Vapitisili wombungakriste

APA ga kere Jesus pevhu, ga yi likidire asi age “musita gomuwa.” (Joh. 10:11) Pokumona mbunga ezi za mu kweme, Jesus “tazi mu gwire nkenda, morwa yeeyi va hepere va lifane nononzwi dokuzumbana da hana musita.” (Mat. 9:36) Peturusa novapositoli vakwawo va mwene eharo lyaJesus. Jesus ga lisigire novampitisili woyimpempa woVaisraeli, ava ngava sigilire vantu va zumbane ntani va fe nzara zopampepo! (Hes. 34:7, 8) Sihonena saJesus sosiwa sokuronga nokupakera mbili vantu dogoro kuvafira, kwa rongere vapositoli vendi omu nava vatera vantu va tengure kwaJehova, ‘Musita noMutakamesi gonomwenyo dawo.’—1 Pet. 2:25.

² Ezuva limwe apa Jesus ga uyungire naPeturusa, kwa nkondopekere mulyo gokulisa nonzwi nokuditakamesa. (Joh. 21:15-17) Eyi kwa kundamene Peturusa, ano konyima ya mu tumangedere a tjangere vakuronambunga wombungakriste zokuhova asi: “Kareni vasita wosiunda saKarunga esi ga mu pa, si takameseni neharo, moomu ga yi mu harera Karunga, nye kapisi komusininiko. Omu rugane yirugana yeni, kapisi morwamfuto za nyata, nye neharo lyewa lyokurugana. Walye omu kara ohompa vava va mu pa asi mu va takamese, kareni sihonena kombunga.” (1 Pet. 5:1-3) Nonkango edi daPeturusa simpe kuna kara nomulyo kwava ava pitisire monombungakriste naina. Mokuhonena Jesus, vakuronambunga kulizambera va kare sihonena sosiwa kosiunda, nokupitisira mosirugana saJehova.—Heb. 13:7.

³ Ayo kutuhafesa kweyi twa kara novapitisili monombungakriste ava za horowora mpepo zokupongoka. Ose kugwanena mo mauwa gomanzi mepakerombili lyawo. Pasihonena, awo kugava makorangedo ntani kupakera mbili nkenye gumwe mombungakriste. Nkenye sivike, awo kupitisira mapongo, yipo natuvenye tu pame mepuro. (Rom. 12:8) Elituromo lyawo lyokupopera mbunga koyininke yoyidona, ngwendi kovantu wovadona, kutuvatera tu lizuvhe egameno. (Jes. 32:2; Tit. 1:9-11) Apa ava pitisire mosirugana sokuzuvhisa, ayo kutukorangeda tu liture mo unene mokuzuvhisa mbudi zongwa nkenye kwedi. (Heb. 13:15-17) Kupitira mwava azi tumbura Bibeli asi “mauhwi,” Jehova kunkondopeka mbungakriste.—Efe. 4:8, 11, 12.

EYI YA HEPA PO MOKUKARA MUPITISILI

⁴ Mokuninka asi mbungakriste zi gende po nawa, vagara ava va horowora mokukara vapitisili va hepa kusikisa mo yihepwa eyi va tjanga moNonkango daKarunga. Pokusikisa mo yihepwa oyo kulikida asi kwa va horowora mpepo zokupongoka. (Yirug. 20:28) Yosili, yihepwa yoPatjangwa yokukara mupitisili kapisi ureru, mokumona asi kukara mupitisili kuna kara situmbukira sosinene. Nye yihepwa oyo kapisi udigu kuyisikisa mo vagara woVakriste ava va hara sili Jehova ntani vana hara asi a va ruganese. Natuvenye twa hepa kuyidiva asi vapitisili kuna kara vantu ava ava sikisa mo mapukururo gomoBibeli meparu lyawo.

⁵ Mupositoli Paurusa mombilive zendi zokuhova ezi ga tjangerere Timoteusa ntani Titusa, kwa tumbura mo eyi va hepa kusikisa mo vapitisili. Mwa-1 Timoteusa 3:1-7, kutanta asi: “Muntu nsene a hara kukara mupitisili gombungakriste, kuna tokomene sirugana sombeyo. Mupitisili gombungakriste a pire epuko, age a kare nomukadi gumwe tupu, a kare mukuruki, ga kwata mutjima, a kare nononkedi donongwa. Age hena kupakera mbili vagenda, age ga diva kuronga. Ga ha kara nkorwi ndi gomarwanambo, nani nye a kare gomuwa gombili, kapisi mudovaukili goyimaliva. A kare mugara ga diva kugendesa nawa embo lyendi, ogu a tekura vana vendi monkedi zongwa zekuruko. Yeeyi muntu nsene yi mu puka yokugendesa nawa embo lyendi, omu na vhura nye kutekura mbungakriste zaKarunga ngapi? Kapisi googu age yipo ana kulitezurura, neisi a litumba, a gwane mpanguro zokuliza nezi zaSatana. Age hena a kare muntu ogu ava panda nava woponze zombungakriste, neisi a swauka, makura a fe morutenda rwaSatana.”

