Omu no wapukurura nkedi zoge zokuzogera nava wopeke

AYO kukurerupira mokuzogera kumwe nava wopeke ndi? Kovantu wovanzi, kutameka nzogera, unene po nomuntu ogu va dira kudiva, kukara udigu. Vantu vangoso kuvhura va lizuvhe nomuga. Awo kuvhura va lipure asi: ‘Yokuhamena kosinke nani vhura kuuyunga? Ngapi omu nani vhura kutameka nzogera? Ngapi omu nani vhura kuninka nzogera zi twikire?’ Nye vantu wokupira nomuga kuvhura kuuyunga unene kupitakana vakwawo. Awo va hepa kulironga kupurakena nokupa vakwawo mpito zokuuyunga. Yipo nye natuvenye, tu kare asi nomuga kuuyunga ndi hawe, twa hepa kutunga po nkareso zokuzogera.

Tameka kutunga po nkareso ezi membo

Mokuwapukurura nkedi zoge zokuzogera, tameka kutunga po nkareso ezi membo. Nzogera zokutunga kuvhura kugwederera unene koruhafo rwemepata.

Nsapi zomulyo po zokutwaredesa konzogera zangoso kuna kara kufira sinka unene wopeke. (Deut. 6:6, 7; Yis. 4:1-4) Apa atu likida efirosinka, ose kuuyunga nokupurakena apa vapeke ava hara kuuyunga. Mulyo kukara nomagano gokutunga aga no vhura kuuyunga. Nsene twa kara nelikwamo lyankenye apa lyereso nelirongo lyoBibeli, ngatu kara neyi yoyinzi yokuvhura kuzogera novakwetu. Kuruganesa nawa kabukegona Konakona Matjangwa nkenye ezuva kuvhura kupindura nzogera. Nampo mutenya katu hafere nzogera zongwa zomoyirugana yokuzuvhisa ndi katu resa yininke yokuvhura kuronga ndi yokuzoresa. Yi kare nkareso zetu kuzogera yininke eyi kumwe nepata. Eyi ngayi tu vatera hena mokuzogera kumwe novantu ava va dira kukara mepata lyetu.

Kuzogera kumwe nava twa dira kudiva

Vantu wovanzi kuvadigopera mokutameka nzogera nomuntu ogu va dira kudiva. Nye morwa eharo lyawo lyokuhara Karunga novakwawo, Nombangi daJehova kulitura mo unene mokulironga omu nava zogera nava wopeke yipo va ligavere usili woBibeli kumwe nawo. Yisinke nayi vhura kukuvatera mokuwapukurura moruha oru?

Mpango ezi va tumbura moVafilipi 2:4 kwa kara nomulyo. Kuna kutukorangeda asi ‘walye atu lipakere mbili nyamwetu nyoselike, nye atu pakere hena novakwetetu mbili.’ Yi gazara monkedi zangesi: Nsene kapi wa gwanekera nogo muntu rumwe, age nga ku tara ngomugeni. Ngapi omu no mu tekura yipo a manguruke? Emenyamenyo lyewa nemororo lyosiundambo kuvhura kuvatera. Nye simpe yinzi yokuhepa kugazudurura ko.

Ove nampo kuna donganesa magazaro gendi. Nsene o heteka kuuyunga eyi ono kugazara wa hana kukara nosinka kuhamena eyi ana kugazara, kuvhura a ku limburure nawa ndi? Yisinke ga rugene Jesus apa ga gwanekerere nomukadi goMusamaliya pondjombo? Magano gomukadi kwa kere kokuvheta mema. Jesus kwa tatekerere nzogera zendi nomukadi komema ntani konyima ta zi hamesere konzogera zopampepo.—Joh. 4:7-26.

