Egaununo 7

Eyi ga ruganene Karunga mokuparura vantu

1, 2. (a) Ngapi omu ga yi dimbwilire Mpitisili govakwayita efere goVaroma asi yilye MunwaKarunga? (b) Morwasinke Jehova ga pulisilire Jesus a fe?

KOSITENGUKO simwe sopomangenyena konyara nomvhura 2 000 da ka pita, mupitisili govakwayita efere goVaroma ga mwene vagara vatatu omu vana kufa kuliwora nomfa dokukora. Mukwayita gwina kwa tarwilire po gumwe gwawo—Jesus Kristusa. Jesus kwa mu pamparerere kositji. Mutwekatji kwa kere mundema siruwo apa da hederere nomfa dendi pepi. Apa ga fire, evhu kwa kankamene unene, ano mukwayita ta zigire asi: “Yosili nani MunwaKarunga ga kere.”—Marukusa 15:39.

² MunwaKarunga! Mukwayita gwina ga kere mouhunga. Age kwa kere noumbangi kosihorokwa somulyo unene esi sa pilire kuhoroka po rumwe pevhu. Poyiruwo yopomuhowo Karunga mwene ga tumbwire Jesus asi Munwendi ogu ga hara. (Mateusa 3:17; 17:5) Morwasinke Jehova ga pulisilire asi Munwendi a fe? Morwa ezi kwa kere nkedi zaKarunga mokuparura vantu kononzo nomonomfa.

KWA MU HOROWERERE KOSITAMBO SOKULIKARERA

3. Morwasinke ya waperere asi Karunga a horowore Munwendi a huru kosirugana sokulikarera kovantu?

³ Moomu twa lironga pomuhowo mobuke ezi, Jesus kwa kere po pomuhoverera komeho a ya kare muntu. Ngava mu tumbura asi “Munwa gelike a huru gwaKarunga” morwa age Jehova gelike ga mu sitire. Konyima Karunga yipo ga ya ruganesere Jesus mokusita yininke nayinye yapeke. (Johanesa 3:18; Vakorosi 1:16) Jesus kwa here unene vantu. (Yisewe 8:30, 31) Kwato sitetu asi Jehova kwa horowere Munwendi gelike a huru a ya rugane sitambo sokulikarera apa va zire vantu konhi zompanguro zokutwaredera konomfa!

4, 5. Yisinke za horwere Bibeli kuhamena Ruvharo rwouMesiyasa komeho Jesus a ka wize apa pevhu?

⁴ Apa ga divisire efutiso kwaAdamu naEva ntani kwaSatana mosikunino saEdeni, Karunga kwa uyungire koMuzowoli gokomeho asi ‘ruvharo.’ Ruvharo oru ngaru ya mana po yininke yoyidona eyi ga retesa po Satana Muzonaguli, “ezoka lyanare.” Mousili, Ruvharo oro rwetumbwidiro ngaru ka myona Satana ntani navenye ava ava mu kwama.—Genesis 3:15; 1 Johanesa 3:8; Ehororo 12:9.

⁵ Momauye ga ka pita, Karunga ga horwere nakauke-nakauke rorunzi kuhamena Ruvharo, oru ava tumbura hena asi Mesiyasa. Ngwendi moomu vana yi likida mo kakarata pepenuno 37, mauporofete gomanzi ga gava mafatururo kuhamena yuma yoyinzi yeparu lyendi apa pevhu. Ngosihonena, age ngano a pite momahepeko gomanene mokusikisa mo sirugana sendi mositambo saKarunga.—Jesaya 53:3-5.