⁶ Paurusa kwa tjangerere Titusa asi: “Eyi na ku sigira moKereta yeyi asi, o wapaike nayinye eyi ya hupa po, oku to tura mo vakurona wonombungakriste mwankenye sitata, moomu na ku tantera. Diworoka asi, mukurona gombungakriste a pire epuko, a kare mugara gomukadi gumwe tupu, govana wovapuli va hana nompata, awo hena kapi va runda mutwe. Mupitisili gombungakriste a pire epuko, moomu lya fira kukara erenga lyaKarunga, kapisi gokulihara mwene gelike, kapisi gomarwanambo, kapisi nkorwe ndi mukorokotji ndi mupapali gemona lyouzuni. Nye a pakere mbili vagenda, age hena a hare yoyiwa. A kwate mutjima, a hungame, a pongoke, a lipangere mwene. A udise nonkango dokuvhura kuhuguvara, edi da liza nerongo eli va mu ronga, ntani a vhura kukorangeda vakwawo nerongo lyewa oku ta pukurura ava vana kumukondjesa.”—Titusa 1:5-9.

⁷ Nampili ngomu ayi moneka pomuhowo ngwendi udigu kusikisa mo yihepwa eyi, vagara woVakriste kapisi yi va tengwidise monyima. Apa vakuronambunga ava likida yikara eyi ya hepa po mokukara vapitisili, ayo kukorangeda womombungakriste nawo va rugane yokulifana. Paurusa kwa tjenge asi vakuronambunga ‘ngomauhwi’ sirugana sawo “sokuwapaikira vapongoki sirugana sekwafo, sokutunga rutu rwaKristusa, dogoro noku ngatu ka sike natuvenye mouumwe wemepuro nou wokudiva MunwaKarunga, ngatu sike mo moukurona wene-wene, ou au tundu kwaKristusa.”—Efe. 4:8, 12, 13.

⁸ Vapitisili kapisi vamatigona ndi asi googu age yipo ana kulitezurura. Nye, awo vaava va tjira Karunga va kara nediwo lyoBibeli ntani va kwata nawa egano Matjangwa ntani va hara unene mbungakriste. Awo va diva kuronga nokuvyukisa ava vana kupuka, ano eyi kupopera womombungakriste koyininke yoyidona. (Jes. 32:2) Monombungakriste ureru kudimburura vapitisili ava morwa awo vagara ava va tjira Karunga nokutakamesa nawa siunda sendi.

⁹ Ava va horowora va kare vapitisili kuyilikida meparu lyawo asi va kara nounongo. Nsene va kwara, awo kutura pasirugana nompango doSikriste kuhamena nonkwara, eyi kutanta asi a kare mugara gomukadi gumwe tupu ntani a kare mugara ga diva kugendesa nawa embo lyendi. Nsene mupitisili ga kara novana wovapuli va hana nompata, awo hena kapi va runda mutwe, ayo kurerupira womombungakriste va mu pure mapukururo nomavyukiso kuhamena omu nava gendesa mapata gawo ngoVakriste. Mupitisili a pire epuko ntani a pire usima, age a kare muntu ogu ava panda nava woponze zombungakriste. Age kapi ga kara nonkareso zondona ezi nazi vhura kuswaukisa mbungakriste. Ntani kapisi a kare muntu ogu kava piswire ntaantani morwa kutura nzo zonene. Mbungakriste kwa hepa mupitisili gosihonena sosiwa yipo womombungakriste va kwame sihonena sendi nokulizuvha epopero mepitsiro lyendi.—1 Kol. 11:1; 16:15, 16.

¹⁰ Vagara vangoso wokuwapera va fira kupakera mbili mbungakriste ngwendi moomu ngaga yi rugana masimbi goVaisraeli aga va singonona asi “vagara wovakonentu wovanandunge wovakoli moyikara.” (Deut. 1:13) Vakuronambunga kapi va sikilira mo, nye va divikwe monombungakriste nomomukunda asi awo vagara ava va tjira Karunga ava va yi likida siruwo sosire meparu lyawo asi awo kusikisa mo nompango daKarunga. Morwa kudira epuko, ayo kuvarerupira mokuronga mbungakriste nemanguruko.—Rom. 3:23.

¹¹ Vagara ava ava wapere kukara vapitisili kwa kara nononkedi donongwa ntani kuruganena kumwe novakwawo. Awo kapi ava kwama tupu yeeyi va hara ndi eyi ava hafere vene. Nye, awo kwa kara nelipangero meparu lyawo ntani nehetakano. Elipangero lyawo kulilikida mokulya nomokunwa nomoyilihafeso ntani nomu mweyi va hara kurugana nkenye ezuva. Awo kulipangera monkedi omu ava ruganesa yikorwesa yipo va dire kugwira mounkorwe ndi va kare nonkorwe. Morwa nsene va kara nonkorwe tava zumbanesa elipangero makura eyi ngayi va digopera kutakamesa mbungakriste.

¹² Mupitisili gombungakriste ga hepa kukara mugara ogu ga diva kuwapaika yininke monaruwa. Yikara yendi yoyiwa kuyimonena memoneko lyendi nomu a pakere mbili embo lyendi ntani nomoyirugana yendi yankenye ezuva. Age kapi a liranga kurugana yuma eyi yina hepa po ntani kuwapaika elikwamo lyendi nawa. Age kukwama nompango daKarunga.