Nsene asi o munomeni, nove kuvhura o kwate egano eyi vana kugazara vantu. Ogo muntu kuna hafa ndi kuna guwu? Age mukurupe, ntani sigurani ndi? Pana kara umbangi una kulikida asi mwa kara vanona omo membo ndi? Kuna kumoneka asi ogo muntu ngawo ndi age kukondja mokugwana yihepwa yemeparu? Membo mwa kara yifuwiso ndi yuma yongandi yokulikida asi age kwa hamena koukerelikarunga? Nsene no tura memororo lyoge yininke yangoso, muntu ogo kuvhura a ku tare asi nove kwa hara yininke eyi ga hara.

Nsene o dira kumona muntu kosipara nye o zuvhe tupu ezwi lyendi kupitira mevero vana pata, yinke no vhura kugazara? Ayo kuvhura kulikida asi age kuparuka nowoma. Nampo kuvhura o zogere nendi kuhamena woma.

Komavega gamwe ayo ureru kutameka nzogera nomuntu pokumutantera ko yokuhamena kwanyamoge, ngwendi ntundiliro zoge, ndi eyi ono ya mu dingwire kembo lyendi, ndi eyi wa pulira mwaKarunga, ndi eyi wa tamekera kulironga Bibeli, ndi omu za ku vatera Bibeli. (Yirug. 26:4-23) Yimo, ayo ya hepa kuyirugana nonondunge ntani nositambo souhunga. Eyi kuvhura ngayi ninkise muntu a ku tantere yokuhamena kwanyamwendi ntani nomu a tara yuma.

Monompo dimwe, kutambura vageni kwa kara ngonkareso zawo. Vantu kuvhura va ku zigide noumanguruki membo nokuhingira. Konyima zokuhingira, nsene o pulida ukalinawa wemepata ntani nokulitura mo mokupurakena kekumbururo lyawo, mwenya embo kuvhura nage a hafere kupurakena eyi no uyunga. Vantu vamwe kulikida elituromo lyenene movagenda, yipo nye elikundo kuvhura li kare lyere. Kupitira momusingu, awo kuvhura va ya yi dimburure asi eyi va hara nove yiyo wa hara. Yangesi kuvhura kutwaredera konzogera zongwa zopampepo.

Ngapi nye nsene momukunda gweni kwa kara mo vantu wovanzi ava ava uyunga eraka lyapeke? Ngapi omu no vhura kuuyungisa vantu ava? Nsene o lironga nampili nonkango dimwe dokukunda momaraka ogo gamwe, ngava yi dimburura asi ove kuna kulikida elituromo mwawo. Eyi kuvhura kugava mpito mokuyazogera nawo hena.

Omu no twikira nzogera

Mokuninka nzogera zi twikire, likida elituromo mweyi ana kuuyunga ogo muntu. Mu korangeda mokupwagesa magano gendi nsene ana hara kuyirugana. Kupura mapuro gomawa kuvhura kuvatera. Kupura kuhamena mutaro gwendi mulyo unene, morwa ayo ngayi mu ninkisa a uyunge yoyinzi kupitakana tupu kulimburura asi nhi ndi hawe. Pasihonena, konyima zokutumbura udigu womomukunda gwawo, kuvhura o mu pure asi: “Yisinke ono kugazara kayi retesere po ukaro ou?” ndi “Yisinke ono kugazara nava vhura kurugana mokuukohonona po?”

Konyima zokupura epuro, purakena nawa kelimbururo lyendi. Likida elituromo lyoge lyosili pokutanta ko yuma ndi pokungumauka ko komutwe ndi pokuyilikida kosipara. Wa ha mu donganesa. Nonondunge dina manguruka, gazadara ko kweyi ana kuuyunga. ‘Genderera kuzuvha, nye mokuuyunga to liwora.’ (Jak. 1:19) Apa no limburura, yi likida asi ove sili kuna purakene eyi ana uyunga.

Nampili ngoso, diworoka asi kapisi nkenye gumwe na vhura kulimburura mapuro goge. Kovantu vamwe kuvhura tupu va kapwide-kapwide ndi va menyune. Vamwe kuvhura tupu va uyunge asi nhi ndi hawe. Ya ha ku nyegenyesa. Lididimikira. Wa ha sininika nzogera. Nsene ana hara kupurakena, ruganesa mpito mokuligavera nendi magano gopampepo gokutunga. Konyima zosiruwo, kuvhura nga tameke kukutara ngakaume kendi. Makura nampo nga ku mangurukira mokupwagesa malizuvho gendi koge.

