Egaununo 5

“Ogu yige Munwange”

APA ava rugana vanona yininke yoyiwa, ava ava va pakere sinka kuvahafesa. Apa munona gomukadona ndi gomumati a rugana yininke yoyiwa, guhya kumumulikangangera asi: “Ogu yige munwange.”

Jesus kurugana narunye eyi ayi hafesa oGuhwe. Yipo nye oGuhwe ava mu likangangere. To diworoka eyi va rugene ezuva limwe oGuhwe apa Jesus ga kere kumwe novasikuli vendi vatatu ndi?— Karunga kwa uyungire kutundilira meguru mokuvatantera asi: “Ogu yige Munwange ogu na hara, ga za nge komutjima.”—Mateusa 17:5.

Jesus kuhafera nkenye apa mokurugana yininke eyi ayi hafesa oGuhwe. Wa yi diva asi morwasinke? Morwa age kwa hara sili oGuhwe. Nsene muntu a rugana yininke morwa yeeyi tupu asi ga hepa kuyirugana, ayo kumukarera udigu. Nye nsene ta yi rugana neharo, tayi mu karere ureru.

Nampili komeho a wize pevhu, Jesus kwa kere neharo lyokurugana nkenye eyi va mu tanterere oGuhwe. Age nga yi rugana morwa ga hara oGuhwe, Jehova Karunga. Jesus kwa kere nevango lyewa meguru kumwe noGuhwe. Nye Karunga kwa pere Jesus sirugana sokulikarera. Mokurugana sirugana sina, Jesus ga hepere kutunda mo meguru. Age ga hepere kuyamuhampuruka ngomukeke pevhu. Jesus ga kere neharo lyokuyirugana eyi morwa Jehova ga yi mu harerere asi a yi rugane.

Mokuyamuhampuruka ngomukeke pevhu, Jesus ga hepere kukara nozina. Ono diva asi wolye va kere ozina?— Edina lyawo Mariya. Jehova kwa tumine muengeli gwendi Ngabiliyera a tunde meguru nokuyauyungisa Mariya. Ngabiliyera kwa mu tanterere asi age nga kara nomunona gomumati. Munona ngava mu ruka Jesus. Ano yilye ngano nga kara guhya munona?— Muengeli kwa tente asi Guhya munona nga kara Jehova Karunga. Eyi yiyo ngava mu tumbwira Jesus asi MunwaKarunga.

Omu ono kugazara ngapi omu ga lizuvhire Mariya?— Age ga uyungire asi: “Kapi nina hara kukara zinyaJesus” ndi? Hawe, Mariya ga liwapaikilire mokurugana eyi ga here Karunga. Nye ngapi ngano omu MunwaKarunga gemeguru nava mu hampuruka ngomukeke pevhu? Ngapi omu ehampuruko lyaJesus lya lisiga nehampuruko lyovakeke navenye vapeke? Wa yi diva ndi?—

Karunga kwa ungire vakurona vetu wokuhova, oAdamu naEva, yipo va vhure kuligwanekera panyama. Konyima, mukeke kuvhura kutameka kuyakura mezimo lyozina. Vantu kuuyunga asi esi kuna kara sitetu! Nina si huguvara asi nove no yi kwatesa ko.

Apa ngesi Karunga kwa rugene sitetu sosinene. Age kwa gusire eparu lyaMunwendi meguru nokulitura mezimo lyaMariya. Karunga kapi ga yi rugene komeho zeyi, ntani kapi ga yi rugana hena kutunda opo. Ngoyitundwamo yositetu esi, Jesus kwa tamekere kukura mezimo lyaMariya, ngwendi moomu ava kuru vakeke vapeke momazimo govazinya vawo. Konyima zoyo, Mariya ta kwara Josefa.

Apa va ka dingwire oMaria naJosefa sitata saBeterehema, yipo sa sikire mo siruwo sokuhampuruka Jesus. Nye amo kwa zulire mo vantu. Amo kapi mwa kere nampili nzugo zokukara oMariya naJosefa, yipo nye va hepere kukakara mohambo. Omo yimo ga hampurukilire Mariya, ano Jesus tava mu tura mekungu lyokulira yimuna, ngomu ono kuyimona pefano.

