Kukorangeda nokunkondopeka vapurakeni

YI KARE asi maudigu musinke vana kuligwanekera nago, vakareli vaKarunga va hepa kugwana makorangedo mombungakriste. Mokuyisikisa mo oyo, unene po vakuronambunga va hepa kudivilisa asi yiuyungwa nomavyukiso gawo ga hepa kukara gokukorangeda. Vakuronambunga va hepa ‘kukara ngwendi utjiliro wompepo ndi ngwendi uvando womvhura, ngwendi nomukuro domema mosirongo somburundu, ngwendi mundwire gemanya lyenene lyosirongo senota.’—Jes 32:2.

Nsene o mukuronambunga, yiuyungwa yoge kugava epwizumukiso ntani nehengagwido ndi? Ayo kupameka owo vana kukondja mokukarera Jehova ndi? Ayo kuvankondopeka yipo va lididimikire mokurugana mpango zaKarunga nampili vantu va dire kulikida elituromo ndi va va rwanese? Ngapi nsene asi vapurakeni woge vamwe kuna dompo nomutjima ndi kuna kuligwanekera nomaudigu goyikweparu ndi nomauvera gokudira uhaku? Kuvhura o ‘koreke’ vanavanyoko nononkango doge.—Joba 16:5.

Ruganesa mpito ezi ono kara nazo ngomuuyungi o vatere vanavanyoko va kare nehuguvaro ntani nokugwana nonkondo kwaJehova nokomawapaiko aga ga tura po.—Rom. 15:13; Efe. 6:10.

Diworokesa vapurakeni woge eyi ga rugana Jehova. Nkedi zongwa zokukorangeda kuna kara povalikida omu Jehova ga vatera vantu vendi momaudigu mosiruwo sanare.—Rom. 15:4.

Jehova kwa tanterere Mosesa a ‘koreke nokukorangeda’ Josuwa komeho Vaisraeli va hwilire moSirongo sEtumbwidiro, esi posiruwo sina da tungire nomuhoko dononkore. Ngapi omu ga yi rugene oyo Mosesa? Age Josuwa pweli, Mosesa kwa diworokesere muhoko nagunye yininke eyi ga va ruganenene Jehova ngomu va tundire moEgipite. (Deut. 3:28; 7:18) Mosesa hena kwa tumbagwire mafundo aga ga va pere Jehova koVaamoli. Makura Mosesa ta korangeda Josuwa asi: “Kara nononkondo noupenda.” (Deut. 31:1-8) Nsene kuna kukorangeda vanavanyoko, ove kuvavatera va gwane enkondopeko pokudiworoka eyi ga va ruganena nare Jehova ndi?

Poyiruwo yimwe, vamwe kuvakundama unene maudigu dogoro tava lizuvhu asi kapi ngava gwana matungiko goUhompa. Va diworokesa asi matumbwidiro gaJehova ngaga ka sika mo.—Jos 23:14.

Moyirongo yimwe vanavazinyetu kuvasilika mapangero asi va ha zuvhisa mbudi zongwa. Moyihorokwa yangoso, vakuronambunga kuvhura va vatere vapuli vakwawo va gwane enkondopeko moyihorokwa yovapositoli vaJesus Kristusa. (Yirug. 4:1–5:42) Ntani kutumbura omu Karunga ga gendesere yihorokwa, ngomu va yi tjanga mobuke zaEsitera, ngayi korangeda vanavazinyetu.

Poyiruwo yimwe vamwe kuwiza komapongo gomombungakriste, nye kapi ava tura po ezokomeho. Kuvhura va lizuvhe asi Karunga kapi nga va gusira po morwa eparu lyawo lyanare kwa kere lyedona unene. Nampo kuvhura o simwitire omu Jehova ga tekwire Hompa Manase. (2 Hist. 33:1-16) Ndi kuvhura o uyunge kuhamena vantu womoKolinte zanare ava va tjindjire maparu gawo, nokukara Vakriste, ntani Karunga kwa va tere asi vahungami.—1 Kol. 6:9-11.

Vamwe kuna kulizuvha asi maudigu vana kuligwanekera nago kuna kulikida asi Karunga kapi ana va hara ndi? Kuvhura o va diworokese eyi ga ligwanekerere nayo Joba ntani nomu va mu tungikire morwa ga kwaterere ulimbukwi wendi kwaJehova. (Joba 1:1-22; 10:1; 42:12, 13; Epis. 34:19) Vahengagwidi woyimpempa vaJoba kwa mu tanterere asi age kwa zonene yiyo ga ligwanekerere nomaudigu gena. (Joba 4:7, 8; 8:5, 6) Mokulisiga, apa ga korekere vasikuli ntani ‘nokuvakorangeda va kare mepuro,’ Paurusa naBaranabasa kwa uyungire asi: “Mokuza moUntungi waKarunga, nyose kupita momaudigu gomanzi ntani.” (Yirug. 14:21, 22) Nampili naina, kuvhura o nkondopeke owo vana kupita momaudigu pokutumbura asi Vakriste navenye va hepa kulididimikira maudigu ntani elididimiko lyawo mulyo kosipara saKarunga.—Yis. 27:11; Mat. 24:13; Rom. 5:3, 4; 2 Tim. 3:12.

