Egaununo 120

Peturusa ta patana Jesus

APA varongwa va zumbire Jesus mosikunino saGesemani nokuduka noutjirwe, oPetursa naJohanesa konyima va ka sikamene. Nampo kwa kweme Jesus apa va mu twere membo lyaAnasi. Apa Anasi ga tumine Jesus komupristeli gomunene Kayifasa, oPeturusa naJohanesa makura tava mu kwama-kwamene koure, kwa kere nosinka seyi ya ka horokerere Hekurwawo, nye kwa tjilisire maparu gawo.

Apa va ka sikire merombe lyaKayifasa, Johanesa ga vhulire kuhwilira, morwa kwa lidivire nomupristeli gomunene. Peturusa kwa mu sigire ponze pevero. Nye konyima Johanesa ta tengura a ka uyunge nomutareli gomukadona gevero, makura ta ninki Peturusa a hwilire.

Ako kwa kere utenda, ano vakareli ntani novakwayita womupristeli gomunene tava hwameke mundiro. Peturusa nage ta zoto kumwe nawo siruwo esi va ndindilire yitundwamo yompanguro zaJesus. Mouzera womundiro, mutareli gevero ogu ga hwilidire Peturusa ta mu dimburura. Ta mu tantere asi: “Nove kumwe naJesus goMugalireya wa kere.”

Morwa woma asi vana mu dimburura, Peturusa ta patana asi kapi ga diva Jesus. Ta tanta asi: “Kapi na yi diva, hena kapi na kwata egano eyi ono kutanta.”

Makura Peturusa ta zi ta ka sikama pepi nevero. Nye, mukareli gumwe gomukadi ta mu dimburura nokutantera ava va sikamene po asi: “Ogu nage kumwe ga kere naJesus goMunasareta.” Peturusa ta patanesa hena komugano asi: “Ndangame ame, muntu ogu kapi na mu diva.”

Peturusa ta kara merombe, nokuhetekera kuvanda asi va ha mu dimburura. Nampo ga tukukire apa sa zigilire sikondomboro ngurangura zonene. Siruwo oso, age Jesus kuna kara mompanguro, ezi za karerere monzugo zekeguru lyerombe. Peturusa navamwe ava va kere pevhu va vhulire kumona nombangi dokulisiga-siga edi da rete maumbangi omu dina kuhwilira nokupwaga.

Apo kwa pitire po vili zimwe kutunda pena Peturusa va mu nongwenene asi mukwawo gwaJesus. Ano vena va sikeme po, tava hedere Peturusa, tava mu tantere asi: “Yosili, nove nyove mukwaawo, yeeyi ruuyungo roge yiro runa kukunongwenesa.” Gumwe mombunga kwa kere ekoro lyaMalikusa, ogu Petursa ga kamwine kutwi. Ta tanta asi: “Nani, kapi nina ku mono kumwe nendi mosikunino ove?”

Peturusa ta patana nononkondo asi: “Ndangame ame, muntu ogo kapi na mu diva.” Mokuhetekera ko va pure asi awo mepuko vana kara makura ta lifingilire nokugana, age kwa tente asi ngano va mu finge nsene nonkango dendi kapisi dousili.

Poopo ngoso age simpe kuna kupatana rwautatu, sikondomboro tasi zigi. Siruwo oso Jesus ogu ga kere keguru lyeharango ta piruka a tare Peturusa. Ano Peturusa ta diworoka nonkango daJesus edi ga mu tanterere asi: “Sikondomboro sa hana kuziga ruvali, ove nare ono patana nge rutatu.” Peturusa makura ta pwaga, ta ka lira makurulira, morwa ruguwo ronzo zendi zonene.

Ngapi omu ya horokere eyi? Mokumona asi pomuhowo Peturusa ga lihuguvarere asi ana pama pampepo, ngapi omu ga vhulire kupatana Jesus yikando yitatu? Peturusa kapi ga yi ndindilire. Usili kwa u pirwire ano Jesus kwa mu tere asi mukorokotji gomudona. Eyi ya kere youhunga kwa yi pirwire yi kare yepuko, ano gokupira nzo kwa mu tulire a kare munanzo. Makondjeso gosihorokwa kwa pukisire ulimburukwi waPeturusa, ano utjirwe wokutjira vantu kwa mu kwete. Nose kapisi yi tu horokere! Mateusa 26:57, 58, 69-75; Marukusa 14:30, 53, 54, 66-72; Rukasa 22:54-62; Johanesa 18:15-18, 25-27.

▪ Ngapi omu va hwililire oPeturusa naJohanesa merombe lyomupristeli gomunene?

▪ Yinke ya horokere mo membo, apa oPeturusa naJohanesa va kere merombe?

▪ Yikando yingapi sa zigilire sikondomboro ntani rungapi ga patanene Peturusa asi kapi ga diva Kristusa?

▪ Yinke ayi tanta asi Peturusa kwa fingilire nokugana?

▪ Yinke ya ninkisire Peturusa a patane asi kapi ga diva Jesus?