MORWASINKE MESIYASA GA FILILIRE

6. Mokukwama Ndaniyera 9:24-26, yisinke ngano ga ya sikisire mo Mesiyasa nangapi?

⁶ Uporofete ou wa kara mwaNdaniyera 9:24-26 kwa pumbire asi Mesiyasa—Mugwavekwa gwaKarunga—ngano ga ya sikisire mo sitambo sosinene. Age ngano ga wizire pevhu a ya ‘mangurure mbunga kononzo nokoudona. Nonzo ngava di dongonona po; makura uhungami wanarunye ngava u ture po.’ Mesiyasa ngano ga ya hanagwire po mpanguro zokutwaredesa konomfa kovantu wokuhuguvara. Nye ngano ngapi omu ga ya yi rugene eyi? Uporofete kuna kuzeresa asi age ngano “ngava mu dipaga.”

7. Morwasinke Vajuda ngava zambere nonzambo doyikorama, ntani yisinke ya fanekesere?

⁷ Vaisraeli wopomuhowo va kere nediwo komagano gedongweneno po nonzo. Moukareli wawo moVeta zaKarunga ezi ga gavere kwaMosesa, nkenye apa ngava zamba nonzambo doyikorama. Eyi ya diworokesere muhoko gwaIsraeli asi vantu va hepa yuma mokuvagusira po nonzo dawo, ndi kudikudumika. Mupositoli Paurusa ga supipikire magano ngwendi ngesi: “Ano nedongonono lyononzo si kupira po nsene kapi pana kutjikira honde.” (Vahebeli 9:22) Vakriste kapi va kara konhi zoVeta zaMosesa noyihepwa yazo, ngwendi nonzambo. (Varoma 10:4; Vakorosi 2:16, 17) Awo va yi diva hena asi nonzambo doyikorama kapi tadi gava egusiropo lyokukarerera lyanarunye kononzo. Nonzambo edi kwa fanekesere nzambo zomulyo unene—ezi zaMesiyasa, ndi Kristusa. (Vahebeli 10:4, 10; hetakanesa Vagarata 3:24.) Nye mpamwe to pura: ‘Ya kere sili nawa-nawa hepero asi Mesiyasa ga hepere kufa?’

8, 9. Yininke musinke yomulyo eyi va zumbanesere oAdamu naEva, ntani ngapi yirugana yawo ya kundamene ruvharo rwawo?

⁸ Yimo, Mesiyasa ga hepere kufa yipo vantu va vhulire kuparuka. Mokuyikwata egano, twa hepa kugazara konyima kosikunino saEdeni nokukambadara kukwata egano unene eyi va zumbanesere oAdamu naEva apa va rwanesere Karunga. Awo mwenyo gwanarunye kwa gu va tulikilire! Ngovana vaKarunga, awo kwa bodjanene hena malikwatakano gokuvyukilira kumwe nendi. Nye kutunda apa va nyokere epangero lyaJehova, yipo va zumbanesere nayinye eyi ano yiyo va retere nonzo nonomfa kovantu.—Varoma 5:12.

⁹ Eyi kwa kere ngwendi asi vakurona vetu wopomuhowo kwa zumbanesere emona lyenene yipo va litulire mo vene momakongo gomanene. Adamu naEva kwa rundwilire makongo gena koruvharo rwawo. Morwa ose kapi va tu hampuruka wokusikilira mo nokupira nonzo, yipo nye nkenye gumwe gwetu kuzona nokufa. Nsene tatu vere ndi tatu tanta yininke yokukoresa eyi tuna hara asi kuvhura tu yi wapukurure, ose kutambura yitundwamo yokounzoni wetu wokupinga—wepiro kusikilira mo lyopasintu. (Varoma 7:21-25) Ehuguvaro lyetu lyelike lyeli asi mokutengwida eyi ga zumbanesere Adamu. Nye ose nokuvhura si kugwana eparu lyomuntu gokusikilira mo. Mokumona asi vantu navenye wokupira kusikilira mo kuzona, yiyo atu gwana mo natuvenye nomfa, kapisi mwenyo.—Varoma 6:23.