¹³ Mupitisili ga hepa kukara gokukuruka ndi gokulinunupika. Ntani ga hepa kuruganena kumwe novakuronambunga vakwawo mouumwe. Age kapi a litara asi ga pita vakwawo ndi a ndindire ko yoyinzi kovakwawo. Muntu gokulinunupika kapi a gazara asi magano gendi ga pita govakuronambunga vakwawo. Morwa vakwawo kuvhura va kare noyikara ndi noudivi ou ga dira kukara nawo. Mukuronambunga gokulinunupika kutulisa po matokoro gokuliza noBibeli ntani nokukondja mokuhonena Jesus Kristusa. (Fil. 2:2-8) Mukuronambunga kapisi a kare gomarwanambo ndi gonyanya nye a kare muntu ogu a fumadeke vakwawo nokutara vakwawo asi va mu pitakana mekuto. Age kapisi a kare gokulihara mwene gelike nokusininika vakwawo asi ngano va tambure magano gendi. Ntani kapisi a kare muntu gokuhanduka usimbu nye ngano a ruganene kumwe novakwawo monkedi zombili.

¹⁴ Mokulifana, mupitisili gokuwapera ga hepa kukara gokukwata mutjima ndi gonondunge. Eyi kutanta asi age kapi a genderere kupangura. Age ga kwata nawa egano nompango daJehova ntani nomu nava di sikisa mo. Mupitisili gonondunge kutambura mapukururo nomavyukiso gaJehova. Age kapisi muyilipaki.

¹⁵ Paurusa kwa diworokesere Titusa asi mupitisili a kare muntu ogu ga hara yoyiwa. Age ga hepa kuhungama ntani a pongoke. Age kulikida yikara eyi monkedi omu a ruganene kumwe novakwawo ntani ga kwaterera kokurugana youhunga neyi yoyiwa. Age kapi a pulisire nkenye eyi yi donganese ukareli wendi kwaJehova ntani age nkenye apa kukwama nompango douhunga. Age kuvhura kumuhuguvara. Age hena kupakera mbili vagenda nokulizambera ntani kuruganesa yiweka yendi mokuvatera wopeke.—Yirug. 20:33-35.

¹⁶ Mokuninka asi mupitisili a kare gokuwapera ntudi ga hepa kudiva kuronga. Kuliza nononkango daPaurusa edi ga tjangerere Titusa, mupitisii ga hepa ‘kuudisa nonkango dokuvhura kuhuguvara, edi da liza nerongo eli va mu ronga, ntani a vhura kukorangeda vakwawo nerongo lyewa oku ta pukurura ava vana kumukondjesa.’ (Tit. 1:9) Age a kare mugara ogu ga diva kufaturura nawa nokufunda po marwaneso ntani nokutura pasirugana Matjangwa monkedi omu wopeke nava gwanena mo uwa nokunkondopeka epuro lyawo. Mupitisili gwangoso kuronga posiruwo sosiwa nesi sosidona. (2 Tim. 4:2) Elididimiko lyendi kulilikida apa a pukurura ogu ana lipuka ndi ana kara nomasinganyeko monkedi zougomoki nokumukorangeda a rugane youhunga. Mupitisili gokuwapera age kuronga nawa komeho zombungakriste ndi murongwa gwendi.

¹⁷ Ayo mulyo kovakurongambunga mokukara noupampi mosirugana sokuzuvhisa. Monkedi ezi, awo kuna kuhonena Jesus ogu ga tulire muhowo sirugana sokuzuvhisa meparu lyendi. Jesus kwa here varongwa vendi ntani ga va vaterere va kare vazuvhisi wokuwapera. (Mar. 1:38; Ruk. 8:1) Elituromo lyovakuronambunga mosirugana sokuzuvhisa nampili ngomu va kara noyirugana yoyinzi, kutumangeda womombungakriste nawo va kare noupampi. Apa vakuronambunga ava zi kumwe nava vemepata lyawo mokuzuvhisa ndi navamwe womombungakriste, navenye ‘kukagwanena mo ekwafo’ ndi ekorangedo.—Rom. 1:11, 12.

¹⁸ Yinzi ya hamena mo mokukara mupitisili. Yosili, kwato mupitisili ogu a vhuru kusikisa mo nompango nadinye domoBibeli, nye nampili ngoso, vakuronambunga kapisi va pire yikara yangoso, morwa neisi nava va tara asi kapi vana wapere situmbukira oso. Vakuronambunga vamwe kuvhura va kare noyikara eyi va dira kukara nayo vakuronambunga vakwawo. Yitundwamo kuna kara asi mbunga zovakuronambunga ngazi kara noyikara nayinye yoyiwa yipo va pitisire nawa mbunga zaKarunga.

¹⁹ Apa vakuronambunga ava horowora gumwe a kare mupitisili, awo kudiworoka nonkango domupositoli Paurusa edi asi: “Tani mu korangeda one namuvenye asi, walye omu pitakanesa mokuligazara nyamweni. Nye omu heteke kugazara nawa, nkenye ogu paheteko zepuro eli ga mu pa Karunga.” (Rom. 12:3) Nkenye mukuronambunga ga hepa kulitara asi age mununu po kovakwawo. Pwa ha kara mupitisili ogu na ligazara asi age “munongo nye unene” pokutarurura eyi ga hepa kusikisa mo munazinyetu gomugara. (Yis. 3:7) Pokukwama eyi va hepa kusikisa mo vapitisili, mbunga zovakuronambunga kutara nsene asi munazinyetu ogu vana hara kuhowora kuhetekera ko kusikisa mo yihepwa oyo. Nsene vakuronambunga va dira kulihuguvara tupu vene, awo ngava tulisa po matokoro aga ngaga likida efumadeko konompango daJehova ntani nokuretera uwa mbungakriste. Awo kugazadara ko nawa kwankenye etokoro ntani nokukwama evyukiso lyompepo zokupongoka zaKarunga. Esi kuna kara situmbukira sosinene esi va simba, ntani va hepa kuyirugana kuliza netumangedo lyaPaurusa eli asi: “Nokugenderera si kukambeka muntu mawoko.”—1 Tim. 5:21, 22.

