Egaununo 130

Jesus pEkurudiva lyaGalireya

VAPOSITOLI kwa tengwilire koGalireya, ngamoomu ga va tanterere Jesus. Nye kapi va divire asi yinke nava ka rugana ko. Peturusa makura ta tantere Tomasa naNatanayera naJakopo namumbyendi Johanesa ntani novapositoli vamwe vavali asi: “Tani zi ni ka tege nomfi.”

Awo tava mu tantere asi: “Nose tuna hara tu ze noge.”

Masiku ogo nayimwe si va kwatere. Eyi kwa sire, Jesus makura ta sikama konontere, nye varongwa kapi va mu dimbwilire. Age ta zigire asi: “Vamati, muna kara ko nasakulya?”

Awo tava mu limburura asi: “Hawe, kutupu.”

Age ta va tantere asi: “Tegeni ekwe korulyo rowato, makura mu kwate.” Awo makura tava li tege, makura tali va vhuru kulikoka mo morwaunzi wonomfi.

Johanesa ta zigire asi: “Ani one, Hompa.”

Ano apa ga yi zuvhire Peturusa, ta dwara sikoverero sendi sokontunda, yeeyi ga kere muhere-here, makura ta vatukire momema. Makura ta zogo konyara nometa dokusika ko-90 a ze kononkenkera dediva. Nye varongwa vakwawo tava wiza nowato wawo, nokukoka ekwe nonomfi dalyo.

Apa va zaukire, tava mono mundiro gomakara guna gehe, apo pana kara nomfi nomungome. Jesus ta va tantere asi: “Ponomfi edi muna kwata ntaantani, reteni po dimwe.” Peturusa makura ta perama mowato, ta kokere ekwe konze. Alyo kwa zulire nomfi dononene dokusika pe-153!

Jesus ta va tantere asi: “Wizeni, mu ya lihake.”

Povarongwa vendi nagumwe si ga lidivire momeho, a mu pure asi: “Nyovelye?” yeeyi va divire asi, Jesus. Esi kwa kere sikando sautano-nauvali esi ga monekere Jesus. Nye oru kwa kere rwautatu oru ga monekere Jesus povapositoli vendi ngombunga. Jesus ta wiza ta gusa mungome, tagu va pe, nonomfi nado ngosikwawo.

Apa va mene kulya, Jesus ta tara konomfi dononene edi va kwete makura ta pura Peturusa asi: “Simoni zaJohanesa, wa hara nge kupita omu [wa hara eyi ndi, NW]?” Apa Jesus kwa tembe asi: Ove wa hara sirugana soge sokukwata nomfi kupitakana sirugana esi nina kuwapaikire ndi?

Age ta mu limburura asi: “Nhi, Hompa, wa diva asi ame na ku hara.”

Jesus ta mu tantere asi: “Lisa nonzwigona dange.”

Ta mu pura hena rwauvali asi: “Simoni zaJohanesa, enye wa hara nge sili?”

Age ta mu limburura asi: “Nhi, Hompa, wa diva asi ame na ku hara.”

Age ta mu tantere asi: “Kunga nonzwi dange.”

Age makura ta mu pura rwautatu asi: “Simoni zaJohanesa, nye wa hara nge sili ndi?”

Peturusa makura ta guwu. Age nampo kwa gazarere asi Jesus kapi ga huguvarere ulimburukwi wendi. Morwa apa Jesus va mu pangwire, Peturusa kwa mu patanene yikando yitatu asi kapi ga mu diva. Makura ta mu tantere asi: “Hompa, ove kwa diva nayinye, wa diva hena sa, asi na ku hara.”

Jesus ta mu tantere asi: “Lisa nonzwi dange.”

Jesus kwa ruganesere Peturusa ngosihonena mokulikida kovarongwa vakwawo eyi ga va harerere va rugane. Konyima zokaruwogona, ga va sigire nokuza meguru, ano kwa va harerere mokupitisira ava ngava wiza mohambo zaKarunga zononzwi.

Ngamoomu tupu Jesus va mu menge nokumudipaga morwa ga rugene sirugana esi ga mu pangerere Karunga, Jesus ta likida asi Peturusa nage nga ligwanekera noudigu wokulifana. Jesus ta tanta asi: “Apa wa kere mumati, ngo lidwareke nyamoge, makura to zi oku ngo hara. Nye nsene ngo kurupa, mawoko goge ngo gonyonona, a ku mange muntu nagepeke, makura nga ku tware oku ngo dira kuhara.” Nampili ngomu ngava mu dipaga morwa epuro lyendi, Jesus ta tumangeda Peturusa asi: “Kwama nge!”

Peturusa makura ta piruka, ta tara Johanesa makura ta pura asi: “Hompa, ogu age eyi ngayi mu gwana yinke?”

Jesus ta mu tantere asi: “Nsene ni hara asi a kare tanko dogoro noku ngani wiza, ove hena mbili zayo zasinke? Ove kwama nge!” Makura nkango ezi tazi lihanene mokatji kovarongwa asi, mupositoli Johanesa kapi nga fa. Nye, ngamoomu ga ya yi fatwilire mupositoli Johanesa konyima, Jesus kapi ga tembe asi age ngano kapi nga fa. Nye Jesus kwa tente tupu asi: “Nsene ni hara asi a kare tanko dogoro noku ngani wiza, ove hena mbili zayo zasinke?”

Konyima Johanesa ga ya nongwenene hena asi: “Poyili hena yininke yoyinzi eyi ga ruganene Jesus. Nye nganosi nayinye kwa tundilira ko kuyitjanga simwe-simwe, amesi uzuni mudima ngano kapi nkare u vhure kukwata nobuke edi nkare va tjange.” Johanesa 21:1-25; Mateusa 26:32; 28:7, 10.

▪ Yinke ya likidire asi vapositoli kapi va divire eyi ngano va ka rugene mo moGalireya?

▪ Ngapi omu vapositoli va dimbwilire Jesus pEkurudiva lyaGalireya?

▪ Yikando yingapi ga monekere Jesus kutundilira pevhumbuko lyendi?

▪ Ngapi omu ga nkondopekere Jesus eyi ga harerere vapositoli vendi va rugane?

▪ Ngapi omu ga likidire Jesus nkedi ezi nga ya fa Peturusa?

▪ Yinke eyi ga uyungire Jesus kuhamena Johanesa va dilire kukwata nawa egano sinzi sovarongwa?