Ruha 9

Vaisraeli kwa hundilire hompa gokuvapangera

Sauru, hompa gokuhova goVaisraeli, kapi ga limburukwire kwaJehova. Age kwa mu pinganenene mo Ndafita, ogu ga kere nelikwatakano lyouhompa wanarunye

KONYIMA zonomfa daSimisoni, Samwere kwa kere muporofete nomupanguli moIsraeli. Ano Vaisraeli ngava mu tantere asi nawo vana hara kukara ngwendi nomuhoko dapeke mokukara nahompa gwawo. Nampili ngomu ya mu guvisire Jehova, nye ga tanterere Samwere mokurugana eyi gwa mu hundilire muhoko. Karunga ga horowere mugara gomulinunupiki gedina Sauru a kare hompa. Konyima, hompa Sauru kwa ya linenepekere ntani kapi ga ya limburukwire. Jehova yipo ga mu gusire ko kouhompa nokutantera Samwere a horowore ko gumwe, age kwa kere mugaragona Ndafita. Apo kwa pitire po nomvhura dononzi komeho Ndafita a ya kare hompa.

Apa ga kere simpe mudinkantu, Ndafita nga zi a ka dingure vakuru vendi ava va kere moukwayita waSauru. Vakwayita navenye kwa tjilire nkore zawo zimwe, Golyata gemutundusika, ogu nga va swaura kumwe naKarunga gwawo. Morwa ehandu, Ndafita yipo ga pulire epulisiro nokukarwa negara olyo lyetundusika. Mugaragona ogu kwa zililire nkore zendi, ogu ga kere nonometa ntatu moure, nampili ngomu ga kere tupu nongumi nomamanya gomasesu. Apa ga mu zorere Golyata, Ndafita kwa limbwilire asi age ana liwapaike kumupita, morwa age kuna kurwira medina lyaJehova Karunga! Ndafita kwa dipagere Golyata nemanya limwe tupu ntani yiyo ga mu tetere mutwe nemumbere lyanyamwendi. Apa va yi mwene eyi Vafilisiti tava duka awo guna va pwaga.

Pomuhowo, Sauru kwa mu tetwire uradi waNdafita, makura ta mu tura mupitisili govakwayita vendi. Efundo lyaNdafita kwa ninkisire Sauru a kare nomfudu. Ndafita ga hepere kutjwayuka nomvhura dongandi. Nye, Ndafita simpe ga limburukwire kwahompa ogu ga hetekerere ko kumudipaga, morwa ga yi kwete egano asi hompa Sauru, Jehova Karunga ga mu horowere. Moruhura, Sauru ta ka fa moyita. Karuwogona tupu konyima zoyo, Ndafita kwa kere hompa, ngamoomu ga yi tumbwidilire Jehova.

Ngahompa, Ndafita kwa here kutunga ntembeli zaJehova. Nampili ngoso, Jehova kwa tanterere Ndafita asi gumwe govana vendi yige nga zi tunga. MunwaNdafita gomugara Saromo, yige ga ya zi tungire. Karunga kwa tungikire Ndafita, pokutura po elikwatakano lyewa kumwe nendi asi: Ezimo lyawo ngali kara lyovahompa lilisige nomazimo gapeke. Moruhura, amo nga mu tunda Muzowoli, ndi Ruvharo, oru va tumbwidilire moEdeni. Ruvharo oro ngaru kara Mesiyasa, kutanta asi “Mugwavekwa,” ogu ga horowora Karunga. Jehova kwa tumbwidilire asi Mesiyasa nga kara Mupangeli gepangero, ndi goUhompa ou nga u karerera narunye.

Norupandu rorunene, Ndafita kwa pongaikire yitungiso yoyinzi noyivera yomulyo mokutungisa ko ntembeli. Age hena kwa tjenge mapisarome gomanzi. Pepi nonomfa dendi, Ndafita ga yi dimbwilire pokutanta asi: “Mpepo zaHOMPA kuna kuuyunga mwange; mbudi zendi kuna kara mokana kange.”—2 Samwere 23:2.

—Kuna tundu mwa-1 ntani 2 Samwere; 1 Histoli; Jesaya 9:7; Mateusa 21:9; Rukasa 1:32; Johanesa 7:42.

◼ Morwasinke Jehova ga tulilire Ndafita a kare hompa mevango lyaSauru?

◼ Yikara musinke ga kere nayo Ndafita nampili komeho zokukara hompa?

◼ Yilye Ruvharo rwetumbwidiro, ndi Muzowoli, ogu va pumbire nga wiza kupitira mezimo lyaNdafita?

[Nonkango depepenuno 12]

“Ano ame uhompa wendi ngani u paka po dogoro narunye.”—2 Samwere 7:13

[Kakende kepepenuno 12]

Genesis

Exodus

Levitikus

Numeri

Deuteronomium

Josuwa

Vapanguli

Rutu

● 1 Samwere

● 2 Samwere

1 Vahompa

2 Vahompa

● 1 Histoli

2 Histoli

Esira

Nehemiya

Esitera

Joba

Mapisarome

Yisewe

Muudisi

Rusumo

Jesaya

Jeremiya

Hagayi

Sakaliya

Marakiya

Mateusa

Marukusa

Rukasa

Johanesa

Yirugana

Varoma

1 Vakolinte

2 Vakolinte

Vagarata

Vaefeso

Vafilipi

Vakorosi

1 Vatesaronika

2 Vatesaronika

1 Timoteusa

2 Timoteusa

Titusa

Firemoni

Vahebeli

Jakopo

1 Peturusa

2 Peturusa

1 Johanesa

2 Johanesa

3 Johanesa

Juda

Ehororo