unene po awo kwa kere Vajuda ava ngava paruka momazuva govapositoli. Owo va rugene ezuva mudima yiwo velike va tumbwidilire mfuto zedenali limwe. Ava va kutire konyima, vamwe va rugene novili 9, vamwe novili 6, vamwe novili 3, ano vamwe vili 1 tupu.

Varugani ava va rugene novili 12 ndi ezuva mudima, kwa fanekesere vampitisili woVajuda ava va rugene nkenye apa mosirugana soukarelikarunga. Awo kapi va lifene novarongwa vaJesus, ava va rugene meparu lyawo nalinye mokukwata nomfi ndi yirugana yapeke. Dogoro koyiha yehagero lyomvhura 29 S.N., yipo ‘nturagumbo’ ga tumine Jesus Kristusa mokuvapongaika va ya kare varongwa vendi. Awo kwa ya kere varugani womosikunino sovhinyu ava va ‘hulililire’ va rugene tupu vili zimwe.

Ezuva lyomosifanekeso kwa ya hege ponomfa daJesus, ntani yipo sa sikire siruwo sokufuta varugani. Narunye vantu ava ava rugana ezuva mudima yiwo ava howo kufuta, nye mosifanekeso esi kapisi yimo va yi rugene ngoso. Jesus ta yi faturura asi: “Ano eyi lina siki pongurova, mwenyasikunino sovhinyu ta tantere muruganesi gwendi asi, ‘Zigida varugani, o ya va pe mfuto zawo. Hovera kwava vana hulilire, o ya hulire kwava vana howo.’ Ano ava va wizire movili zautano eyi va hedera po, nkenye ogu ta kwata edenali limwe. Ano nye ava va hovere eyi va wiza, tava gazara asi, awo nava va gweda ko. Nye nawo edenali limwe lyoolyo yilyo va kwete. Eyi va kwata ngoso, tava tangwinine nturagumbo, tava ninki asi: ‘Amesi ava vana hulilire, vili zimwe tupu vana rugana, nye ove yiyo ono va hetakanesa kumwe nose ava una kotongorora udigu wezuva noupyu walyo.’ Makura age ta limburura po gumwe asi: ‘Hawe, ame kapi nina kukurugana momudona. Nani kapi katu lizuvhu kedenali? Gusa po yoge o ze. Ame kuna hara kupa muhulilili ngwendi nyove. Nani ame nokuvhura si kuruganesa ko yininke yange moomu nina panga? Ndi nampo mfudu zina ku kara morwaunongo wange?’” Mokuhulisa, Jesus kwa rugurukire sitwa sokuhova, pokutanta asi: “Ngesi yimo ngava kara: wokuhulilira ngava kara wokuhova, ano wokuhova ngava kara wokuhulilira.”

Ekwato lyedenali kwa horokere, kapisi ponomfa daJesus, nye poPenteskoste 33 S.N., apa Kristusa, “muruganesi,” ga powomwene mpepo zokupongoka varongwa vendi. Varongwa ava vaJesus kwa fanekesere varugani “wokuhulilira,” ndi ava va rugene vili zimwe. Edenali kapi lya fanekesa sigava sompepo zokupongoka zene. Edenali kuna kara sininke esi ava ruganesa varongwa apa pevhu. Sininke esi kwa tamba eparu lyawo, mwenyo gwanarunye. Edenali kufanekesa situmbukira sokukara Muisraeli gopampepo, ogu va gwaveka mokuzuvhisa kuhamena Uhompa waKarunga.

Ava va kutire pomuhowo kwa nongwenene asi varongwa vaJesus vana va futu, ntani kwa va mwene kuna kuruganesa edenali lyosifanekeso. Nye awo kwa here yoyinzi kupitakana mpepo zokupongoka noyitumbukira yazo yoUhompa. Esivano nenyokero lyawo kwa va ninkisire va hepeke varongwa vaKristusa, ava va kere varugani “wokuhulilira” mosikunino sovhinyu.

Esikiliromo lyomouye wokuhova yilyo lyelike tupu esikiliromo lyosifanekeso saJesus ndi? Hawe, morwa yipundi noyitumbukira yawo, vampitisili womaukarelikarunga ava ava lininkisa asi Vakriste mosiruwo setu yiwo va kutire “wokuhova” mokurugana mosikunino sovhinyu saKarunga sopasifanekeso. Awo kwa tere vazuvhisi wokuligava ava va likwatakana nombungakriste zoNombangi daJehova ngwendi “wokuhulilira” mokukara nankenye sirugana somoukareli waKarunga. Nye, vazuvhisi owo va nyenga vampitisili womaukarelikarunga yiwo va gwene edenali, mokugwana efumano lyokukara nontumi edi va gwaveka doUhompa waKarunga wemeguru. Mateusa 19:30–20:16.

▪ Yisinke asi fanekesa sikunino sovhinyu? Yilye a fanekesa mwenyasikunino sovhinyu ntani varugani ava va rugene novili 12 ntani nava va rugene vili zimwe?

▪ Siruwoke lya hege ezuva lyomosifanekeso, ntani siruwoke va va futire varugani?

▪ Yisinke azi fanekesa mfuto zedenali limwe?