Egaununo 116

Jesus ta wapaike vapositoli konomfa dendi

EDIWOROKO lyoMurarero kwa pwire, nye Jesus novapositoli vendi kwa kere simpe konzugo zekeguru. Nampili ngomu ga ya kere asi Jesus ta ka fa, age kwa kere neyi yoyinzi yokuuyunga. Makura ta va korangeda asi: “Gwa ha mu pwaga. Huguvareni Karunga.” Ta gwederere ko hena asi: “Oku hena mu huguvare nge ame.”

Jesus ta twikire ko asi: “MwaTate kwa kara mo mauturo gomanzi. . . . Yeeyi ame kuna kuza ni ka mu wapaikire uturo. . . . None ngomu ka kare oku na kara. Nzira zoku na kuza mwa zi diva.” Vapositoli kapi va yi kwete egano asi Jesus ga uyungire kuhamena yokuza meguru, yipo nye Tomasa ga pulire asi: “Hompa, kapi twa diva oku ono kuza. Nozo zene nzira omu natu zi diva ngapi?”

Jesus ta limburura asi: “Nyame nzira nousili nomwenyo.” Yimo, kupitira tupu mokutambura nokutemwinina nkedi zendi zeparu yipo muntu na vhura kuza mouturo wemeguru waGuhwe, morwa Jesus kwa tente asi: “Nagumwe si a wiza kwaTate, age ga hana kupitira pwange.”

Filipusa ta hundire asi: “Hompa, tu likida Guho, makura yi tu pwe.” Filipusa kwa here Jesus a gave elikido lyokumoneka lyaKarunga, ngwendi lyeeli va mwene moyiruwo yanare oMosesa naEliya ntani naJesaya. Nye, vapositoli kwa kere noyininke yoyinzi yoyiwa kupitakana mamoneko gangosina, ngamoomu ga uyungire Jesus asi: “Apa nare na gusa kukara neni, nye ove nokudiva nge si, Filipusa! Ogu ga mona nge, ga mona hena Tate.”

Jesus ga monekesere nawa-nawa yikara yoGuhwe yipo nye pokutunga nendi nokumutara, ayo kwa kere ngwendi kuna kumona oGuhwe. Nye Guhwe kwa pitakana Munwa, ngamoomu ga yi uyungire Jesus asi: “Nonkango edi nina kumutantera, kapi na kudiuyungira mwanyamwange.” Jesus kwa geve efumano nalinye lyomarongo gendi kwaGuhwe gemeguru.

Ekorangedo musi lya kere kovapositoli mokuzuvha Jesus kuna kuvatantera asi: “Ogu a pura nge, nage hena nga rugana eyi nina kurugana, nye nga rugana yoyinene ya pita eyi.” Jesus kapi ga tembe asi vasikuli vendi ngava rugana yitetu yononkondo unene kupita eyi ga rugene. Hawe, nye age kwa tembe asi awo ngava twikira mosirugana sokuzuvhisa siruwo sosire, monomukunda dononzi ntani nokuzuvhisira vantu wovanzi kumupitakana.

Jesus kapi nga sigilira varongwa vendi konyima zonomfa dendi. Age ta tumbwidire asi: “Ano nkenye eyi ngomu hundilira medina lyange, ngani yi rugana.” Ta tanta hena asi: “Ano nyame ngani hundira Tate, a mu pe Mukwafi nagepeke, nga ya kare neni narunye, Mpepo zoUsili.” Konyima apa ga rondere meguru, Jesus ta powomwene varongwa vendi mpepo zokupongoka, ndi mukwafi.

Nomfa daJesus kwa hederere pepi, ngomu ga tente asi: “Karuwogona kana hupu ko, makura uzuni ngau dire kumona nge hena.” Jesus nga kara sisitwa sopampepo esi ngava dira kuvhura kumona vantu. Nye Jesus ta tumbwidire hena vapositoli vendi wovalimburukwi asi: “Nye one ngomu mona nge. Yeeyi ame ni muzuni, ano none ngomu kara mu vazuni.” Jesus kapi tupu ga va monekerere konyima zevhumbuko lyendi morupe romuntu nye komeho nga ka va pindura keparu lyemeguru ngoyisitwa yopampepo kumwe nendi.

