Egaununo 31

Oku natu gwana ehengagwido

WA LIZUVHA rumwe ruguwo nomukuma ndi?— Wa lipura rumwe nsene asi pweli gumwe ogu ga ku hara ndi?— Vanona vamwe yimo ava lizuvhu ngoso. Nye Karunga ga tumbwidira asi: ‘Ame narumwe si kukudivara.’ (Jesaya 49:15) Ayo ya wapa mokugazadara ko, ndi kapisi yimo?— Jehova Karunga sili ga tu hara!

Mutjangi gumwe goBibeli kwa tente asi: ‘Otate nonane kuvhura va y sige nge, nye Jehova ta pakere nge mbili.’ (Episarome 27:10) Mokudiva eyi kuvhura li kare ehengagwido sili kwetu. Jehova kuna kututantera asi: ‘Wa ha tjira. Ame noge na kara! . . . tani ku kwafa.’—Jesaya 41:10.

Poyiruwo yimwe Jehova kupulisira Satana a tu retere maudigu. Jehova kupulisira hena Satana a heteke vakareli vendi. Posikando simwe Muzonaguli kwa hepekere Jesus unene dogoro Jesus ta zigire kwaJehova asi: ‘Karunga gwange, Karunga gwange, yisinke ono sigilire nge?’ (Mateusa 27:46) Nampili ngomu ga hepere Jesus, age simpe ga yi divire asi Jehova ga mu hara. (Johanesa 10:17) Nye Jesus ga divire hena asi Karunga kupulisira Satana mokuheteka vakareli vendi ntani nokuvahepeka. Megaununo lyapeke ngali ka faturura eyi Karunga ga pulisilira Satana a rugane eyi.

Nsene o munona, poyiruwo yimwe kukara nowoma. Pasihonena, wa zumbana rumwe ndi?— Wa kere nowoma ndi?— Sinzi sovanona kukara nowoma. Murongi goMunene posiruwo simwe ga simwitilire esimwititi lyokuhamena kuzumbana. Kapisi munona ga zumbanene. Nye kwa kere nzwi.

Mononkedi dimwe nove kwa fana ngwendi nzwi. Mononkedi musinke? Morwa nonzwi kapi da kara nononkondo unene. Ntani ado da hepa muntu gokuvhura kuditakamesa nokudipopera. Muntu ogu a takamesa nonzwi kumutumbura asi musita.

Mesimwititi lyendi Jesus kwa simwitilire kuhamena musita ogu ga kere nononzwi efere limwe. Makura nzwi zimwe tazi zumbana po. Azo nampo kwa here kutara eyi ya kere kesinya kwina lyondundu. Hararasi tupu, nzwi ozo tazi kara ure nononkwawo. Omu ono kugazara, ngapi omu za lizuvhire nzwi zina apa za tere nokumona asi zelike zina kara?—

Yinke ngano ga rugene musita apa ga nongwenene asi nzwi zimwe zina zumbana? Age ngano ga vhulire kutanta asi morwa epuko lyonzwi kapi tani kara nosinka sayo ndi? Ndi ngano ga sigire nonzwi 99 pevango lyewa nokuza a ka papare ezi za zumbanene ndi? Kuvhura nzwi zimwe zi kare nomulyo unene mokukazipapara ndi?— Ngano nyove wa kere nzwi zina zokuzumbana, ngano wa here musita a ka ku papare ndi?—

Musita kwa here nonzwi dendi nadinye unene, nampili zina za zumbanene. Makura ta zi a ka papare ezi za zumbanene. Gazara tupu asi ruhafo musi za kere nazo nzwi zina apa za mwene musita kuna kuwiza! Ntani Jesus ga tente asi musita kwa hefe apa ga gwene nzwi zendi. Age kwa zi haferere unene kupitakana nonzwi 99 edi da dilire kuzumbana. Yilye ga fana ngwendi musita gwina mesimwititi lyaJesus? Yilye a tu takamesa unene ngwendi musita gwina ga takamesere nonzwi dendi?— Jesus kwa tente asi oGuhwe vemeguru. Ano oGuhwe kuna kara Jehova.

