Vakwafimbunga kurugana sirugana somulyo

KOMBUNGAKRISTE zomoFilipi, mupositoli Paurusa kwa tjenge asi: “Mbilive ezi kuna kutunda koPaurusa naTimoteusa, vakereli vaJesus Kristusa, zi ze kovapongoki navenye mwaJesus Kristusa, ava mwa kara moFilipi, nokovapitisili nokovakwafi wonombungakriste.” (Fil. 1:1) Koneka asi age kwa tumbwire vakwafimbunga. Kutunda kwanare, vagara ava kwa kara nositumbukira somulyo mokuvatera vakuronambunga. Ayo ya lifana nomomazuva getu. Vakwafimbunga kurugana sirugana sokuvatera vakuronambunga ano eyi kuninkisa mbungakriste zi gende monaruwa.

² Wa diva asi wolye vakwafimbunga womombungakriste zeni ndi? Ove wa diva asi yirugana yawo kukuretera uwa ntani nava womombungakriste navenye ndi? Elituromo lyovagara owo, Jehova kulitara asi mulyo. Paurusa kwa tjenge asi: “Ava ava rugana nawa, kugwanena mo efumano nemanguruko lyenene mokuuyunga yepuro eli va kara nalyo mwaJesus Kristusa.”—1 Tim. 3:13.

YIHEPWA YOMOMATJANGWA YOVAKWAFIMBUNGA

³ Vakwafimbunga kundindira ko kwawo va kare nonkareso zongwa ngovagara wokuhuguvara ntani va sikise mo sirugana sawo monkedi zokuwapera. Eyi kuyimonenena apa atu konakona eyi ga uyungire Paurusa kuhamena yihepwa yawo mombilive ezi ga tjangerere Timoteusa asi: “Vakwafi womombungakriste nawo ava kare wononkedi donongwa, kapisi okagoma mbetakuvali ndi womanwinina ndi wokudowokera emona. Awo ava kwaterere moyihoramo yepuro mezwi lyewa lyomomutjima. Nawo pomuhowo kuvatara tanko; nsene nye nayimwe si vana kulimbika po, ntani nye vana kurugana youkereli. Nkenye mukwafi gombungakriste a kare nomukadi gumwe tupu. Awo hena ava gendese nawa mambo gawo noruvharo rwawo.” (1 Tim. 3:8-10, 12) Kukwaterera konkareso zongwa ezi va tulira po vakwafimbunga, kupopera mbungakriste komarundiro aga aga wiza po kuhamena vagara ava va kara noyitumbukira.

⁴ Yi kare asi vadinkantu ndi vakondi, vakwafimbunga kulihameka unene mokuzuvhisa nkenye kwedi. Mokuhonena Jesus, awo kuzuvhisa noupampi. Upampi wangoso, kulikida asi Jehova kwa hara kuzowora vantu.—Jes. 9:7.

⁵ Vagara ava va kara asi vakwafimbunga va hepa kukara sihonena sosiwa mondwareso nomomaliwapaiko nomombuuyungiso ntani monkareso zawo. Awo vantu wonondunge, ava wopeke ava fumadeke. Ntani hena, kwa kara nosinka selikwatakano lyawo naJehova ntani noyitumbukira yawo yomombungakriste.—Tit. 2:2, 6-8.

⁶ Vagara ava “kuvatara tanko” nsene vana wapere. Komeho zokuvapa situmbukira, va hepa kuyilikida asi va ligava sili. Va hepa kuyilikida asi kwa tura muhowo Uhompa meparu lyawo ntani kuna kusikisa mo nkenye sirugana esi nava gwana. Va hepa kukara sihonena sosiwa kwava womombungakriste.—1 Tim. 3:10.

OMU AVA VATERE

⁷ Vakwafimbunga kurugana yirugana yokulisiga-siga mokuvatera vapuli vakwawo, ngwendi kuza kumwe novakuronambunga pokukadingura vanavazinyetu. Pokuvapa yirugana, vakuronambunga kutara tanko yihepwa yomombunga.