Jesus makura ta tumbura veta zonderu asi: “Ogu ga kara noyipango yange, nye age ta yi sikisa mo, yige nye googo ga hara nge. Ano Tate nga hara ogu ga hara nge, name ngani mu hara, makura ngani mu lihorwere.”

Makura mupositoli Judasa, ogu ava tumbura hena asi Tadeusa, ta pura asi: “Hompa, yinke eyi ono kuharera kutulihorwera ose, wa hana kulihorwera uzuni?”

Jesus ta limburura asi: “Nsene muntu ga hara nge, nga sikisa mo nonkango dange. Ano Tate nage yige nga hara . . . Ogu ga dira kuhara nge, kapi a sikisa mo nonkango dange.” Kapisi ngwendi vasikuli vendi wovalimburukwi, uzuni kuncenuna marongo gaKristusa. Yipo nye asi kapi ga lihorwere mwene kouzuni.

Mosirugana sendi sezuvhiso lyendi lyepevhu, Jesus ga rongere vapositoli vendi yininke yoyinzi. Pokumona asi noposiruwo esi kapi va vhulire kukwata egano yoyinzi, ngapi ngano va vhulire kuyidiworoka nayinye eyi? Jesus ta va tumbwidire noruhafo asi: “Nye Mukwafi, Mpepo zoKupongoka, ezi nga tumina Tate medina lyange, yizo ngazi ya mu ronga nayinye, zi ya mu diworokese nayinye eyi na mu tantera.”

Jesus ta va hengagwida hena asi: “Mbili nina kumusigira, mbili zange nina kumupa. . . . Mwa ha siga nomutjima deni, di kare nomalimbiliro.” Yimo, nomfa daJesus da hederere pepi, nye ga fatwilire asi: “One nganosi kwa hara nge, ngano tomu hafere eyi nina kuza kwaTate, yeeyi Tate kwa pita nge.”

Siruwo sosisupi tupu sa hupire ko sokukara nawo. Makura Jesus ta tanta asi: “Kapi nani uyunga hena none dononzi, yeeyi mupangeli gouzuni ta wiza, nye age nayimwe si kwange.” Satana Muzonaguli ogu ga hwililire mwaJudasa nokumukwata, yige mupangeli gouzuni. Nye mwaJesus mutupu maupirankondo gononzo yipo Satana a vhure kumuhagekesa mokukarera Karunga.

Kuhafera malikwatakano gomanene

Konyima zomurarero, Jesus kwa korangedere vapositoli vendi pokuuyunga nawo. Nampo kwa kere pokatji komasiku, makura Jesus ta va tumangeda asi: “Katukeni tu zeni.” Nampili ngoso, komeho zokuza, morwa eharo lyendi lyokuvahara, Jesus ta twikire kuuyunga, pokugava sifanekeso sekorangedo.

Age ta tameke asi: “Nyame ni sindjembere sosili, Tate yige mwenyasikunino.” Mwenyasikunino goMunene, Jehova Karunga, kwa tapekere sindjembere sosifanekeso apa ga gwavekere Jesus nompepo zokupongoka pekuho lyendi koyiha yehagero lyomvhura 29 S.N. Nye Jesus ta likida asi sindjembere kukwatera mo vamwe hena, pokutanta asi: “Nkenye mutayi kwange, ogu agu dili kuyima, age kuguteta ko. Nye nkenye mutayi ogu agu yimi, age kuguwapeka, gu yime ko unene. . . . Moomu agu dili kuvhura kuyima mutayi mwagwene, ntene gu dira kukara mosindjembere, none yimo mwa ha yimi, nsene mu dira kukara mwange. Ame ni sindjembere, ano one nyone nomutayi.”

Konyima zomazuva 51, poPentekoste, vapositoli ntani nava wopeke kwa ya kere nomutayi dosindjembere apa va va powomwenene mpepo zokupongoka. Moruhura vantu wokusika po-144 000 ngava kara nomutayi dosindjembere sopasifanekeso. Kumwe nedi lyosindjembere, Jesus Kristusa, awo kwa tulisa po sindjembere sosifanekeso esi asi yimi yiyimwa yoUhompa waKarunga.