YIYIMWA YOMPEPO

²⁰ Vagara ava va tjira Karunga kuvapitisira mpepo zokupongoka, ntani kulikida yiyimwa yazo meparu lyawo. Paurusa kwa tumbura yiyimwa ntane: “Eharo nehafo nombili nedidimiko nonkenda nouwa nepuro, nougomoki ntani elipangero.” (Gar. 5:22, 23, NW) Vapitisili vangoso kuretera rufuwo vapuli vakwawo ntani nokuvatera mbungakriste zi kare mouumwe ngomu vana kusikisa mo sirugana sokupongoka. Nkareso zawo zongwa ntani noyiyimwa eyi ava likida moyirugana yawo kulihorora asi awo kwa va horowora mpepo zokupongoka.—Yirug. 20:28.

VAGARA AVA AVA RETESA PO UUMWE

²¹ Ayo ya wapa asi vakuronambunga va ruganene kumwe mokuretesa po uumwe mombungakriste. Nampili ngomu va lisiga moyikara yawo, awo kukondjera uumwe nokulipurakena-purakena nefumadeko nsene gumwe ta uyunga, nampili kapi vana kukwatesa ko eyi ana kuuyunga. Nsene kapi yina kulirwanesa nonompango doBibeli, nkenye gumwe gwawo ga hepa kukwatesa ko etokoro lyokuhulilira lyombunga zovakuronambunga. Kukara nonkareso zangoso, kulikida asi kuna kuvapitisira “unongo ou wa tunda meguru,” ou wa ‘hara mpora nombili.’ (Jak. 3:17, 18) Pwa ha kara mukuronambunga ogu na ligazara asi age ga pita vakwawo ndi a pangere vakwawo. Apa vakuronambunga ava ruganene kumwe, ayo kulikida asi kuna kuruganena kumwe naJehova, ano mbungakriste kugwanena mo uwa.—1 Kol., egau. 12; Koros. 2:19.

OMU NO KARA MUPITISILI

²² Vagara ava va tjira Karunga kwa kara neharo lyokukara vapitisili wombungakriste. (1 Tim. 3:1) Nye, kukara mukuronambunga kwa hamena mo yirugana ntani elizambero. Eyi kutanta asi kulizambera mokuruganena vapuli vakweni ntani nokupakera mbili elikwatakano lyawo naKarunga. Mokukara mupitisili, wa hepa kukondja mokusikisa mo yihepwa eyi va tumbura moMatjangwa.

MAUKARO KURUNDURUKA

²³ Poyiruwo yimwe munazinyetu ogu ga kara mupitisili siruwo sosire kuvhura a ligwanekere nouvera ndi a remane. Ndi nampo morwa ukurupe kuvhura a dire hena kusikisa mo situmbukira sendi. Nampili a kare moukaro wangoso, va hepa kumufumadeka morwa age simpe mukuronambunga. Kapisi hepero a hageke kukara mupitisili morwa ukaro wendi. Nage simpe ga fira kumufumadeka ngwendi vakuronambunga vakwawo ava vana kurugana unene mokupakera mbili mbungakriste.

²⁴ Nsene munazinyetu ogo kuna kulizuvha asi ana hara kuhageka morwa ukaro wendi kapisi va mu sininike kukara mupitisili. (1 Pet. 5:2) Nye simpe va hepa kumufumadeka. Age simpe kuvhura kurugana yirugana yoyinzi mombungakriste, nampili ngomu ana dili kukara mukuronambunga.

YIRUGANA YOVAKURONAMBUNGA

²⁵ Vakuronambunga kurugana yirugana yokulisiga-siga mombungakriste. Pwa kara muwapaiki gombunga zovakuronambunga nahamutjanga nomutareli goyirugana yokuzuvhisa nomupitisili goRuhungu ntani mupitisili goSikora zoUkareli. Ntani hena, vakuronambunga yiwo ava pitisire tumbunga. Vakuronambunga kurugana yirugana oyo siruwo sosire. Ano nsene mukuronambunga gumwe kapi ana kuvhura hena kusikisa mo situmbukira sendi morwa kudiruka ndi uvera ndi kumugusa situmbukira morwa kurugana eyi ya lilimba nompango zaJehova, situmbukira oso kusigava komukuronambunga gwapeke ogu na vhura kusisikisa mo. Monombungakriste omu mwa kara vapitisili wovasesu, kuvhura yi kare hepero mukuronambunga gumwe a rugane yirugana yokulisiga-siga dogoro noku ngava horowera po mukuronambunga gomupe.

