Sirongwa 9
Vakareli vaKarunga va hepa kukuhuka
Morwasinke natu karera tuna kuhuka mwanayinye? (1)
Yinke ayi tanta kukuhuka pampepo? (2) pamukaro? (3) pamagazaro? (4) parutu? (5)
Mbuuyungiso musinke zokunyata natu nyokera? (6)
1. Jehova Karunga kwa kuhuka ntani kwa pongoka. Kuna kundindira vakareli vendi va kuhuke pampepo nopamukaro nopamagazaro ntani noparutu. (1 Peturusa 1:16) Pwa hepa elituromo pokukara ono kuhuka kosipara saKarunga. Ose kwa tunga mouzuni wokunyata. Ose hena kukondja nedowo lyetu lyokuhara kurugana udona. Nye twa ha hageka.
2. Ukuhuki wopampepo: Nsene twa hara kukarera Jehova, kapi tatu twikire kukwaterera kwankenye marongo ndi nompo doukareli woyimpempa. Twa hepa kupwaga mo moukareli woyimpempa ntani nokuukwatesa ko si mwankenye omu. (2 Vakolinte 6:14-18; Ehororo 18:4) Nsene tuna lirongo usili kuhamena Karunga, twa kona kutakamesa va dire kutupukisa vantu owo ava rongo yimpempa.—2 Johanesa 10, 11.
3. Ukuhuki wopamukaro: Jehova kuna hara vakareli vendi va kare ngwendi Vakriste wousili poyiruwo nayinye. (1 Peturusa 2:12) Age kumona nayinye eyi atu rugana, nampili yomokahore-hore. (Vahebeli 4:13) Twa hepa kunyokera ruhonda ntani noyirugana yimwe yokunyata youzuni ou.—1 Vakolinte 6:9-11.
4. Ukuhuki wopamagazaro: Nsene tu gazara yokukuhuka, mukaro gwetu nago ngagu kuhuka. (Vafilipi 4:8) Nye nsene tu gazadara yokunyata, ngayi twaredesa koyirugana yoyidona. (Mateusa 15:18-20) Twa kona kunyoka yilihafeso eyi ayi nyateke nondunge detu. Kuvhura tu zwide magano getu nomagazaro gokuzera pokulironga Nonkango daKarunga.
5. Ukuhuki woparutu: Vakriste va hepa kuzeresa marutu noyidwara yawo morwa kwa karera po Karunga. Twa hepa kulikuhwa mawoko getu konyima zokulivatera, ntani twa hepa kugakuhwa komeho zokulya ndi zokuwapaika nondya. Nsene kapi wa kara nonzugo zokulivaterera, wa hepa kuvhumbika nze zoge. (Deuteronomium 23:12, 13) Kukuhuka parutu kureta ukanguki wouwa. Embo lyoMukriste lya hepa kulizeresa monda noponze. Li kare sihonena sosiwa monkarapamwe.
6. Mbuuyungiso zongwa: Vakareli vaKarunga narunye va uyunge usili. Vanayimpempa kapi ngava ka za moUhompa waKarunga. (Vaefeso 4:25; Ehororo 21:8) Vakriste nokutuka si. Awo kapi ava purakene ndi va uyunge nomuteu dokunyata ndi yisimwitira yoyidona. Morwa mbuuyungiso zawo zongwa, nkareso zawo kulisiga nava wopeke koyirugana nokosure ntani nokovamaparambo.—Vaefeso 4:29, 31; 5:3.
[Mafano pepenuno 18, 19]
Vakareli vaKarunga va hepa kukuhuka mwanayinye