Yinke yina kutanta nayinye eyi?

JESUS KRISTUSA kwa tente: ‘Sidiviso souhura wouzuni’ ngasi kara yita nomarumbu nomahamba ntani nomakankamo gevhu.—Mateusa 24:1-8; Rukasa 21:10, 11.

Eparu kwa yipa kutunda mo-1914 koyita pokatji konomuhoko nomarudi, rorunzi morwa malihamekomo govapitisili womaukerelikarunga moupolitika ntani ngesi komahomono govateroreste.

Nampili ngomu valirongi unsitwe va kara nezokomeho, mafere gomamiliyona govantu uzuni mudima kuna kuligwanekera nerumbu. Nkenye mvhura mamiliyona govantu kufa morwa erumbu.

Mahamba nago sidiviso esi ga geve Jesus. Kukwama moYita yoMuhowo yoUzuni ehamba lyesakisa kwa dipagere nomwenyo dokupitakana po-21 000 000. Mokulisiga komahamba ganare aga ga kundamene mukunda gumwe tupu, alyo kwa kundamene evhu nalinye rambangako noyirudi. AIDS kuna kundama vantu wovanzi nakunye ntani TB nomaralia nezimo lyokusinsana kumwe nosiligarara kuna kundama vantu monomuhoko doruhepo.

Kwa yi divisa asi makankamo gevhu mayovi gomurongo gokulisiga-siga kuhoroka nkenye mvhura. Nampili pa kare yiruganeso nomawapaiko gokugadivisa, mombudi tatu zuvhu nkenye apa asi vantu wovanzi simpe kuligwanekera nomahudi morwa makankamo gevhu.

Bibeli nazo za yi pumba: “Ove diva asi, pomazuva gopouhura ngapa kara yiruwo yoyidigu. Yeeyi vantu ngava lihara tupu vene, ngava dowokera yimaliva, ngava lifumadeka, ngava linenepeka, ngava kara woyitjani, kapi ngava zuvha yovakurona vawo, kapi ngava paka mpandu, kapi ngava pongoka. Awo kapi ngava paka nkenda, ngava kara woyimbokauka novarundili, vankenye omu nava woyikotjongana, awo kwa nyenga yoyiwa. Awo ngava kara nombudi novalingi-lingi novalitumbi, ngava hara mahafo goparutu kupitakanesa omu va hara Karunga. Awo ngava moneka ngwendi vakereliKarunga, nye nonkondo damo ngava di nyoka. O likare ure nava vangoso!”—2 Timoteusa 3:1-5.

Ove kapi ono kuyikwatesa ko asi ose kuna kuparuka ‘poyiruwo yoyidigu’?

Wa yi nongonona asi, vantu narunye kwa lihara vene, kwa dowokera yimaliva, ntani awo kulitumba?

Yilye na patana asi vantu mouzuni ou kurugana tupu eyi vana hara, nye kapi va paka mpandu, awo kumbokauka, ntani kapi ava limburukwa?

Ono yi diva asi kupira kuzuvha kovakurona ntani kupira kupaka nkenda kuna vhuka, kapisi komavango gamwe tupu, nye uzuni mudima?

Pwa hana esinganyeko ono diva asi ose kuna kuparuka mouzuni wokuhara malihafeso nokunyenga yoyiwa. Yimo nye Bibeli za singonona nkareso ezi ngazi moneka “pomazuva gopouhura.”

Pwa hepa hena malikido gamwe mokudimburura siruwo esi tuna kuparuka ndi? Jesus ga pumbire hena asi posiruwo sooso, mbudi zongwa zoUhompa waKarunga ngava zi divisa mwa za uzuni mudima. (Mateusa 24:14) Eyi kuna kuyirugana ndi?

The Watchtower, mbapiratjangwa zoBibeli ezi ava gava mokudivisa mbudi zongwa zoUhompa waJehova, kuzinduruka momaraka gomanzi kupita nkenye sifo sapeke.

Nkenye mvhura, Nombangi daJehova kuruganesa novili dokupitakana po eyovi lyomamiliyona mokugava umbangi woUhompa waKarunga kwava wopeke.