Jesus kwa fatwilire nsapi zokuyima yiyimwa asi: “Ogu a kara mwange, ano ame yiyo ani kara mwendi, age kuyima unene, yeeyi kupira nge, one nayimwe si omu vhuru.” Nsene muntu a dira kuyima yiyimwa, Jesus ta tanta asi: “Age kumuzugumina kwina, makura ta kukuta ngwendi mutayi. Makura tava di pongaike va di zugumine momundiro, di pye.” Ano Jesus ta tumbwidire asi: “Nsene mu kara mwange, ano nonkango dange di kare mweni, one kuhundira tupu nkenye eyi muna hara nye, makura tomu yi gwana.”

Mokugwederera ko, Jesus ta tantere vapositoli vendi asi: “Nsene mu yima unene, ngoso Tate kuna mu yererepeke nye, ano one tomu kara nye varongwa vange.” Yiyimwa eyi ga hara Karunga yokutunda konomutayi kuna kara elikido lyawo lyoyikara ngwendi yaKristusa, unene po eharo. Mokumona asi Kristusa kwa kere muudisi goUhompa waKarunga, yiyimwa yoyiwa kwa kwatera mo hena sirugana sawo sokutura po varongwa ngwendi moomu ga yi rugene age.

Jesus ta korangeda asi: “Omu kare meharo lyange.” Ngapi omu vapositoli va vhulire kukara meharo lyendi? Age ta va tantere asi: “Nsene mu sikisa mo yipango yange, tomu kara meharo lyange.” Mokutwikira, Jesus ta faturura asi: “Sipango sange sesi asi, omu lihara-hare moomu na mu hara ame. Nagumwe si ga kara neharo lyokupita lyogu a fire vakwawo.”

Konyima zonovili dongadi, Jesus ga ka likidire eharo eli lyokulikarera pokugava mwenyo gwendi pokufira vapositoli vendi, ntani nanavenye ava ava likida epuro mwendi. Sihonena sendi ngano si tumangede vasikuli vendi mokukara neharo lyokulizambera mokufira vakwawo. Eharo eli ngali va dimbwilisa, ngomu ga yi tumbwire Jesus pomuhowo asi: “Nsene mu lihara-hara, yipo ngava divira vantu asi one sili varongwa vange.”

Pokudimburura vakaume vendi, Jesus ta tanta asi: “One mu vakwetu, nsene mu rugana eyi nina kumutantera. Ame nokumutumbura si hena asi vakareli, yeeyi mukareli kapi ga diva eyi a rugana hekurwendi. Nye ame kumutumbura asi vakwetu, yeeyi na mu horwera nayinye eyi na zuvha mwaTate.”

Uwa musi pokukara vakaume vaJesus wovanene! Nye mokutwikira kuhafera elikwatakano eli, vasikuli vendi va hepa ‘kuyima.’ Nsene va yima, Jesus kwa tente asi: “Makura Tate nga mu pe nkenye eyi ngomu hundira medina lyange.” Yosili, azo kuna kara mfeto zonene kwava ava yimi yiyimwa yoUhompa! Konyima zokupukurura vapositoli ‘mokulihara-hara,’ Jesus ta va fatwilire asi uzuni ngau va nyenga. Nye, ga va hengagwidire asi: “Nsene u mu nyenga uzuni, diveni asi nyame wa hova kunyenga.” Makura Jesus ta horora eyi uzuni ngau nyengera vasikuli vendi, pokutanta asi: “Ame kwa mu horowora mo mouzuni, yiyo mwa dira kuhamena kouzuni, yipo nye wa mu nyengera uzuni opo.”

