Egaununo 124

Piratusa ta gava Jesus makura tava mu twara

MORWA Jesus kapi ga ndundanene, Piratusa ta mu fire nkenda nokumufumadeka, eyi ya mu ninkisire a hetekere ko hena kumumangurura. Nye vapristeli wovanene tava handuka unene. Awo kwa tokwere asi kwato eyi nayi va donganesa sitambo sawo sosidona. Awo tava zigire asi: “Mu pampara [kositji], mu pampara [kositji]!”

Piratusa ta va limburura asi: “Mu guseni nyonevene, makura mu mu pampare [kositji].” (Mokulisiga neyi va uyungire nare, Vajuda nampo va kere nononkondo dokudipaga vakorokotji ava ngava tura nonzo dononene doukerelikarunga.) Makura, Piratusa ta hetekere ko hena sikando sautano mokudivisa asi Jesus kwato nzo, pokutanta asi: “Yeeyi ame kapi na gwana mo nzo mwendi.”

Apa Vajuda va mwene asi marundiro gawo gopapolitika kapi gana kupa Jesus usima, tava tengwire hena komarundiro goukarelikarunga kuhamena kuswaura Karunga aga va ruganesere pomuhowo pokupangura Jesus komeho zomasimbi. Awo tava mu tantere asi: “Ose kwa kara noVeta, ano moVeta zetu ngano ga fira kufa, yeeyi ga lininkisa asi age MunwaKarunga.”

Erundiro eli kwa kere epe kwaPiratusa, makura kwa mu ninkisire a kare nowoma unene. Piratusa ga nongwenene kupitira monkareso zaJesus nomonzodi zamukadendi, asi age kapi ga kere muntuuntu tupu. Nye, kuvhura a kare “MunwaKarunga” ndi? Piratusa ga divire asi Jesus Mugalireya. Nampo ga parukire nare meguru ndi? Makura Piratusa ta mu rugwidire hena mosipangwiro, ta mu pura asi: “Oku wa tunda kupi?”

Nye Jesus teete zendi. Karuwogona tupu ka pitire po kutunda apa ga tantererere Piratusa asi age hompa, nye Uhompa wendi kapisi wouzuni ou. Kwato hena efatururo ngano nali kara nokonda zoparugano. Nampili ngoso, Piratusa morwa kulinenepeka age kwa mu korere apa ga nyokere Jesus kumulimburura, makura kwa handukire unene asi: “Kapi ono kuuyunga name ove? Kapi ono diva asi, ame kwa kara nononkondo dokukusiga, ame hena kwa kara nononkondo dokukupamparera [kositji]?”

Jesus ta mu limburura nefumadeko asi: “Ngano kapi va ku pa nonkondo meguru, ove ngano kutupu nonkondo kwange.” Age kwa tembe asi Karunga kwa pa nonkondo vapangeli wovantu mokugendesa yinka yepevhu. Jesus ta gwederere ko asi: “Ano nye ogu ana gava nge koge, yige po gonzo zonene kupita zoge.” Mousili, mupristeli gomunene Kayifasa novakwawo zendi ntani naJudasa Isikaliyoto, navenye kwa tulire nzo zonene kupitakana Piratusa ogu ga tekwire Jesus momudona.

Morwa Piratusa ga kere nefumadeko kwaJesus ntani ga tjilire asi nampo age MunwaKarunga, ta hetekere ko hena mokumumangurura. Nampili ngoso, Vajuda kwa nyokerere Piratusa. Awo kwa rugurukire marundiro gawo gopapolitika, nokumutjilisa pokutanta asi: “Ove nsene o mu siga, ukwawo weni nohompa gwaRoma ngano ngau pira po, yeeyi nkenye ogu a lipaka uhompa, nkore zohompa gwaRoma.”

Nampili ngoso, Piratusa ta pwagesa hena Jesus ponze. Age ta uyunga hena asi: “Tareni, hompa gweni!”

“A tunde po, a tunde po, ka mu pampare [kositji]!”

Piratusa ta pura nowoma asi: “Ni ka pampare [kositji] hompa gweni?”

Vajuda kwa heperere mo mepangero lyoVaroma. Yosili, awo kwa nyengere epangero lyaRoma. Nye, nouyilipaki, vapristeli wovanene tava tanta asi: “Ose kutupu hompa, gwetu ose hompa gwaRoma a huru.”

Pokutjira kuzumbanesa sipundi sendi soupolitika nounekuto wendi, Piratusa moruhura ta gwire mompangera zoVajuda zonyanya. Makura ta va pe Jesus. Vakwayita tava hutura Jesus erwakani lyopulipuli nokumudwareka hena yikoverero yendi. Makura Jesus tava mu twara va ka mu pampare kositji, age tava mu ninki a lisimbire sitji samwene.

Azo kwa kere ngurangura zezuva 14 lyaNisani mEtitano; nampo kwa kere pepi nomutwekatji. Jesus kapi ga rere kutundilira ngurangura zEtine, ntani kwa hepere komaudigu aga ga ligwanekerere nago. Yipo nye, Jesus ga rorokere komudigo gositji sina. Apa va ligwanekerere naSimoni gumwe goMukirene gomoAfrika, tava mu sininike a simbire po Jesus sitji sendi. Ngomu va zire, vantu wovanzi, kukwatera mo vakadi, kwa mu kweme oku tava tendana va lire Jesus.

Jesus ta pirukire kovakadi ta va tantere asi: “One vakadona vaJerusarema, mwa ha lira nge ame, lilireni nyamweni novana veni. Yeeyi mazuva taga wiza, apa ngava tanta asi: ‘Verago nonganze nomazimo aga ga dira kuhampuruka nomavere aga ga dira kuzamweka rumwe.’ . . . Yeeyi omu vana kurugana ngesi sitji sositarara, sosikukutu nye yireru tupu?”

Jesus kwa hetakanesere muhoko goVajuda kositji, ogu gwa kere simpe kuna tarara morwa ekaropo lyaJesus neli lyava va pulire mwendi. Nye apa va gusire mo Jesus novasikuli vendi, muhoko goVajuda gwa fire pampepo, ngwendi sitji sokukukuta. Apo pwa kere eguwo lyenene apa vakwayita woVaroma va kere ngwendi vapanguli vaKarunga mokuzonagura po muhoko goVajuda. Johanesa 19:6-17, hetakanesa NW; 18:31; Rukasa 23:24-31, hetakanesa NW; Mateusa 27:31, 32; Marukusa 15:20, 21.

▪ Marundiro musinke va tulire po vampitisili womaukarelikarunga kuhamena Jesus apa marundiro gawo gopapolitika ga dilire kupa Jesus usima?

▪ Morwasinke Piratusa ga karerere noutjirwe?

▪ Wolye va tulire nzo zonene kweyi ya horokerere Jesus?

▪ Moruhura, ngapi omu vapristeli va ninkisire Piratusa a va pe Jesus va ka mu dipage?

▪ Yinke ga tanterere Jesus vakadi ava va mu lilire, ntani yinke ga tembe pokutumbura sitji ‘sositarara’ makura tasi ‘kukuta’?