²⁶ Muwapaiki gombunga zovakuronambunga yige a kara munasipundi apa ava kara nepongo lyovakuronambunga. Nampili ngoso, age kulinunupika mokuruganena kumwe novakuronambunga vakwawo yipo va pakere mbili siunda saKarunga. (Rom. 12:10; 1 Pet. 5:2, 3) Age ga hepa kukara muntu ogu ga diva nawa-nawa kuwapaika malikwamo ntani a kare mupitisili gonondunge.—Rom. 12:8.

²⁷ Hamutjanga yige a pungura nombudi dopatjangwa dombungakriste nokudivisa vakuronambunga vakwawo nombudi dimwe. Nsene hepero, mukuronambunga ndi mukwafimbunga gokuwapera kuvhura a mu vatere.

²⁸ Mutareli goyirugana yokuzuvhisa yige a tulisa po mawapaiko goyirugana yokuzuvhisa ntani nayimwe hena ya hamena kokuzuvhisa. Age kutura po mawapaiko gokukadingura tumbunga tokulisiga-siga yipo nkenye kwedi a ka dingure kambunga kamwe mosikondovike. Ano nombungakriste dononunu omu mwa kara tumbunga tokuzuvhisa totununu, age kuvhura a dingure nkenye kambunga ruvali momvhura. Pedinguro lyendi, yige na pitisira epongo lyomokuzuvhisa nokurugana kumwe novazuvhisi ntani nokuvavatera komatengwiropo gawo nokovarongwa vawo woBibeli.

MUPITISILI GOKAMBUNGA

²⁹ Mupitisili gokambunga yige ga kara nositumbukira sokupitisira mokuzuvhisa. Yitumbukira yendi kwa hamena mo (1) kupakera mbili elikwatakano lyankenye muzuvhisi naJehova mokambunga kendi; (2) kuvatera nkenye gumwe gomokambunga a lihameke nkenye apa mokuzuvhisa ntani a hafere kuzuvhisa; (3) kuvatera nokudeura vakwafimbunga womokambunga kendi va wapere yitumbukira mombungakriste. Mbunga zovakuronambunga yizo azi horowora munazinyetu gomugara gokuwapera ogu na sikisa mo situmbukira esi.

³⁰ Morwa yirugana eyi ya hamena mo mositumbukira esi, aso sa fira mukuronambunga. Mukwafimbunga gokuwapera a vatere mositumbukira esi dogoro paapa ngava si pa mukuronambunga gumwe. Mukwafimbunga ogu a vatere mositumbukira esi kumutumbura asi muvateli gokambunga, morwa age kapisi mukuronambunga. Nampili ngoso, age ga hepa kurugana mepitisiro lyovakuronambunga mokusikisa mo situmbukira sendi.

³¹ Situmbukira sosinene po somupitisili gokambunga, kuna kara sokupitisira moyirugana yokuzuvhisa. Upampi nelituromo lyendi, ngayi vatera womokambunga kendi. Morwa vazuvhisi kuhafera makorangedo aga ava gwana mokuponga kumwe, ya wapa kuwapaika elikwamo lyokuzuvhisa eli nali pulisira sinzi sawo va lihameke mo. (Ruk. 10:1-16) Mupitisili ga hepa kudivilisa asi vana kara nonomukunda dokugwanena po dokuzuvhisira. Ga hepa kupitisira epongo lyoyirugana yokuzuvhisa ntani nokuwapaika vazuvhisi omu nava rugana ezuva olyo. Nsene kapi nayi mu vhulika kukapitisira epongo lyokuzuvhisa, ga hepa kupura mukuronambunga gwapeke ndi mukwafimbunga, ano nsene ukaro kapi una kuvapulisira, kuvhura a pure muzuvhisi gosihonena sosiwa mokukapitisira.

³² Mupitisili gokambunga ga hepa kudivisa womokambunga kendi kuhamena edinguro lyomutareli goyirugana yokuzuvhisa, yipo vazuvhisi va liwapaikire. Nsene navenye womokambunga va diva siruwo sedinguro olyo, ngava liwapaikira mokuyakara po.

³³ Ayo ya wapa asi nkenye kambunga ka kare novazuvhisi wovasesu. Eyi kurerupika mupitisili gokambunga a va dive nawa. Mupitisili geharo, age kulikida elituromo mwankenye gumwe. Age kukondja mokukorangenda nkenye gumwe gomokambunga, yipo a kwatese ko yirugana yokuzuvhisa nomapongo. Age kukondja mokuvatera nkenye gumwe mokambunga a nkondopeke elikwatakano lyendi naJehova. Vanavazinyetu ava ava dompo mutjima nava wokuvera-vera kugwanena mo uwa medinguro lyendi. Nonkango dekorangedo ndi evyukiso kuvhura kutumangeda vamwe va kondjere yitumbukira mombungakriste ano eyi ngayi vatera vanavazinyetu. Mupitisili gokambunga, unene po ga hepa kuvatera womokambunga kendi. Nye ngomukuronambunga ntani ngomusita, age ga kara nosinka kwanavenye womombungakriste ntani nokuvatera ava vana hepa ekwafo.—Yirug. 20:17, 28.

