Egaununo 119

Jesus tava mu twara kwaAnasi, ano konyima kwaKayifasa

JESUS kwa mu menge ngwendi mukorokotji nokumutwara kwaAnasi, mupristeli gomunene gwanare ogu ga fumanene. Anasi kwa kere mupristeli gomunene apa ga tetukisire Jesus varongi womaukarelikarunga pontembeli age simpe mumatigona gonomvhura 12. Konyima vana vamwe vaAnasi kwa ya kere moupristeli wounene. Ano siruwo esi Kayifasa, tamweyi zaAnasi, yige ga kere mupristeli gomunene.

Jesus kwa mu twere pomuhowo kembo lyaAnasi, nampo morwa kwa fumanene moukarelikarunga woVajuda. Pokumutwara pomuhowo kwaAnasi ya pere mpito mupristeli gomunene Kayifasa mokupongaika masimbi gokusika po-71 gompanguro zonene zoVajuda, kumwe nonombangi doyimpempa.

Makura mupristeli gomunene Anasi ta puragere Jesus kuhamena varongwa vendi ntani nerongo lyendi. Nye, Jesus ta mu limburura asi: “Ame ngani uyunga komeho zovantu navenye. Nkenye apa ngani rongo monosinagoge nomontembeli, omu ava pongo Vajuda navenye, ame kapi na uyunga yuma mokahorehore. Yinke ono kupulira nge? Pura ava va zuvha nonkango edi na va uyungira. Awo amesi va diva eyi na va tantera.”

Morweyi, mukareli gumwe, ogu ga sikamene pepi naJesus, ta mu kapura rukusi kosipara, ta tanta asi: “Yimo nye ava limburura mupristeli gomunene ngoso?”

Jesus ta mu limburura asi: “Nsene nina puka kuuyunga, tanta asi ngapi omu na puka. Ano nsene na hungike, yisinke ono toonene nge?” Konyima zeyi, Anasi ta tumu Jesus kwaKayifasa, age monomango.

Siruwo oso vapristeli navenye wovanene nomasimbi novalirongi womatjangwa tava tameke kuponga. Awo kwa pongerere membo lyaKayifasa. Kutulisa po mpanguro zangoso momasiku goPaska ayo kurwanesa veta zoVajuda. Nye eyi kapi ya konderere vampitisili womaukarelikarunga kositambo sawo sosidona.

Apa ga vhumbwire Jesus Rasarusa, masimbi kwa tokwere mokudipaga Jesus. Mazuva gavali tupu komeho zeyi, vampitisili womaukarelikarunga kwa lizuvhire mokukwata Jesus megombeko, va mu dipage. Gazadara tupu, age nare va mu tokwere nomfa komeho zompanguro zendi!

Awo kwa paparere nombangi edi da vhulire kugava umbangi woyimpempa yipo va vhure kupa Jesus unzoni. Nampili ngoso, kwato nombangi edi va gwene da lizire nomaumbangi gado. Moruhura, tapa wiza mbali tadi tanta asi: “Ose twa mu zuvhire, ta tanta asi, ‘Ame ntembeli ezi va tungisa komawoko, kuzizungurura tupu, makura ni tungire po hena nkwawo momazuva gatatu tupu, ezi va dira kurugana nomawoko.’”

Kayifasa ta pura Jesus asi: “Ove nelimbururo si lyeeyi nani kweyi vana kukurundaika ava vantu?” Nye Jesus teete. Nampili merundiro eli lyoyimpempa, nombangi kapi da lizire nomaumbangi gado, ano masimbi kwa lifire nomuga. Yipo nye mupristeli gomunene ga hetekerere ko nkedi zapeke.

Kayifasa ga divire omu Vajuda ava lizuvhu kuhamena nkenye ogu a litumbura asi MunwaKarunga. Poyihorokwa yivali, awo kwa tumbwire Jesus asi muswauli Karunga ogu ga fira kufa, ano rumwe kwa mu gazarere mepuko asi age kwa tente asi ga hetakana naKarunga. Kayifasa megombeko ta mu pura asi: “Ame tani ku ganesa kwaKarunga gomunamwenyo, o tu tantere asi, nyove Mesiyasa, MunwaKarunga, ndi?”

Yosili, Jesus kwa kere MunwaKarunga. Ano ngano ga mwenene teete ayo ngano kwa likidire asi age kuna kunyoka asi yige Kristusa. Yipo nye Jesus ga limbwilire noupenda asi: “Nhi, nyame, nye one ngomu mona MunwaMuntu, age ana hingire korulyo rwaKarunga Munankondo nadinye, age ta wiza pomaremo geguru.”

Kayifasa kwa zuvha tupu eyi makura ta taura yikoverero yendi oku ta zigire asi: “Ana swaura Karunga. Nombangi dasinke hena natu hepereni? Muna lizuvhire ko sa ntaantani omu ana swaura Karunga? Ngapi omu muna kugazara?”

Womosigongi somasimbi tava divisa asi: “Nomfa dina mu fire.” Makura tava tameke kumuninkagura, ntani awo kwa mu rundaikire hena yininke yoyinzi yokumurundira. Awo tava mu toona nonkusi nokumufizagera mazeze mosipara sendi. Vamwe tava mu manga sikayiwa komeho nokumutoona nononyongo nokumupura asi: “Mesiyasa, tu tantera asi, yilye ogu ana ku toona!” Yihorokwa eyi yonyanya ya hana asi yopaveta kwa horokere mompanguro zomasiku. Mateusa 26:57-68; 26:3, 4; Marukusa 14:53-65; Rukasa 22:54, 63-65; Johanesa 18:13-24; 11:45-53; 10:31-39; 5:16-18.

▪ Kupi oku va mu twere Jesus pomuhowo, ntani yinke ya ka mu horokerere oko?

▪ Kupi oku hena va mu twere Jesus, ntani nositambo musinke?

▪ Yinke ga rugene Kayifasa eyi ya ninkisire masimbi ga divise asi Jesus ana fire kufa?

▪ Yihorokwa musinke yonyanya ya hana asi yopaveta ya horokere mompanguro zomasiku?