Mokugwederera kefatururo lyeyi ngau va nyengera uzuni, Jesus ta twikire ko asi: “Nye nayinye eyi ngava yi mu ruganena mwarwange, yeeyi kapi va diva [Jehova Karunga] ogu ga tuma nge.” Yirugana yoyitetu yaJesus kwa pangwire ava va mu nyengere, ngomu ga yi didilikire asi: “Ngano kapi na rugana mokatji kawo yirugana eyi ga dira kurugana muntu rumwe, ngano awo kutupu nzo. Nye opo va yi mona nye, walye eyi va tu nyengera ame naTate.” Ngomu ga uyungire Jesus, etjangwa kwa sikilire mo asi: “Awo kwa nyenga nge tupu mawoko-woko.”

Ngomu ga yi rugene pomuhowo, Jesus ta va hengagwida hena pokuvatumbwidira mokuvatumina mukwafi, mpepo zokupongoka, ado nonkondorugano daKarunga. “Yizo ngazi ya gava undipo wokuhamena nge. None hena ngomu gava undipo.”

Marondoro gamwe hena kuhamena nomfa dendi

Jesus novapositoli kwa liwapaikilire mokutunda monzugo zekeguru. Age ta twikire ko asi: “Yininke eyi kuna yi mu tanterere asi epuro lyeni li dire kuzegeza.” Makura age ta gava erondoro lyenene asi: “Awo ngava ka mu tjida mo mosinagoge. Nhi, mazuva taga wiza, apa ngava gazara nkenye ogu gokumudipaga asi age ta kerere Karunga.”

Erondoro eli kwa retesere sinka movapositoli. Nampili ngomu Jesus ga uyungire nare asi uzuni ngau va nyenga, age kapi ga va tanterere kuvyukilira asi awo ngava va dipaga. Jesus ta faturura asi: “Nye kapi na yi mu tanterere pomuhowo, yeeyi na kere kumwe neni.” Nye, ayo ya wepe mokuvapa nombudi edi komeho zonomfa dendi!

Jesus ta twikire ko asi: “Nye ntaantani tani zi kogu ga tuma nge, nye pweni nagumwe si ana kupura nge asi, ‘Kupi ko ono kuza?’” Kongurova ozo, awo kwa mu puragerere kuhamena oku ana kuza, nye siruwo esi awo kwa tukukire kweyi ga va tanterere, yipo ya va sumpilire mokupura hena kuhamena eyi. Makura Jesus ta uyunga asi: “Morwa kumutantera yininke eyi dina zulire nomutjima deni ruhodi.” Vapositoli kwa guvararere kapisi yeeyi tupu va divire asi ngava ligwanekera nomahepeko gomadona ntani nokuvadipaga, nye morwa Hekurwawo ta va sigi.

Yipo nye Jesus ta faturura asi: “Yiwa kweni nsene ni za. Morwa nsene ni dira kuza, ngano Mukwafi kapi nga wiza kweni, nye nsene ni za, ngano ngani ka mu mu tumina.” Apa ga kere Jesus pevhu ngomuntu, ga vhulire kukara pevega limwe tupu, nye apa ga tengwire meguru, ya mu vhulikire kutuma mukwafi, mpepo zokupongoka, kovasikuli vendi nkenye oku va kere pevhu. Ngano kapi ga tengwire ngano kapi ga vhulire kuyirugana eyi.

Jesus kwa uyungire asi mpepo zokupongoka ngazi ya “pulisa uzuni asi pa kara nzo nouhunga nombangwiliro.” Nzo zouzuni zokudira kupura mwaMunwaKarunga ngava zi horora. Mokugwederera ko, umbangi wouhunga kuhamena Jesus kwa u likidire apa ga rondere meguru koGuhwe. Ntani esumpiro lyaSatana nouzuni wendi woudona mokuhara kuteza po ulimburukwi waJesus kwa gava umbangi asi mupangeli gouzuni va mu pangwilire.

Jesus ta twikire ko asi: “Nina kara simpe noyininke yoyinzi yokumutantera, nye ntaantani one yina mu vhukire.” Yipo nye Jesus kwa tumbwidire asi apa nga powomwena mpepo zokupongoka, nonkondorugano daKarunga, azo ngazi va ronga mokukwata egano yininke oyo kuliza nevhuliko lyawo.