³⁴ Situmbukira simwe somupitisili gokambunga kuna kara sokupongaika nonzapo domoyirugana yokuzuvhisa dava womokambunga kendi. Ano nonzapo odo kudigava kwahamutjanga. Vazuvhisi navenye kuvhura kuvatera mupitisili gokambunga pokugava nkenye apa nonzapo dawo usimbu. Eyi kutanta asi kugava nonzapo dawo komupitisili gokambunga kehagero lyankenye kwedi ndi kuditura mosimbangu somoSinyanga soUhompa esi va wapaikira nonzapo domoyirugana yokuzuvhisa.

KOMITIYE ZOYIRUGANA YOMOMBUNGAKRISTE

³⁵ Koyili yirugana yimwe eyi azi pakere mbili Komitiye zoyirugana yomombungakriste, komitiye ozo kwa hamena mo muwapaiki gombunga zovakuronambunga nahamutjanga ntani mutareli goyirugana yokuzuvhisa. Pasihonena, komitiye ozo yizo azi pulisire Sinyanga va ruganene mo silika sekwareko ndi sonomfa ntani yizo azi tokora asi mokambunga musinke na hamena nkenye muzuvhisi. Komitiye ezi, yizo hena azi tambura mahundiro gokukara muzuvhisi gokuvatera ndi gokukarerera ntani nomahundiro gamwe hena. Komitiiye ezi kwa kara megendeso lyombunga zovakuronambunga.

³⁶ Yitumbukira yokomitiye zoyirugana yomombungakriste neyi yava ava pitisire Ruhungu, ntani nava ava pitisire epongo lyoSikora zoUkareli ntani novakuronambunga navenye, kutunda koBeteli.

³⁷ Poyiruwo noyiruwo vakuronambunga mwankenye mbungakriste kuponga kumwe yipo va zogere ezokomeho lyombungakriste. Mokugwederera ko komapongo govakuronambunga aga ava kara nago pedinguro lyomutareli gonombunga, awo kukara hena nepongo konyima zomakwedi gatatu kutunda pedinguro lyomutareli gonombunga. Nampili ngoso, vakuronambunga kuvhura kuponga nkenye siruwo nsene pana kara hepero morwa ukaro wongandi.

OMU LIMBURUKWE VAPITISILI

³⁸ Vapitisili kapi va sikilira mo, nampili ngoso, navenye womombungakriste kuna kuvakorangeda mokuvalimburukwa morwa alyo ewapaiko lyaJehova. Vapitisili ngava ka zeresera yirugana yawo kwaKarunga. Awo kumukarera po ntani noupangeli wendi. Vahebeli 13:17 kutanta asi: “Omu limburukwe oku tomu zuvhu vapitisili veni, yeeyi awo kutakamesa nomwenyo deni, ngwendi vava ava di zeresere Karunga. Nsene mu va limburukwa, tava yi rugana nehafo, kapisi nomutjimakoka, yeeyi kapi yi mu kwafe.” Moomu tupu Jehova a ruganesa mpepo zokupongoka mokuhorowora muntu, yimo hena nga ruganesa mpepo zendi mokugusa muntu situmbukira sendi nsene kapi ana kulikida yiyimwa yompepo ndi kapi ana kusikisa mo yihepwa yomoMatjangwa.

³⁹ Ose kuhafera elituromo lyovapitisili womombunga nosihonena sawo sosiwa ndi? Mokutjangera mbunga zoVatesaronika, Paurusa kwa korangedere vapuli vakwawo asi: “Tatu mu hundire, vakwetu, omu fe nonkenga ava ava mu ruganene, ava ga horowora Hompa, va mu gendese oku tava mu rongo. Omu va tekure pakuto neharo lyenene morwayirugana eyi va rugana.” (1 Tes. 5:12, 13) Elituromo lyenene lyovapitisili wombunga kuninkisa sirugana setu kwaKarunga si rerupe ntani tu si hafere unene. Ntani hena, mombilive zendi zokuhova kwaTimoteusa, Paurusa kwa tumbwire yikara eyi va hepa kulikida womombungakriste kovapitisili pokutanta asi: “Vakurona wombungakriste ava ava zi pitisire nawa, ava va fumadeke unene, unene vava ava rugana unene mokuudisa nomokuronga.”—1 Tim. 5:17.

YITUMBUKIRA YIMWE MOMBUNGA ZAJEHOVA

⁴⁰ Poyiruwo yimwe, vakuronambunga wongandi kurugana ngovahameni woMbunga zokudingura vaveli. Vamwe kurugana moKomitiye zeruganeno kumwe noSipangero ntani nokukadingura yipangero novadokotora mokukavakorangeda va ruganese uhaku wokudira honde kovaveli woNombangi daJehova. Vamwe hena kutwara komeho sirugana soUhompa pokuvatera kutunga nokuwapukurura Yinyanga yoUhompa neyi yoYigongi ndi kurugana moKomitiye zeyi zoyigongi. Elituromo lyovanavazinyetu owo ntani neharo lyawo lyokulizambera kuhafesa navenye mombunga zaJehova. Yosili, vantu wokufana ngoso twa “fira kuvafumadeka.”—Fil. 2:29.

MUTARELI GONOMBUNGA

⁴¹ Mbungagendesi kwa tura po mawapaiko mokuhorowora vakuronambunga wokuwapera va kare vatareli wonombungakriste. Beteli yizo azi va tumu va ka dingure nombungakriste ruvali momvhura edi da hamena moruha oru ava pakere mbili. Poyiruwo noyiruwo, awo kukadingura vazuvhisi wokukarerera va kara konomukunda dokoure. Awo kutura po mawapaiko gedinguro lyawo nokudivisa nkenye mbungakriste komeho zosiruwo yipo wovanzi ngava gwanene mo uwa medinguro olyo.