Korangeda vapurakeni woge va gazare ko nonkedi omu Jehova ga sikisa mo matumbwidiro gendi momaparu gawo. Va ninka va diworoke omu Jehova ga va pakera mbili pwavene, ngomu ga yi tumbwidira. MEpisarome 32:8, tatu resa asi: “Ame tani ku rongo nzira ezi no genda; ngani ku pukurura oku tani ku takamesa.” Pokuvatera vapurakeni woge va diworoke omu Jehova ga va vyukisa ndi ga va nkondopeka, ngo va vatera va dimburure omu Jehova a va pakere mbili ntani asi nga va vatera mwankenye udigu ou nava ligwanekera nawo ngesi.—Jes. 41:10, 13; 1 Pet. 5:7.

Likida ruhafo mweyi ana kurugana Karunga ngesi. Nsene kuna kukondja mokukorangeda vanavanyoko, tumbura eyi ana kurugana ngesi Jehova. Kuuyunga yininke eyi monkedi zokulikida asi ayo kukuhafesa kuvhura yi ninkise vapurakeni woge va kare nomalizuvho gokulifana monomutjima dawo.

Gazadara ko omu Jehova a tu vatere tu lididimikire maudigu gemeparu. Age kutulikida nzira zongwa zeparu. (Jes. 30:21) Age kutufatwilira konda zeyi una karere po ukorokotji nouhahungami noruhepo nomauvera nonomfa ntani kututantera omu nga ka yi hagekesa po nayinye. Age kwa tu pa vanavazinyetu wokuhara mouzuni mudima. Ga tu pa uhwi wekanderero. Ga tu pa situmbukira sokukara Nombangi dendi. Ga mahura meho getu tu mone asi Kristusa va mu pa sipundipangero meguru ntani asi mazuva gouhura wouzuni ntaantani ga hage po.—Ehor. 12:1-12.

Mokugwederera ko komauwa ogo kuna kara mapongo gomombungakriste noyigongi. Nsene to uyunga kuhamena mawapaiko aga gomawa monkedi ezi azi likida rupandu kwawo, ngo nkondopeka etokomeno lyawo mokudira kuncenuna kuyaponga kumwe novanavazinyetu.—Heb. 10:23-25.

Marapoto aga aga gava umbangi omu Jehova ana kutungika elituromo lyetu moyirugana yokuzuvhisa nago kukorangeda. Mouye wokuhova, apa Paurusa naBaranabasa va kere morugendo rokuza koJerusarema, ‘awo kwa hafesere vanavazina unene’ pokusanseka yokuhamena elitezururo lyovapagani. (Yirug. 15:3) Nove kuvhura o hafese vanavanyoko pokuvasimwitira yihorokwa yokuvhura kuvatunga.

Makorangedo gamwe kuwiza po apa ava va vatere va dimburure mulyo gweyi vana kurugana. Va pandadeka kweyi vana kulihameka mo moyirugana yokuzuvhisa. Pandadeka owo ava dili kulihameka mo unene morwa ukurupe nouvera nye simpe kulikida ulimburukwi pokulididimikira. Va diworokesa asi Jehova kapi a divara yirugana yawo, neharo lyokufumadeka edina lyendi. (Heb. 6:10) Epuro eli ava heteke kwa kara ngwendi siweka somulyo unene. (1 Pet. 1:6, 7) Vanavazinyetu va hepa kuyivadiworokesa eyi.

Uyunga nomalizuvho kuhamena ehuguvaro lyokomeho. Matumbwidiro goyininke eyi yina kuwiza kuna kara ntundiliro zonene zekorangedo kwanavenye ava va hara Karunga. Nampo sinzi sovapurakeni woge kuzuvha nkenye apa nonkango edi detumbwidiro. Nye rupandu oru no likida apa no uyunga kuhamena matumbwidiro aga, kuvhura yi ninkise vapurakeni va kare nehuguvaro kesikomo lyomatumbwidiro aga ntani nokuninka nomutjima dawo di zure rupandu. Kuruganesa eyi wa lironga moSikora zoUkareli kuvhura kukuvatera mokuyirugana oyo.

Jehova mwene yige mukorangedi nomukoreki govantu vendi. Nye simpe, kuvhura o ruganene nendi mokuuyunga kuhamena matungiko ogo. Nsene kuna kuuyunga mombungakriste, ruganesa nawa ezi mpito mokuuyunga kuhamena matungiko ogo.