Yininke yokuhafesa kwa horokere momasiku aga va mu hampurukire Jesus. Pepi naBeterehema, muengeli kwa monekerere vasita vamwe. Age kwa va tanterere asi Jesus kwa kere muntu gomulyo. Muengeli ta tanta asi: ‘Tareni, ame kuna kumutantera mbudi zongwa ezi ngazi retera ruhafo vantu. Gaaga masiku ngesi aga vana mu hampurukire ogu nga zowora vantu.’—Rukasa 2:10, 11.

Muengeli ta tantere vasita asi awo nava ka gwana Jesus moBeterehema, age kuna mu rangeke mekungu lyokulira yimuna. Va liharuka ko, vaengeli vapeke vemeguru tava lipakerere kumwe nomuengeli gokuhova mokuhamberera Karunga. Vaengeli kwa dimbire asi: ‘Efumano kwaKarunga, mpora pevhu kovantu ava ga hara!’—Rukasa 2:12-14.

Apa va tundire po vaengeli, vasita tava zi koBeterehema nokukagwana Jesus. Awo tava ka tantera oJosefa naMariya yininke nayinye yoyiwa eyi vana zuvhu. Gazadara ko tupu koruhafo oru ga kere naro Mariya morwa ga pulire mokukara zinyaJesus!

Konyima, oJosefa naMariya kwa twere Jesus kositata saNasareta. Oko yiko ga ka kulilire Jesus. Apa ga kulire, ta tameke nosirugana sendi sosinene sokuronga. Esi kwa kere ruha rosirugana esi ga harerere Jehova Karunga Munwendi a rugane pevhu. Jesus kwa kere neharo lyokurugana sirugana oso morwa age kwa here unene oGuhwe vemeguru.

Komeho Jesus a tameke nosirugana sendi ngoMurongi goMunene, age kwa mu kuhwire Johanesa Mukuhwi momukuro gwaJorodana. Makura tapa horoka sininke sokutetukisa! Apa ga zaukire Jesus momema, Jehova kwa uyungire kutundilira meguru asi: “Ogu yige Munwange ogu na hara, ga za nge komutjima.” (Mateusa 3:17) Ngapi omu o lizuvhu apa vakurona woge ava ku tantere asi va ku hara?— Nose kuvhura tu kare nousili asi Jesus nage yimo ga lizuvhire ngoso.

Jesus narunye nga rugana eyi ya hungama. Age kapi ga lininkisire. Kapi ga tanterere vantu asi yige Karunga. Muengeli Ngabiliyera kwa tanterere Mariya asi Jesus ngava mu tumbura asi MunwaKarunga. Jesus mwene kwa tente asi age MunwaKarunga. Age kapi ga tanterere vantu asi ga diva yoyinzi kupitakana oGuhwe. Age kwa tente asi: “Tate kwa pita nge.”—Johanesa 14:28.

Nampili apa ga kere meguru, Jesus nga rugana eyi va mu pere oGuhwe. Age kapi ga uyungire asi tani yi rugana nye a ka rugane yapeke. Age kwa here oGuhwe. Yipo nye age kwa purakenene kweyi ngava uyunga oGuhwe. Apa ga wizire Jesus pevhu, age kwa ya rugene eyi va mu tanterere oGuhwe vemeguru. Kapi ga ruganesere siruwo sendi mokurugana yininke yapeke. Yiyo yooyo Jehova ga haferere Munwendi!

Nose tuna hara kuhafesa Jehova, ndi ngapi?— Nsene ngoso, twa hepa kuyilikida asi ose sili kupurakena kwaKarunga, ngamoomu ga yi rugene Jesus. Karunga kutuuyungisa kupitira moBibeli. Kapi nayi wapa nsene tu lininkisa asi kuna kupurakena kwaKarunga nye ose kuna kupura nokurugana yininke eyi ayi lirwanesa noBibeli, ndi ngapi?— Ntani diworoka asi nsene sili twa hara Jehova, ose ngatu hara kumuhafesa.

Ngesi resa matjangwa gapeke goBibeli aga aga likida eyi twa hepa kudiva nokupura kuhamena Jesus: Mateusa 7:21-23; Johanesa 4:25, 26; ntani 1 Timoteusa 2:5, 6.

[Efano pepenuno 33]

Yisinke muengeli Ngabiliyera ga tanterere Mariya?

[Efano pepenuno 34]

Morwasinke va mu tulilire Jesus mekungu lyokulira yimuna?

[Efano pepenuno 35]

Mbudi musinke zongwa ga tanterere vasita gumwe govaengeli ava?