RUHA 5

Kara nombili novanekoro

“Kareni nonkenda nombili nomalinunupiko.”—Vakorosi 3:12

Apa a kwara muntu age kutameka epata lyepe. Nampili ngomu wa hepa kuhara nokufumadeka vakurona woge, nye muntu gomulyo po koge pevhu kuna kara mulikwali goge. Vanekoro kuvhura yi va digopere kuyitambura oyo. Nye nompango doBibeli kuvhura di ku vatere o dive omu no kara nombili novanekoro ntani nava womukwarero ngomu ono kunkondopeka epata lyoge lyepe.

1 OMU NO TARA VANEKORO

Valikwali kuna kuhafera siruwo novakurona vawo

EYI ZA UYUNGA BIBELI: “O fumadeke oguho nonyoko.” (Vaefeso 6:2) Di kare asi nomvhura doge dingapi, simpe wa hepa kufumadeka vakondi woge. Ntani wa hepa kudiworoka asi mulikwali goge nage ga hepa kufira sinka vakondi vendi. “Eharo kapi lya paka mfudu,” yipo nye wa ha fira mfudu elikwatakano eli ga kara nalyo mulikwali goge novakondi vendi.—1 Vakolinte 13:4; Vagarata 5:26.

EYI NO RUGANA:

Nyokera po kuuyunga nonkango edi asi: “Vakondi woge nkenye apa kuswaura nge” ndi “Onane woge kapi va hara nge”
Hetekera ko kukwata egano magano gomulikwali goge

2 TURENI PO ETOKORO

EYI ZA UYUNGA BIBELI: “Yipo nye na sigira mugara oguhwe nozina, a hamene mukadendi, ano mouvali wawo makura va kare nye rutu rumwe tupu.” (Mateusa 19:5) Nsene to kwara, vakondi woge kuvhura va lizuvhe asi simpe va hepa kukupakera mbili, ntani kuvhura va hare kulitura mo unene mononkwara deni.

Nove nomulikwali goge mwa hepa kutantera vakondi veni omu muna kulizuvha kuhamena elihameko mo lyawo mononkwara deni. Mwa hepa kuvatantera usili nye monkedi zongwa. (Yisewe 15:1) Nkenda nombili nelinunupiko ngayi mu vatera mu kare nomalikwatakano gomawa novanekoro “oku tomu lididimike-didimike meharo.”—Vaefeso 4:2.

Valikwali kuna kuzogera kumwe; Valikwali kuna kugava uhwi kovakurona vawo

EYI NO RUGANA:

Nsene kapi yina kukuhafesa omu vanekoro vana kulitura mo mononkwara deni, yi zogera nomulikwali goge posiruwo sokuwapera
Lizuvheni omu nomu kohonona po udigu owo