10. Yisinke ya hepere po mokuranda va tengwide eyi ga zumbanesere Adamu?

¹⁰ Nye, ngano kwa vhulire mpamwe ngano va zambere po sininke mokusinta keparu eli ga zumbanesere Adamu ndi? Mpango zaKarunga zokuhungama kwa kuhepa ehetakano, “momwenyo tamu piti mwenyo mukwawo.” (Exodus 21:23) Mwenyo gwa hepere kuguzamba mokufuta mwenyo ogu va zumbanesere. Kapisi nkenye mwenyo ngano gwa gwanekere. Episarome 49:7, 8 kwa kutanta kuhamena vantu wokupira kusikilira mo: “Muntu nokuvhura si a zowore mukwawo, nokuvhura si hena kufutira Karunga yizoweseso, yeeyi mfeto zoukaro womuntu nene unene. Yokuvhura kufuta age nokugwaneka si.” Ano nkareso kuna kara nye za hana mulyo? Hawe, narumwe si.

11. (a) Yisinke zina kutanta nkango “sizoweseso” moRuhebeli? (b) Yilye gelike ga vhulire kumangurura vantu, ntani morwasinke?

¹¹ MoRuhebeli nkango “sizoweseso” kwa kulikida kweyi yokufuta mokukamangurura nkwate ntani kuna kulikida hena kehetakano. Ntudi muntu geparu lyokusikilira mo gelike ga vhulire kuzamba nzambo zokuhetakana ezi ga zumbanesere Adamu. Konyima zaAdamu, muntu gokusikilira mo ogu va ya hampurukire pevhu kwa kere Jesus Kristusa gelike. Bibeli kumutumbura Jesus asi “Adamu gomoruhura” ntani kwa kutupingidira asi Kristusa ‘ogu ga ligava mwene, a kare sizoweseso sokuzowora vantu navenye.’ (1 Vakolinte 15:45; 1 Timoteusa 2:5, 6) Posiruwo oso Adamu ga rundwililire nomfa kovana vendi, Jesus age upingwa wendi mwenyo gwanarunye. MoVakolinte Wokuhova 15:22 kwa kuzeresa mo asi: “Ano moomu ava fu vantu navenye morwa yiwo ruvharo rwaAdamu, yimo ngorooro hena ngava va tura navenye mwenyo morwa yeeyi awo kwa likwatakana naKristusa.” Eyi ya mu wapera nye kumutumbura Jesus asi “Guhya Gwanarunye.”—Jesaya 9:6, 7.

NGAPI OMU VA SI FUTIRE SIZOWESESO

12. Siruwoke Jesus ga ya kere Mesiyasa, ntani nzira musinke zeparu ga ya kwamene konyima?

¹² Mepemba lyomo-29 S.N. Jesus kwa zire kekoro lyendi Johanesa a ka mu kuhwe ano apa ngesi yipo ga lilikidire mwene mokurugana eharo lyaKarunga. Posiruwo sina Jehova yipo ga gwavekere Jesus nompepo zokupongoka. Jesus yipo nye ga kere Mesiyasa, ndi Kristusa, ogu ga gwavekere Karunga. (Mateusa 3:16, 17) Ano Jesus yipo ga varekere nosirugana sendi sonomvhura ntatu noukahe. Age kwa gendagwire mosirongo sendi oku ta udisa Uhompa waKarunga nokupongaika vasikuli wovahuguvali. Moomu tupu va yi pumba, mapataneso taga vareke kuvhuka.—Episarome 118:22; Yirugana 4:8-11.

13. Yihorokwa musinke eyi ya twaredesere Jesus konomfa ngomulimburukwi?

¹³ Jesus ga hana woma ga horwere uyilipaki wonompitisili doukarelikarunga, awo yiyo va kambadarere asi va mu dipage. Moruhura awo tava tura po eliwapaikiro lyedona eli lya kwatererere mo ehororo nekwatero lya hana uhunga nompanguro za hana paveta nefutiso lyoyimpempa kuhamena epitisiro. Jesus kwa mu toonene nokumufizira nokumuswaura nokumusepura nongoreka ozo va tambesere asi sipapa sendi si gerauke. Mupangeli goVaroma Pontiusi Piratusa yige ga mu pangwililire dogoro konomfa dokositji sokukoresa. Age kwa mu pamparere kositji nokumutulika ko ana vyukilire. Nkenye kuhesera kokukora, eyi kwa kwete novili dononzi komeho zokuza a ka fe. Momahepeko nagenye, Jesus ga sikisire mo ulimburukwi wokusikilira mo kwaKarunga.