Yifo yefatururo lyoBibeli awo kuyigava momaraka gokusika po-400, nampili maraka goure gonombunga dovantu wovasesu. Nombangi daJehova da gwanekera nonomuhoko nadinye nombudi zongwa; ntani awo kuzuvhisa moyirudi yoyinzi nomonomukunda edi da pira kudivikwa mouzuni wopolitika. Moyirongo yoyinzi, awo kurugana nkenye apa malikwamo gelirongo lyoBibeli.

Yosili, mbudi zongwa zoUhompa waKarunga kuna kuzidivisa mwa za uzuni mudima, kapisi mokutezwilisa uzuni, nye mokugava umbangi. Vantu nkenye oku kuna kuvapa mpito zokulikida nsene asi awo kwa kara nosinka kogu ga sita eguru nevhu ntani nsene awo ngava likida efumadeko konompango dendi nokulikida eharo kovakwawo.—Rukasa 10:25-27; Ehororo 4:11.

Ntaantani, Uhompa waKarunga ngau ka gusa po vadinikarunga ntani ngau ka ninka evhu nalinye paradisa.—Rukasa 23:43.

[Kakende pepenuno 6]

Mazuva gouhura wosinke?

Aga kapisi mazuva gouhura wovantu. Kwava ava sikisa mo mpango zaKarunga, Bibeli za gava mpito zokukaparuka narunye.—Johanesa 3:16, 36; 1 Johanesa 2:17.

Aga kapisi mazuva gouhura wevhu. Nonkango daKarunga kwa tumbwidira asi evhu ngali korerera dogoro narunye.—Episarome 37:29; 104:5; Jesaya 45:18.

Nye, aga mazuva gouhura wonkareso ezi zonyanya zokupira eharo ntani uhura wava ava kwama nkareso zamo.—Yisewe 2:21, 22.

[Kakende/Efano pepenuno 7]

Bibeli azo sili Nonkango daKarunga ndi?

Yikando yoyinzi, vaporofete woBibeli kwa tjenge asi: “HOMPA . . . kuna kutanta asi.” (Jesaya 43:14; Jeremiya 2:2) Jesus Kristusa, MunwaKarunga, nage ga likidire asi age ‘kapi ga uyungire mwanyamwendi.’ (Johanesa 14:10) Bibeli zene za uyunga asi: “Nkenye etjangwa . . . za retesa po Mpepo zaKarunga.”—2 Timoteusa 3:16.

Kwato buke ezi va gava hena momaraka gomanzi—kupitakana po-2 200 ngomu za likida United Bible Societies. Kwato buke ezi za kara nomagavero gomanzi—ngesi matjangururo gokupitakana po eyovi lyomamiliyona gane. Eyi nani kapisi yiyo no ndindira kombudi zaKarunga zokovantu navenye?

Mazogero gokuzura komalikido asi Bibeli kwa zi retesa po Karunga, tara mobuke The Bible—God’s Word or Man’s? ezi da gava Nombangi daJehova.

Nsene o resa Bibeli norupandu asi azo sili Nonkango daKarunga, ngo gwana mo mauwa.

[Kakende/Mafano pepenuno 8]

Yisinke Uhompa waKarunga?

Alyo epangero lyokulikerera eli ga tura po Karunga gosili, Jehova, Musiti geguru nevhu.—Jeremiya 10:10, 12.

Bibeli za likida Jesus Kristusa asi yige ga pa Karunga nonkondo doupangeli. (Ehororo 11:15) Apa ga kere pevhu, Jesus ga yi likidire asi ga kere nononkondo dononene dokutunda kwaKarunga—nonkondo edi da mu ninkisire mokuvhura kupangera makundungu nefuta, nokuverura nkenye mauvera, ntani nampili nokuvhumbura vafe. (Mateusa 9:2-8; Marukusa 4:37-41; Johanesa 11:11-44) Mauporofete goBibeli kwa tanta asi Karunga nga mu pa hena “epangero nefumano nononkondo dosiuhompa, asi vantu wonomuhoko nadinye nomarudi nomaraka nagenye va mu ruganene.” (Ndaniyera 7:13, 14) Epangero olyo kulitumbura asi Uhompa wemeguru; meguru yimo ana kuruganena Jesus Kristusa upangeli wendi.

[Mafano pepenuno 7]

Ezuvhiso lyombudi zongwa mouzuni mudima