Ngomu ono kuuyunga novantu, kondjera mokutulisa po matengwiropo. Nsene muntu ta pura mapuro gomanzi, limburura ko gamwe ano siga ko limwe ndi gavali nokuyagalimburura sikando sokukwama ko apa ngomu ya zogera. Mu tantera asi ngo rugana epaparo makura ngo ya mu pe malimbururo. Nsene kapi ana ku pura mapuro, kuvhura o hagese nzogera zeni pokumupura epuro eli nali pindura elituromo lyendi. Mu tantera asi ngo ya li zogera sikando sokukwama ko. Magano gomanzi kuvhura kugagwana mobuke Reasoning from the Scriptures nomobuke Yinke azi rongo Bibeli sili?, ntani nomoyifo yoyipe yoRuhungu ntani yoAwake!

Nsene novapuli vakweni ono kara

Apa o gwanekere nomupuli mukweni sikando sokuhova, ove kulipa sidigo mokumudiva ndi? Ndi ove kusikama nokumwena teete? Eharo lyokuhara vanavazinyetu lya hepa kututumangeda tu hare kuvadiva. (Joh. 13:35) Ngapi omu no vhura kutameka? Kuvhura o tumbure edina lyoge ntani nokumupura nage edina lyendi. Kumupura kuhamena omu ga gwene usili kuvhura kutwaredesa konzogera zongwa ntani ngayi mu vatera mu lidive. Nampili eyi ono kuuyunga kapi yina kuzuvhika nawa, elituromo lyoge nali mu ninkisa a dimburure asi ove kumupakera mbili, ano oyo yiyo yomulyo po.

Yisinke nayi gwederera konzogera zongwa kumwe nagumwe gomombungakriste zeni? Likida elituromo lyosili mwendi ntani nemepata lyendi. Nsene epongo lina pu, kuvhura o tumbure magano gomawa ono hafere. Eyi kuvhura kureta uwa kwanamuvenye. Kuvhura o tumbure egano lyomulyo lina kara mosifo sosipe soRuhungu ndi moAwake! Ayo kapisi o yi rugane monkedi zokulimonekesa ndi o heteke ediwo lyendi. Yi rugana mokuligavera nendi eyi wa haferere. Kuvhura o uyunge kuhamena siuyungwa esi nga ka gava gumwe gweni moSikora zoUkareli nokulipaapa magano. Kuvhura hena kusimwitira yilimonena yomoyirugana yokuzuvhisa.

Yimo, elituromo lyetu movantu narunye kutwaredesa konzogera kuhamena vantu, eyi ava rugana neyi ava uyunga. Monzogera zetu kuvhura mu hamene ngwaya. Eyi tuna kuuyunga kuna kara yokutunga ndi? Nsene tu sikisa mo mapukururo gomoNonkango daKarunga ntani li tu tumangede eharo lyokuhara Karunga, mbuuyungiso zetu ngazi kara zokutunga.—Yis. 16:27, 28; Efe. 4:25, 29; 5:3, 4; Jak. 1:26.

Komeho zokulihameka moyirugana yokuzuvhisa, ose kuliwapaikira. Mokulifana, kuvhura o wapaike ko egano eli no vhura kukazogera kumwe novakaume woge. Ngomu ono kuresa nokuzuvha yininke yokuhafesa, didilika magano gomulyo aga ono hara kukaligavera nava wopeke. Konyima zosiruwo, ngo kara neyi yoyinzi yokuvhura kuhorowora. Pokurugana eyi ngayi ku vatera mokuzogera yoyinzi novantu mevango lyokuzogera tupu yihorokwa yemeparu. Kwanayinye, ngano mbuuyungiso zoge zi gave umbangi omu da kara Nonkango daKarunga nomulyo koge!—Epis. 139:17.