⁴² Muwapaiki gombunga zovakuronambunga yige a pitisire mokuwapaika yininke yipo wovanzi va ya gwanene mo ekorangedo medinguro. (Rom. 1:11, 12) Apa ava gwana ediviso lyedinguro lyomutareli gonombunga namukadendi (nsene ga kwara) ntani neyi vana hepa, muwapaiki gombunga zovakuronambunga kuzogera novanavazinyetu wokulisiga-siga yipo va ture po mawapaiko gomararo ntani noyihepwa yimwe hena. Age kudivilisa asi navenye vana va divisa kuhamena mawapaiko ogo, kukwatera mo mutareli gonombunga.

⁴³ Mutareli gonombunga kuzogera nomuwapaiki gombunga zovakuronambunga kuhamena elikwamo lyomapongo neli lyoyirugana yokuzuvhisa. Ayo kuyiwapaika kuliza nomagano gomutareli gonombunga ntani nomavyukiso gokutunda koBeteli. Navenye kuvadivisa komeho zosiruwo kuhamena mapongo gomombungakriste naga govazuvhisi wokukarerera naga govakuronambunga novakwafimbunga ntani nomapongo gosirugana sokuzuvhisa.

⁴⁴ MoUvali kositenguko, mutareli gonombunga kukonakona sikarata sankenye muzuvhisi ava tumbura asi Congregation’s Publisher Record nosivaro sava ava wiza komapongo noyikarata yonomukunda dokuzuvhisira ntani yimaliwa yombungakriste. Eyi kumuvatera a dive yihepwa yombungakriste ntani nomu na vhura kuvatera ava ava didilike mauzera ogo. Muwapaiki gombunga zovakuronambunga ga hepa kutura po mawapaiko yipo mutareli gonombunga a gwane mauzera ogo komeho zosiruwo.

⁴⁵ Pedinguro, mutareli gonombunga kulitulira po siruwo sokuzogera nankenye munazinyetu, yi kare asi komapongo ndi moyirugana yokuzuvhisa ndi posiruwo somuzuhwa ndi posiruwo sapeke. Ntani hena, age kuponga novakuronambunga novakwafimbunga a zogere nawo mapukururo gomawa nomagano ntani nomakorangedo gomoMatjangwa aga naga va vatera va sikise mo yitumbukira yawo yokupakera mbili siunda. (Yis. 27:23; Yirug. 20:26-32; 1 Tim. 4:11-16) Age kuponga hena novazuvhisi wokukarerera a va korangede kosirugana sawo ntani a va vatere komaudigu aga ava ligwanekere nago mokuzuvhisa.

⁴⁶ Nsene asi pana kara yuma yimwe yina hepa evatero lyendi, mutareli gonombunga kulitulira po siruwo mokatji kosivike a gave evatero olyo. Nsene kapi nava mana yuma oyo posiruwo oso, mutareli gonombunga kuvhura kuvatera vakuronambunga ndi ava vana kugendesa udigu owo va papare mavyukiso moMatjangwa kuhamena udigu owo. Nsene pana kara hepero zokudivisa ko Beteli, mutareli novakuronambunga va hepa kugava mauzera ogo koBeteli.

⁴⁷ Posiruwo sedinguro lyombungakriste, mutareli nage kulihameka mo momapongo nkenye apa. Kuvhura pa kare marunduruko poyiruwo noyiruwo kuliza nomavyukiso gokutunda koBeteli. Age kuyagava yiuyungwa mokukorangeda nokunkondopeka nokuronga mbungakriste. Age kukondja mokukorangeda vantu va kare neharo lyokuhara Jehova naJesus ntani mbunga zendi.

⁴⁸ Sitambo simwe sedinguro lyomutareli gonombunga sokukorangeda vazuvhisi va zuvhise noupampi ntani nokuvapa ko magano gomawa. Womombungakriste kuvhura va ture po marunduruko melikwamo lyawo yipo va ya lihameke unene mokuzuvhisa mosivike somutareli, ngwendi pokurugana uzuvhisi wokuvatera posiruwo sedinguro. Nkenye ogu ana hara kurugana nage ndi namukadedi ga hepa kutura po mawapaiko. Ayo ya wapa kutwara mutareli gonombunga ndi mukadendi kovarongwa woBibeli ndi komatengwiroko. Elituromo lyoge lyokukwatesa ko edinguro lyomutareli mulyo sili unene.—Yis. 27:17.

⁴⁹ Nkenye mvhura, yigongi yivali yezuva limwe kuyitulisa po momaruha gonomukunda. Mutareli yige a gendesa yigongi oyo. Age kuhoworora mugendesi gosigongi ntani nomuvateli. Awo kuruganena kumwe nendi mokugendesa sigongi sezuva limwe. Eyi kuvatera mutareli gonombunga a tarere omu lina kugenda elikwamo nalinye. Mutareli kuhorowora hena vagara wokuwapera vamwe va rugane konodepartemende dokulisiga-siga. Age kutura po mawapaiko gokukonakona yimaliwa konyima zankenye sigongi. Sigongi simwe kuzigendesa munazinyetu gokutunda koBeteli ogu a ya kara muuyungi gomugenda. Morwa sinano sa hamena mo ndi morwa mavango ava ruganene sigongi oso manunu, nombunga dimwe kudihangura momaruha kuliza nonomukunda.