Vapositoli unene po kwa va sumpilire mokukwata egano asi Jesus nga fa makura nga horoke kwawo konyima zokumuvhumbura. Makura tava litantere-tantere asi: “Yisinke yene eyi ana kututantera asi, ‘Karuwogona tupu kana hupu ko, makura ngomu dire kumona nge, ano karuwogona tupu, makura ngomu mone nge hena,’ hena asi, ‘Tani zi kwaTate’?”

Jesus ta nongonona asi kuna hara va mu pure, makura ta faturura asi: “Yosili nina kumutantera asi, ngomu lira tomu handa, nye uzuni ngau hafa. One ngomu kara neguwo, nye eguwo lyeni ngali lisitunuka ehafo.” Konyima apa va dipagere Jesus kositenguko sezuva lyoolyo, vampitisili womaukarelikarunga gouzuni kwa hefe, nye varongwa kwa guvire. Nampili ngoso, apa ga vhumbukire Jesus, ruguwo rwawo kwa lisitunukire ruhafo. Ano ruhafo rwawo kwa twikilire apa ga va nkondopekere poPentekoste mokukara nombangi dendi pokuvapowomwena mpepo zaKarunga zokupongoka.

Pokuhetakanesa mukaro govapositoli kumwe nogu gomukadi posiruwo sehampuruko lyendi, Jesus ta tanta asi: “Mukadi nsene konzega ana kara, kukara neguwo, morwa siruwo sendi sina siki mo.” Nye Jesus kwa konekere asi mukadi kapi a diworoka hena udigu wendi nsene ana hampuruka mukeke, makura ta korangeda vapositoli vendi asi: “None hena ntaantani neguwo muna kara. Nye ngani mu mona hena [apa ngani vhumbuka], makura nomutjima deni ngadi hafe, ano ehafo lyeni nagumwe si nga li mu gusa.”

Dogoro posiruwo sina, vapositoli kapi ngava hundire yuma medina lyaJesus. Nye age ta va tantere asi: “Nsene ngomu hundilira yuma kwaTate medina lyange, nga yi mu pa. . . . Yeeyi Tate mwene kwa mu hara, morwa one kwa hara nge, yiyo mwa pura asi ame kwa tunda kwaKarunga. Ame kwa tunda kwaTate, yiyo na wiza mouzuni. Ano uzuni tani u sigi hena ni ze kwaTate.”

Nonkango daJesus kwa kere ekorangedo lyenene kovapositoli. Awo tava mu tantere asi: “Yipo nye tuna kupulira asi ove kwa tunda mwaKarunga.” Jesus ta va limburura asi: “Ntani nye muna kupura. Tareni, siruwo tasi wiza, aso nye nare sina wiza, apa nava mu haraganesa, nkenye ogu ta zi kwawo, mu sige nge nyamelike.” Yosili, eyi kwa horokere momasiku googo!

Jesus ta hulisa asi: “Yininke eyi kuna yi mu tanterere asi mu karere nombili mwange. Mouzuni noudigu mwa kara mo, nye kwateni nomutjima, ame na funda uzuni.” Jesus kwa fundire uzuni pokusikisa mo noulimburukwi mpango zaKarunga nampili mwankenye eyi Satana nouzuni wendi va hetekere kuruganesa mokuteza po ulimburukwi waJesus.

Jesus ta hulisa nekanderero monzugo zekeguru

Eharo lyendi lyokuhara vapositoli vendi lya tumangedere Jesus mokuvawapaikira nomfa dendi edi da kere pepi. Konyima zokuvarondora nokuvahengagwida siruwo sosire, makura ta ligamene keguru nokuhundira Guhwe asi: “Yererepeka nye munoge, munoge nage a ku yererepeke, moomu wa mu pa epangero lyovantu navenye, asi a gave kwanavenye ava wa mu pa, mwenyo gwanarunye.”

Jesus kwa tamekere nosiuyungwa sosiwa somwenyo gwanarunye. Mokumupa “epangero lyovantu navenye,” Jesus kuvhura kugava mauwa gonzambo zendi zosizoweseso kovantu navenye. Nye, kugava “mwenyo gwanarunye” kwava tupu ga panda Guhwe. Mokugwederera ko kosiuyungwa esi sokuhamena mwenyo gwanarunye, Jesus ta twikire ekanderero lyendi asi:

“Mwenyo gwanarunye yigo ogu asi va ku dive asi nyovelike Karunga gosili, nogu wa tuma, Jesus Kristusa.” Yimo, eparuro kwa korera mokukara kwetu nediwo lyaKarunga naMunwendi. Nye yinzi ya hepa po kupitakana tupu kukara nediwo.