Jehova Karunga yige Musita goMunene govantu vendi. Age kwa hara navenye ava ava mu kerere, kukwatera mo vanonagona ngwendi nyove. Age kapi ana hara nkenye gumwe gwetu a zuvhe kukora ndi va mu zonagure. Yosili ayo kuhengagwida mokudiva asi Karunga kutupakera mbili unene.—Mateusa 18:12-14.

Wa pura nawa-nawa asi Jehova Karunga yipo ga kara ndi?— Koge Jehova age muntu ngwendi otate woge ndi ngwendi vantu vapeke ndi?— Yosili kapi tatu vhuru kumona Jehova. Morwa age Mpepo. Ga kara norutu oru atu dili kumona nomeho getu. Nye age kuna kara muntu nawa-nawa ntani age kuvhura kutumona. Age ga diva nsene tuna hepa evatero. Ntani ose kuvhura kuuyunga nendi mekanderero, ngwendi moomu atu uyunga nomuntu gwapeke gepevhu. Jehova kuna hara tu uyunge nendi mekanderero.

Nsene o lizuvha ruguwo ndi mukuma, yinke wa hepa kurugana?— Uyunga naJehova. Hedera pepi nendi, ano age nga ku hengagwida ntani nokukuvatera. Diworoka asi Jehova ga ku hara, nampili apa o lizuvhu mukuma. Tu guse Bibeli zetu tu tare mEpisarome 23, movelise 1, 2 kuna kututantera asi: “HOMPA yige musita gwange, neisi nani hepa. Age kupwizumukisa nge momaulisiro gowayi woutarara, komema gomatenda yiko a twara nge.”

Koneka eyi ga gwederere ko mutjangi movelise 4: “Mpili ni gende medamenena lyomundwire gonomfa, ame nokutjira si yuma yoyidona, yeeyi ove pouli pwange; muramu goge nomburo zoge, yiyo ayi hengagwida nge.” Yimo ava lizuvhu vantu nsene asi Jehova yige Karunga gwawo. Awo kugwana ehengagwido apa ava kara momaudigu. Nove yimo o lizuvhu monkedi zangesi ndi?—

Ngwendi moomu musita geharo a takamesa siunda sendi, Jehova nage kutakamesa nawa vantu vendi. Age kuvalikida nzira zouhunga ezi nava genda, ano awo kuhafa mokumukwama. Nampili apa ava kara momaudigu, awo kapi ava tjira. Musita kuruganesa muramu ndi mburo zendi mokupopera nonzwi koyikorama eyi yina hara kudikoresa. Bibeli kwa uyunga kuhamena omu musitagona Ndafita ga poperere nonzwi dendi kwanyime ntani nekembungu. (1 Samwere 17:34-36) Ano vantu vaKarunga va diva asi Jehova nga va popera nawo. Awo kuvhura kulizuvha egameno morwa Karunga kumwe nawo ana kara.

Jehova ga hara sili nonzwi dendi, ano age kuditakamesa neharo. Bibeli kutanta asi: ‘Ngwendi musita nga pitisira nonzwi dendi. Nokuwoko kwendi nga pongaika nonzwigona.’—Jesaya 40:11.

Kapi ayi ku hafesa pokudiva asi Jehova yimo ga kara ngoso ndi?— Nove ono hara kukara gumwe gononzwi dendi ndi?— Nonzwi kupurakena kezwi lyomusita gwado. Ado kukara pepi nendi. Ove kupurakena kwaJehova ndi?— Ove kukara pepi nendi ndi?— Makura kapi wa hepa kukara nowoma. Jehova nga kara kumwe nove.

Jehova kutakamesa neharo owo ava mu karere. Tu ze tu rese kumwe eyi azi uyunga ko Bibeli kuhamena eyi, mEpisarome 37:25; 55:22; ntani Rukasa 12:29-31.

[Efano pepenuno 163]

Omu ono kugazara, ngapi omu zina kulizuvha nzwigona ezi zokuzumbana?

[Efano pepenuno 164]

Yilye ga fana ngwendi musita ogu ga poperere nzwi zendi?

[Efano pepenuno 165]

Koge Jehova age muntu ngwendi otate woge ndi ngwendi vantu vapeke ndi?

[Efano pepenuno 166]

Ngwendi moomu musita a popere nonzwi dendi, yilye ogu na vhura kutuvatera apa atu kara momaudigu?