Sirongwa 5
Yisinke sitambo saKarunga kevhu?
Morwasinke ga sitilire Jehova evhu? (1, 2)
Morwasinke evhu lina dilire kukara ngesi paradisa? (3)
Yisinke ngayi ka horokera vantu wovadona? (4)
Yisinke nga ka ruganena Jesus komeho vaveli? vakurupe? vafe? (5, 6)
Yinke wa hepa kurugana mokukalihameka mo momatungiko gokomeho? (7)
1. Jehova kwa sitilire evhu eli yipo vantu va li hafere nokukara po narunye. Age kwa here pevhu va tunge po vantu wovahungami woruhafo. (Episarome 115:16; Jesaya 45:18) Evhu kapi ngava li zonagura; ngali karerera narunye.—Episarome 104:5; Muudisi 1:4.
2. Karunga komeho zokuunga muntu, kwa gusire ruha rumwe rwevhu nokuruninka paradisa zongwa. Ta ru tumbura asi sipata saEdeni. Yimo ga tulire mugara nomukadi wokuhova, oAdamu naEva. Karunga kwa va pangerere mokukara novana nokuzwida evhu nalinye. Kanunu-kanunu ngano va ninkire evhu nalinye paradisa.—Genesis 1:28; 2:8, 15.
3. OAdamu naEva va zonene pokuteza po veta zaKarunga mowina. Yipo Jehova ga va gusire mo mosipata saEdeni. Va zumbanesere paradisa. (Genesis 3:1-6, 23) Nye Jehova kapi ga divara sitambo sendi sevhu eli. Ga tumbwidira mokulininka paradisa, omu vantu ngava ka paruka narunye. Ngapi omu nga ka yi rugana eyi?—Episarome 37:29.
4. Evhu eli komeho zokukakara paradisa, vantu wovadona va hepa kukavagusa po. (Episarome 37:38) Eyi ngayi ka horoka poHarumagedoni, yita yaKarunga yokuhagekesa po udinikarunga. Makura Satana ngava ka mu manga nomumvho 1 000. Eyi kutanta asi kwato mudinikarunga ngava ka hupisa po. Vantu vaKarunga velike ngava ka paruka.—Ehororo 16:14, 16; 20:1-3.
5. Makura Jesus Kristusa nga ka pangera evhu nalinye ngaHompa nomumvho 1 000. (Ehororo 20:6) Nakauke-nakauke nga ka gusa nonzo momagazaro nomomarutu getu. Ngatu ka kara vantu wokusikilira mo ngwendi moomu va kere oAdamu naEva komeho zokuzona. Makura kapi ngaku ka kara hena mauvera noukurupe nonomfa. Vantu wokuvera ngava ka veruka ntani vakurupe ngava ka kara hena vadinkantu.—Joba 33:25; Jesaya 33:24; Ehororo 21:3, 4.
6. Mepangero lyaJesus lyoNomumvho Eyovi, vantu wovalimburukwi ngava ka rugana mokukaninka evhu nalinye paradisa. (Rukasa 23:43) Ntani mamiliyona govafe ngava ka va vhumbwira keparu pevhu. (Yirugana 24:15) Nsene ngava ka rugana eyi ga hepa ko Karunga kwawo, ngava ka twikira kukaparuka pevhu narunye. Nsene kapi ngava ka yi rugana, ngava ka va zonagura narunye.—Johanesa 5:28, 29; Ehororo 20:11-15.
7. Sitambo saKarunga sekevhu ngasi ka sika mo. Ono hara kukalihameka mo momatungiko aga gokomeho ndi? Nsene yimo, wa hepa kutwikira kulironga kuhamena Jehova nokulimburukwa nompango dendi. Kuza komapongo koSinyanga soUhompa soNombangi daJehova ngayi ku vatera mokuyirugana.—Jesaya 11:9; Vahebeli 10:24, 25.
[Efano pepenuno 10]
Va zumbanesere paradisa
[Mafano pepenuno 11]
Konyima zoHarumagedoni, evhu ngava ka li ninka paradisa