14. Morwasinke Karunga ga pulisilire asi Munwendi a hepe nokufa?

¹⁴ Mo-14 Nisan 33 S.N. Jesus yipo ga geve mwenyo gwendi asi “gu kare sizoweseso sovanzi.” (Marukusa 10:45; 1 Timoteusa 2:5, 6) Kutundilira meguru, Jehova ga vhulire kumona Munwendi ogu ga hara omu ana kuhepa nomu ana kufa. Morwasinke Karunga ga pulisilire yininke yoyidigu asi yi horoke? Age kwa yi pulisilire eyi morwa age kwa hara vantu. Jesus kwa tente asi: “Yeeyi Karunga kwa here uzuni unene-nene, yiyo ga u pere Munwendi gelike a huru, asi nkenye ogu a mu pura a dire kuzonauka, nye a kare nomwenyo gwanarunye.” (Johanesa 3:16) Nomfa daJesus tadi tu rongo hena asi Jehova yige Karunga gouhungami wasikilira mo. (Deuteronomium 32:4) Vamwe kutetuka pamwe asi morwasinke Karunga ga dilire kurundurura magano gendi gouhungami aga ga hepere asi mwenyo nomwenyo nokusensa po ndando zonzira zononzo daAdamu. Konda kuna kara asi Jehova nkenye apa kukara ponoveta dendi nokudilimburukwa nokudisikisa mo, nampili yi pure elizambero lyenene kwendi.

15. Yisinke ga rugene Jehova, mokumona asi ngano ya kere uhahungami mokupulisira asi ekaropo lyaJesus va li hagekese po narunye?

¹⁵ Uhungami waJehova wa hepere hena asi nomfa daJesus da hepa kukara yitundwamo yerago. Kwanayinye eyi, uhungami ngano wa vhulire kusika mo asi Jesus ogu muhuguvali ngano kwa mu sigililire a rare narunye monomfa? Kapisi yimo! Matjangwa goRuhebeli ga pumbire mukareli gwaKarunga gokulimburukwa kapi ngava mu sigilira mo montoko. (Episarome 16:10; Yirugana 13:35) Age kwa rere monomfa maruha gomazuva gatatu, ano konyima Jehova Karunga yipo ga mu pindwire koufe a kare muntu gopampepo gononkondo.—1 Peturusa 3:18.

16. Yisinke ga ka rugene Jesus apa ga tengwire meguru?

¹⁶ Ponomfa dendi Jesus kwa gavere eparu lyendi lyopasintu narunye. Apa va mu pindwililire eparu lyemeguru, age kwa kere mpepo zokugava mwenyo. Ntani hena, apa Jesus ga rondere a ze mevango lyokupongokerera napenye, age kwa ka likwatakanene kumwe naGuhwe geharo ano age yiyo ga Mu gaverere mulyo geparu lyendi lyokusikilira mo lyopasintu. (Vahebeli 9:23-28) Mulyo geparu lina lyondiro gwa vhulire kuguruganesa kukarera po vantu wokulimburukwa. Yisinke yina kutanta eyi koge?

