Sirongwa 3

Yilye Jesus Kristusa?

Morwasinke ava mu tumbwire Jesus asi “mbeli” zaKarunga? (1)

Morwasinke ava mu tumbwire asi “Nkango”? (1)

Morwasinke ga wizilire Jesus pevhu ngomuntu? (2-4)

Morwasinke nga ruganene yitetu? (5)

Yinke nga ka rugana Jesus komeho? (6)

1. Jesus kwa parukire meguru ngomuntu gopampepo komeho zokuwiza pevhu. Yige ga hovere kusita Karunga, yipo ava mu tumbwire asi “mbeli” zaKarunga. (Vakorosi 1:15; Ehororo 3:14) Jesus yige gelike Munwa ogu ga sitire Karunga pwagelike. Jehova kwa ruganesere Jesus “ngonkurungu” mokusita yininke nayinye yapeke yemeguru neyi yepevhu. (Yisewe 8:22-31; Vakorosi 1:16, 17) Karunga ga mu pere situmbukiro sokutwara mbudi zendi kwava wopeke. Yiyo nye ava mu tumbwire Jesus asi “Nkango.”—Johanesa 1:1-3; Ehororo 19:13.

2. Karunga kwa tumine Munwendi pevhu pokurundwilira eparu lyendi momukoga gwaMariya. Jesus kapi ga kere noguhwe wopasintu. Yiyo ga dililire kupinga nzo ndi kudira kusikilira mo. Karunga kwa tumine Jesus pevhu monokonda ntatu: (1) Mokuyaturonga usili kuhamena Karunga (Johanesa 18:37), (2) mokuyatulisa po ulimburukwi a ya tu sigire sihonena tu si kwame (1 Peturusa 2:21), ntani (3) nomokuyagava mwenyo gwendi kwetu tu manguruke kononzo nokonomfa. Morwasinke ya karerere hepero?—Mateusa 20:28.

3. Pokudira kulimburukwa kompangera zaKarunga, muntu gokuhova Adamu ga ya rugene eyi azi tumbura Bibeli asi “nzo.” Karunga yipo ga mu pangwilire konomfa. (Genesis 3:17-19) Kapi ga sikire pontambo ezi ga mu harerere Karunga yiyo ga pilire kusikilira mo. Kanunu-kanunu ta ya kurupa nokufa. Adamu ga rundwilire nzo kovana vendi navenye. Yiyo nye nose atu kurupire nokuvera ntani nokufa. Ngapi ngano vantu va vhulire kuvaparura?—Varoma 3:23; 5:12.

4. Jesus kwa kere muntu gokusikilira mo ngwendi Adamu. Jesus kwa kere noulimburukwi kwaKarunga nampili momaheteko gomanene, kapisi ngwendi Adamu. Yipo nye ga vhulire kugava eparu lyendi lyokusikilira mo mokufuta nzo zaAdamu. Eyi yiyo azi tumbura Bibeli asi “sizoweseso.” Yipo nye asi vana vaAdamu kuvhura kuvamangurura mo mompanguro zonomfa. Navenye ava ava tura epuro mwaJesus nonzo dawo kuvhura kudivadongwenena po ntani nokukagwana mwenyo gwanarunye.—1 Timoteusa 2:5, 6; Johanesa 3:16; Varoma 5:18, 19.

5. Apa ga kere Jesus pevhu nga verura vaveli nokukutika wonzara nokumwenekeda makundungu. Ga pindwire hena vafe. Morwasinke nga ruganene yitetu? (1) Nga fire nkenda vantu wokuhepa ntani ga here kuvavatera. (2) Yirugana yendi yoyitetu kwa likidire asi age MunwaKarunga. (3) Ayo kwa likidire eyi nga ka ruganena vantu wovalimburukwi apa nga ka pangera ngaHompa pevhu nalinye.—Mateusa 14:14; Marukusa 2:10-12; Johanesa 5:28, 29.

6. Jesus kwa fire makura Karunga ga mu vhumbwire ngosisitwa sopampepo, ntani ga tengwire meguru. (1 Peturusa 3:18) Kutundilira opo, Karunga ga mu tura a kare Hompa. Ntaantani Jesus nga ka guse po udinikarunga noruhepo narunye pevhu eli.—Episarome 37:9-11; Yisewe 2:21, 22.

[Mafano pepenuno 7]

Yirugana yaJesus kwa kwaterere mo kuronga nokurugana yitetu ntani nokugava mwenyo gwendi kwetu