Karunga kwa tungikire Abirahamu nepata lyendi

Ruha 5

Karunga kwa tungikire Abirahamu nepata lyendi

Ruvharo rwaAbirahamu kwa vhukire. Karunga kwa poperere Josefa moEgipite

JEHOVA ga yi divire asi Munwendi ogu ga here unene nga hepa nokufa. Uporofete ou va didilika mwaGenesis 3:15 nawo kwa kwatesa ko usili owo. Karunga ngano ga geve Munwendi ogu ga here ngonzambo kovantu ndi? Bibeli kwa gava sifanekeso pokututantera eyi ya horokere komugara gumwe namunwendi. Karunga kwa pulire Abirahamu a zambe munwendi Isaka ogu ga here.

Abirahamu kwa kere nepuro lyenene. Diworoka, Karunga kwa tumbwidilire asi mwamunwendi Isaka yimo ngamu tunda Ruvharo, ndi Muzowoli getumbwidiro. Pokuhuguvara asi Karunga kuvhura nga vhumbure Isaka, Abirahamu ga liwapaikilire mokuzamba munwendi. Nye muengeli gwaKarunga kwa hagekesere Abirahamu komeho a yi rugane. Karunga kwa pandadekere Abirahamu keharo lyendi lyokuzamba munwendi ogu ga here unene, ntani ga rugurukire etumbwidiro lyendi komugara ogu gomulimburukwi.

Konyima, Isaka kwa ya kere novana wovagara vavali, Esau naJakopo. Mokulisiga naEsau, Jakopo kwa here yininke yopampepo ntani kwa mu tungikire. Karunga kwa rundwilire edina lyaJakopo li kare Israeli, ano vana vaIsraeli 12 kwa ya kere vapangeli womazimo gaIsraeli. Nye ngapi omu epata olyo lya ya kere muhoko gomunene?

Malikwamo goyihorokwa kwa tamekere apa tupu vana vaJakopo va zuvhilire mumbyawo Josefa mfudu. Awo kwa mu randesere ngomupika, varandi tava mu twara koEgipite. Nye Karunga kwa tungikire mumatigara gwina gomulimburukwi nouradi. Nampili ngomu ga kere nomaudigu, Josefa konyima ga ya mu horowere hompa goVaegipite, Farawo, nokumupa nonkondo doupangeli. Apa lya wizire erumbu, Jakopo kwa tumine vana vendi vamwe koEgipite va ka rande nondya, ano posiruwo oso Josefa yige nga pangere konondya. Konyima zokulikwatakana novakuru vendi ava va litezwilire, Josefa kwa va gusilire po ntani ta tura po mawapaiko yipo epata nalinye li dirukire koEgipite. Awo kwa ya va pere evhu lyewa oku va ya limine nokuhepuruka. Josefa ga yi kwete egano asi Karunga yige ga yi gendesere monkedi zangoso yipo nga sikise mo etumbwidiro lyendi.

Jakopo kwa tungire moEgipite moukurupe wendi naunye, kumwe nepata lyendi eli lya vhukire. Komeho zokufa, age kwa va tanterere asi Ruvharo rwetumbwidiro, ndi Muzowoli, nga kara Mupangeli gononkondo ogu ngava retera mezimo lyamunwendi Juda. Komeho zonomfa dendi, Josefa kwa pumbire asi ezuva limwe Karunga nga gusa mo epata lyaJakopo moEgipite.

—Kuna tundu mwaGenesis egaununo 20 dogoro 50; Vahebeli 11:17-22.

◼ Yisinke Karunga ga tanterere Abirahamu a rugane, ntani yisinke Karunga ga tanterere vantu?

◼ Ngapi omu ga gendere Josefa a wize moEgipite ntani yitundwamo musinke ya ya kere?

◼ Yisinke ga pumbire Jakopo komeho zonomfa dendi?

[Kakende kepepenuno 8]

● Genesis

Exodus

Levitikus

Numeri

Deuteronomium

Josuwa

Vapanguli

Rutu

1 Samwere

2 Samwere

1 Vahompa

2 Vahompa

1 Histoli

2 Histoli

Esira

Nehemiya

Esitera

Joba

Mapisarome

Yisewe

Muudisi

Rusumo

Jesaya

Jeremiya

Malirankali

Hesekiyeli

Ndaniyera

Hoseya

Jowera

Amosa

Obadja

Jona

Mika

Nahumu

Habakuku

Sefaniya

Hagayi

Sakaliya

Marakiya

Mateusa

Marukusa

Rukasa

Johanesa

Yirugana

Varoma

1 Vakolinte

2 Vakolinte

Vagarata

Vaefeso

Vafilipi

Vakorosi

1 Vatesaronika

2 Vatesaronika

1 Timoteusa

2 Timoteusa

Titusa

Firemoni

Vahebeli

Jakopo

1 Peturusa

2 Peturusa

1 Johanesa

2 Johanesa

3 Johanesa

Juda

Ehororo