Muntu ga hepa kuvadiva nawa, pokutunga po ukaume wounene kumwe nawo. Muntu ga hepa kulizuvha ngwendi moomu ava lizuvhu kuhamena yuma nokutara yininke ngwendi moomu ava yi tara awo. Mwanayinye, muntu ga hepa kukondjera mokutemwinina yikara yawo yokulikarera mokuruganena kumwe nava wopeke.

Makura Jesus ta kanderere asi: “Ame na ku yererepeka pevhu. Ano sirugana esi wa pa nge ni si rugane, na si sikisa mo.” Pokusikisa mo sirugana sendi dogoro posiruwo sina nokukara nehuguvaro kuhamena etomporo lyendi lyokomeho, age ta hundire asi: “Tate, yererepeka nge pwamoge neyererepeko eli na kere nalyo poge, awo uzuni simpe patupu.” Yimo, age apa kwa pulire mokumutengwidira eyererepeko lyendi eli ga kere nalyo meguru kupitira mevhumbuko.

Pokukwatakanesa sirugana sendi somulyo pevhu, Jesus ta tanta asi: “Edina lyoge na li horwera vantu ava wa pa nge mo mouzuni. Awo woge va kere, nye yiyo wa va pa nge, awo yiyo va sikisa mo nonkango doge.” Jesus kwa ruganesere edina lyaKarunga, Jehova, mosirugana sendi sokuzuvhisa ntani ga li tumbwire mouhunga, nye ga rugene yoyinzi kupitakana tupu kuhorwera edina lyaKarunga vapositoli vendi. Age ga nenepekere hena ediwo nekwato egano lyawo kuhamena yikara nositambo saJehova.

Jesus pokutanga Jehova asi Munene kumupita age, ta uyunga nelinunupiko asi: “Yeeyi nonkango edi wa pa nge, na di va pa. Awo yiyo va di tambura, ano yiyo va diva nawa-nawa asi ame koge na tunda, awo makura yiyo va pura asi, nyove wa tuma nge.”

Pokutura po malisigo pokatji kovasikuli vendi novantu nawopeke, makura Jesus ta kanderere asi: ‘Kapi na kukanderera uzuni, nye vaava wa pa nge yiwo nina kukanderera . . . Ame apa na kere nawo, ngani va kungu, . . . yiyo ngani va popere, nye kapi pwa zumbana nampili gumwe, ntudi googu munwezumbano no a huru,’ Judasa Isikalyoto. Posiruwo sina, Judasa kwa kere mosirugana sendi sokuhorora Jesus. Judasa kwa sikisire mo Matjangwa ga hana kuyidiva.

Jesus ta twikire kukanderera asi: “Uzuni wa va nyenga.” “Kapi na kukanderera asi o va guse mo mouzuni, nye asi o va kunge koMudona. Awo kapisi wouzuni, moomu na dira kukara ame gouzuni.” Vasikuli vaJesus kwa kara mouzuni, monkarapamwe zovantu ezi a pangere Satana, nye awo nkenye apa va hepa kulihangura ko kwawo nokoudinikarunga wawo.

Jesus ta twikire ko asi: “Va lipongwera nousili. Nonkango doge yido usili.” Apa Jesus kwa tumbwire Matjangwa goRuhebeli gokupongoka, aga ga twikilire kutemwinina asi “usili.” Nye eyi ga rongere varongwa vendi ntani neyi va ya tjenge mepitisiro lyompepo zokupongoka ngoMatjangwa goRugereka goSikriste nayo “usili.” Usili ou kuvhura kupongora muntu, mokurundurura eparu lyendi nawa-nawa ntani nokumuninka a tunde kouzuni.