SIZOWESESO SAKRISTUSA NOVE

17. Ngapi omu natu vhura kugwana edongwenenopo kupitira monzambo zosizoweseso zaKristusa?

¹⁷ Gazara pononkedi ntatu apa ono gwana mo ngesi uwa mosizoweseso sonzambo zaKristusa. Zopomuhowo, azo kureta edongwenenopo lyononzo. Kupitira mepuro mohonde zatjika zaJesus, twa kara “nemanguruko kupitira mosizoweseso,” nhi, “nonzo detu yiyo va di dongonona po.” (Vaefeso 1:7, NW) Nampili tuna rugana nzo zondigu, kuvhura tu hundire kwaKarunga a tu dongwenene po medina lyaJesus. Nsene asi ose tatu litezurura nawa-nawa, Jehova ta ruganesa mulyo gonzambo zosizoweseso zaMunwendi kwetu. Karunga kutudongwenena po nokutupa etungiko lyezwi lyewa lyomomutjima mevango lyokutukokera mefutiso lyonomfa eli ali tundu kononzo.—Yirugana 3:19; 1 Peturusa 3:21.

18. Ngapi omu za gava nzambo zaJesus ehuguvaro kwetu?

¹⁸ Zauvali, nzambo zosizoweseso zaKristusa kugava edi kwetu kehuguvaro lyokomeho. Mupositoli Johanesa kwa mwene memoneko asi “emukurumbunga lya hana kuvhura kuvara” ngava ka paruka kouhura woudigu wounene ou una kuwiza wonkareso zoyininke eyi yanaina. Morwasinke ngava va parwira awo siruwo oso Karunga nga zonagura po wovanzi? Muengeli kwa tantererere Johanesa asi emukurumbunga “va kuhwa yikoverero yawo va yi zeresesa kohonde zoNzwigona,” Jesus Kristusa. (Ehororo 7:9, 14) Sinene tupu tatu tura epuro lyetu mohonde zaJesus Kristusa nokuparuka mokuliza kumwe noyihepwa yaKarunga, ngano ngatu kara tuna zere kosipara saKarunga ntani ngatu kara nehuguvaro lyomwenyo gwanarunye.

19. Ngapi omu za likida nzambo zaKristusa asi age naGuhwe va ku hara?

¹⁹ Zautatu, nzambo zosizoweseso yiso silikido sosinene-unene seharo lyaJehova. Nomfa daKristusa kwa kere po yirugana yoyinene-unene yivali yeharo mehistoli lyouzuni: (1) Eharo lyaKarunga lyokutuma Munwendi a ya tu fire; (2) Eharo lyaJesus lyokuhara mwene a ya lizambere ngosizoweseso. (Johanesa 15:13; Varoma 5:8) Nsene tatu likida nawa-nawa epuro, eharo eli lina wapere nye nkenye gumwe gwetu. Mupositoli Paurusa kwa tantere asi: “MunwaKarunga, ogu ga hara nge, yiyo ga gavera nge mwenyo gwendi panzambo.”—Vagarata 2:20; Vahebeli 2:9; 1 Johanesa 4:9, 10.

20. Morwasinke twa hepera ose kuyomberesa epuro lyetu lyomonzambo zosizoweseso zaJesus?

²⁰ Yipo, natu likidira rupandu rwetu keharo eli ga likidire Karunga naKristusa kupitira mokuyomberesa epuro lyetu lyomonzambo zosizoweseso zaJesus. Eyi tayi twaredere komwenyo gwanarunye. (Johanesa 3:36) Nye eparuro lyetu kapisi yizo konda zomulyo zeparu lyaJesus nonomfa dendi apa pevhu. Hawe, konda zonene yido nompata dononene po danavenye. Ngwendi moomu natu ka yi mona megaununo lyokukwama ko, nompata dina nkenye gumwe gwetu dina mu kundama, morwa ayo kuna kulikida asi morwasinke Karunga ga pulisira asi udinikarunga noruhepo yi twikire siruwo sosire mouzuni ou.

Morwasinke ga hepererere Jesus kufa mokuparura vantu?

Ngapi omu va si futire sizoweseso?

Pononkedi musinke o gwana mo ove uwa mosizoweseso?

[Full-page picture on page 67]