Sirongwa 7
Erondoro kweyi ya pita
Jehova kapi nga ka pulisira vantu wovadona va ka zonagure Paradisa. Vakaume vendi velike yiwo ngava ka parukira momwina. Yisinke ngayi ka horokera vantu wovadona? Mokulironga elimbururo, tarurura kesimwititi lyousili lyaNowa. Nowa kwa parukire nomvhura mayovi gana ka pita. Age kwa kere mugara gomuwa ogu nga kambadara nkenye apa unene kurugana eharo lyaJehova. Nye vantu wopeke pevhu ngava rugana yininke yoyidona. Yipo nye Jehova ga tantererere Nowa asi Age ta ka reta ruhanzo ru ya zonagure po vantu navenye wovadona. Age kwa tanterere Nowa a tunge emuwato yipo nga pire kufa age nepata lyendi apa ngaru wiza Ruhanzo.—Genesis 6:9-18.
Nowa nepata lyendi kwa tungire emuwato. Nowa kwa rondwere vantu asi Ruhanzo taru ka wiza, nye kapi va mu purakenene. Awo kwa twikilire kurugana yininke yoyidona. Konyima apa lya pwire emuwato, Nowa kwa gusire yikorama a yi ture memuwato, ntani nage nepata lyendi nawo tava hwilire mo. Jehova yipo ga retere ekundungu lyenene. Mvhura kwa rokere mazuva 40 mutenya nomasiku. Mema kwa zulire evhu nalinye.—Genesis 7:7-12.
Vantu wovadona va zumbanesere nomwenyo dawo, nye Nowa nepata lyendi awo va parukire. Jehova ga va retere vandjewa-ndjewa kupita moRuhanzo va ze mevhu lyokukuhuka lya hana udona. (Genesis 7:22, 23) Bibeli kuna kutanta asi simpe hena siruwo kuna kuwiza apa Jehova nga zonagura po hena owo vana kunyoka kurugana yoyiwa. Vantu wovawa kapi ngava ka va zonagura. Awo ngava ka paruka narunye moParadisa pevhu.—2 Peturusa 2:5, 6, 9.
Naina vantu wovanzi kuna kurugana yininke yoyidona. Uzuni kuna zura maudigu. Jehova kuna kutuma Nombangi dendi rorunzi va rondore vantu, nye wovanzi po simpe kapi vana hara kupurakena kononkango daJehova. Awo kapi vana hara kurundurura nonkedi dawo. Awo kapi vana hara kutambura eyi ana kutanta Karunga yokuhamena uhunga noudona. Yisinke ngayi ka horokera vantu ava? Ngava ka lirundurura ezuva limwe ndi? Wovanzi kapi ngava ka lirundurura. Siruwo ngasi wiza apa ngava ka zonagura po vantu wovadona ntani kapi ngava paruka hena.—Episarome 92:7.
Evhu kapi ngava ka li zonagura; ngava ka li rugana paradisa. Owo ngava kara vakaume vaKarunga ngava ka paruka narunye moParadisa pevhu.—Episarome 37:29.