Jesus ta kanderere asi: “Kapisi vaava velike nina kukandererera, ame kuna kukandererera nava ngava pulira nge morwanonkango dava.” Jesus kwa kandererere mo ava ngava kara vasikuli vendi wovagwavekwa ntani novarongwa vapeke wokomeho ava ngava pongaika ‘mosiunda simwe.’ Yisinke ga va hundililire po navenye ava?

“Navenye ava lize mutjima gumwe tupu, asi moomu wa kara ove Tate mwange, ame yiyo na kara moge, . . . asi va lize mutjima gumwe tupu, moomu twa kara ose gumwe tupu.” Jesus noGuhwe kapisi muntu gumwe tupu, nye awo kuliza moyininke nayinye. Jesus kwa kandererere asi vasikuli vendi nawo va hafere uumwe ou wokulifana yipo asi “uzuni u dive asi nyove wa tuma nge, yiyo wa va hara moomu wa hara nge.”

Mokukandererera po ava ngava kara vasikuli vendi wovagwavekwa, Jesus makura ta hundire Guhwe gemeguru. Yisinke ga hundilire? “Va kare nawo oku na kara, va mone eyererepeko lyange eli wa pa nge, yeeyi ove kwa hara nge, uzuni awo simpe nokuusita si,” kutanta asi komeho va rete oAdamu naEva vana vawo. Komeho zoyo, Karunga kwa here Munwendi thi a huru, ogu ga ya kere Jesus Kristusa.

Mokuhulisa ekanderero lyendi, Jesus ta nkondopeke hena asi: “Ame na va divisa edina lyoge, yiyo ngani li va divisa nokomeho, asi eharo eli wa hara nge nalyo li kare mwawo, name ni kare mwawo.” Vapositoli, mokulironga edina lyaKarunga kwa kwaterere mo mokuyadiva vene eharo lyaKarunga. Johanesa 14:1–17:26; 13:27, 35, 36; 10:16; Rukasa 22:3, 4; Exodus 24:10; 1 Vahompa 19:9-13; Jesaya 6:1-5; Vagarata 6:16; Episarome 35:19; 69:4; Yisewe 8:22, 30.

▪ Kupi oku ga zire Jesus, ntani elimbururo musinke ga gwene Tomasa kuhamena nzira ozo?

▪ Filipusa, kupitira mehundiro lyendi, yinke ga here nawa-nawa Jesus a mu likide?

▪ Morwasinke ya karera asi ogu ga mona Jesus ga mona hena Guhwe?

▪ Ngapi omu ngava rugana vasikuli vaJesus yirugana yoyinene kupita eyi ga rugene?

▪ Monkedi musinke Satana ga kere nayimwe si kwaJesus?

▪ Siruwoke ga tapekere Jehova sindjembere sosifanekeso, ntani siruwoke nangapi omu vapeke va ya kere ruha rosindjembere?

▪ Nomutayi dingapi sa ya kara naso sindjembere sosifanekeso?

▪ Yiyimwa musinke yokonomutayi ga hara Karunga?

▪ Ngapi omu natu kara vakaume vaJesus?

▪ Morwasinke wa nyengera uzuni vasikuli vaJesus?

▪ Erondoro musinke lyaJesus lya guvisire vapositoli vendi?

▪ Morwasinke ya va sumpililire vapositoli mokupura Jesus kuhamena oku ana kuza?

▪ Yisinke va dilire kukwata nawa egano vapositoli?

▪ Ngapi omu ga yi fanekesere Jesus asi ukaro wovapositoli weguwo ngau lisitunuka ehafo?

▪ Yisinke ga uyungire Jesus eyi ngava rugana vapositoli?

▪ Ngapi omu ga fundire Jesus uzuni?

▪ Monkedi musinke va mu pa Jesus “epangero lyovantu navenye”?

▪ Yisinke ayi tanta kudiva Karunga naMunwendi?

▪ Mononkedi musinke ga horwere Jesus edina lyaKarunga?

▪ Yisinke “usili,” ntani ngapi omu au ‘pongora’ Mukriste?

▪ Ngapi omu Karunga naMunwendi ntani novakareli wousili navenye va kara moumwe?

▪ Siruwoke va ‘sitire uzuni’?