⁵⁰ Mutareli gonombunga kutuma nzapo zendi zoyirugana yokuzuvhisa koBeteli kehagero lyankenye kwedi. Nsene pana hepa yifutwa yongandi, ngwendi yomorugendo nonondya nomararo ntani nayimwe hena mokusikisa sirugana sendi, ntani nsene mbungakriste kapi zina kuvhura kuyifuta, mutareli kuvhura kuyituma koBeteli. Vatareli va yi diva asi nsene va tura muhowo Uhompa waJehova, yihepwa yawo ngava yi va gwederera ko, ngamoomu ga yi uyungire Jesus. (Ruk. 12:31) Womonombungakriste kulikida eharo lyawo pokutambura vatareli momambo gawo ndi kulya kumwe nawo.—3 Joh. 5-8.

KOMITIYE ZOBETELI

⁵¹ Mwankenye Beteli zoNombangi daJehova mouzuni mudima, vanavazinyetu wovagara ava va tjira Karunga vatatu ndi wongandi kuvahorowora va kare moKomitiye zoBeteli yipo va gendese sirugana sokuzuvhisa mosirongo ntani nomoyirongo eyi ya kara mepitisiro lyoBeteli ozo. Gumwe gwawo kukara muwapaiki goKomitiye zoBeteli.

⁵² Ava va kara moKomitiye zoBeteli kugendesa yininke yonombungakriste edi da kara mepitisiro lyawo. Komitiye ezi, kugendesa sirugana sokuzuvhisa mbudi zongwa zoUhompa monomukunda da kara mepitisiro lyoBeteli ntani kudivilisa asi nombungakriste nomutareli kuna kugendesa nawa sirugana sokuzuvhisa. Komitiye zoBeteli kupakera mbili hena vatumwa ntani vazuvhisi wosiruwo nasinye nava wokukarerera ntani wokuvatera. Posiruwo soyigongi yomazuva gatatu neyi yezuva limwe, komitiye ozo kutura po mawapaiko ntani kugava yiuyungwa kovanavazinyetu yipo nayinye va yi “rugane monkedi zongwa zokuliza.”—1 Kol. 14:40.

⁵³ Komitiye zoSirongo kuzihorowora moyirongo yimwe eyi ya kara mepitisiro lyoKomitiye zoBeteli zomosirongo sapeke. Eyi kuninkisa sirugana sokuzuvhisa si gende po nawa moyirongo omu za kara Komitiye ozo. Azo kupakera mbili yihepwa yoBeteli nonomberewa detoroko ntani kulimburura nombilive, nye unene po kugendesa sirugana sokuzuvhisa. Komitiye zoSirongo kuruganena kumwe noKomitiye zoBeteli yipo va tware komeho sirugana soUhompa.

⁵⁴ Mbungagendesi yizo azi horowora navenye ava va hamena moKomitiye zoBeteli nezi zoSirongo.

VAKARELIPO WOMBEREWA ZONENE

⁵⁵ Poyiruwo noyiruwo, Mbungagendesi kutura po mawapaiko gokutuma vanavazinyetu wokuwapera va ka dingure nkenye Beteli mouzuni mudima. Vanavazinyetu owo kuvatumbura asi vakarelipo womberewa zonene. Edinguro eli kuna kara lyokukorangeda Vabeteli nokuvatera Komitiye zoBeteli komaudigu nomapuro aga ava ligwanekere nago mosirugana sokuzuvhisa nesi sokutura po varongwa. Munazinyetu ogo kuzigida vatareli wonombunga ntani novatumwa ava va kara mepitisiro lyoBeteli ozo ana kudingura. Age kuyazogera kumwe nawo maudigu noyihepwa yawo nokuvakorangeda kuhamena sirugana sawo somulyo sokuzuvhisa Uhompa ntani sokutura po varongwa.

⁵⁶ Vakarelipo womberewa zonene kwa hara kuzuvha omu sirugana sokuzuvhisa sina kutompoka monomukunda vana kuzuvhisira Uhompa ntani neyi dina hepa nombungakriste dimwe. Nsene siruwo ko, age pamwe kudingura hena nomberewa detoroko dokoure. Apa vakarelipo womberewa zonene ava dingura Beteli, nawo kulihameka mo mosirugana sokuzuvhisa Uhompa nsene siruwo sina va pulisire.

EPITISIRO LYEWA

⁵⁷ Ose kugwanena mo mauwa mosirugana nemepakerombili lyovagara woVakriste ava va tjira Karunga. Ngomu tuna kutwikira kulimburukwa vapitisili ava ava pakere mbili siunda, ose ngatu kara mouumwe naJesus Kristusa, Mutwe gombungakriste. (1 Kol. 16:15-18; Efe. 1:22, 23) Ngoyitundwamo, mpepo zaKarunga ngazi gendesa nombungakriste mouzuni mudima ntani Nonkango daKarunga ngadi twikira kuvyukisa sirugana apa pevhu.—Epis. 119:105.