⁸ Konakona yimwe yoyirugana oyo: Mukwafimbunga gumwe kuvhura kumupa sirugana sokupakera mbili yimbapiratjangwa yipo tu yi ruganese nyamwetu ntani nomokuzuvhisa. Vamwe kuvaninka va rugane kokuvarura yimaliwa ndi mokudidilika nomukunda dokuzuvhisira. Vamwe hena kurugana komambako nokukara vavateli ntani nokuvatera vakuronambunga mononkedi dokulisiga-siga. Pwa kara yirugana yoyinzi mokupakera mbili Sinyanga soUhompa nokusizeresa, yiyo vakwafimbunga va hepera kuvatera moyirugana oyo.

⁹ Monombungakriste dimwe, nkenye mukwafimbunga kuvhura kumupa sirugana simwe. Ano monombungakriste dapeke, mukwafimbunga kuvhura kurugana yirugana yokulisiga-siga. Ano pamwe, vakwafimbunga wokupitakana pwagumwe kuvhura kurugana sirugana simwe. Nsene vakwafimbunga vasesu, vakuronambunga kuvhura kuhorowora munazinyetu gomugara gosihonena sosiwa ogu ga gwana ekuho yipo a rugane sirugana oso. Eyi ngayi mu vatera konyima zosiruwo apa ngava ya mu horowora a kare mukwafimbunga. Nsene kapi pana kara vanavazinyetu wovagara, munazinyetu gomukadi gosihonena sosiwa kuvhura kumupura a vatere, nampili ngomu nava dira kumuhorowora ngomukwafimbunga. Muntu ogu ga wapera kuvatera mombunga googu ga kara nononkedi donongwa ntani ga kara nosihonena sosiwa. Age sihonena sosiwa kwava wopeke mokuza komapongo nomokuzuvhisa, nokukara nonkareso zongwa mepata nokuhorowora yilihafeso yoyiwa ntani nondwareso zongwa nomaliwapaiko gokuwapera.

¹⁰ Nsene mombungakriste kwa kara mo vakuronambunga wovasesu, vakwafimbunga wokuwapera kuvhura kuvapura va rugane mapuro gekuho kwava vana hara kugwana ekuho. Eyi kuyigwana komagwedereroko “Ruha 1: Eyi va pura Vakriste.” Mokumona asi “Ruha 2: Mparukiso zoVakriste” kwa hamena mo yininke yemehoramo, mukuronambunga ga hepa kurugana ruha oro.

¹¹ Nsene pana kara konda zongwa, mbunga zovakuronambunga kuvhura kurundwilira sirugana oso kovakwafimbunga wokulisiga-siga poyiruwo noyiruwo. Nampili ngoso, ya wapa kovanavazinyetu va rugane sirugana sokulifana yipo va kare noudivi ntani va wapere sirugana oso.

¹² Kuliza noukaro womomukunda, kuvhura pa kare yitumbukira eyi nava vhura kugwana vakwafimbunga ava va kara asi ‘kukura kwawo kukumona navenye.’ (1 Tim. 4:15) Nsene vakuronambunga vasesu, mukwafimbunga kuvhura va mu ture a kare muvateli gomupitisili gokambunga ndi muvateli gokambunga ogu a rugana mepitisiro lyovakuronambunga. Vakwafimbunga kuvhura kuvapa va rugane maruha gamwe gemepongo Eparu lyetu noyirugana yokuzuvhisa, kukwatera mo kurugana Elirongo lyoBibeli lyoMbunga ntani nokugava yiuyungwa yanavenye. Yirugana yimwe kuvhura va yi pe vakwafimbunga nsene pana kara hepero ndi nsene vana wapere sirugana oso. (1 Pet. 4:10) Mokuvatera vakuronambunga, vakwafimbunga va hepa kuligava vene nomutjima nagunye.

¹³ Nampili ngomu sirugana sawo sa lisiga nesi sovakuronambunga, aso sirugana sokupongoka kwaKarunga ntani mulyo yipo mbungakriste zi gende po nawa. Mwaza siruwo, nsene vakwafimbunga va sikisa mo yitumbukira yawo nawa nokuyakara vasita novarongi wovawa, awo kuvhura kuvahorowora va kare vakuronambunga.

¹⁴ Nsene ove munazinyetu gomugara gomudinkantu ndi ntani tupu ko gwene ekuho, ove kuna kukondja mokusikisa mo yihepwa yokukara mukwafimbunga ndi? (1 Tim. 3:1) Mokumona asi vantu wovanzi kuna kutambura usili nkenye mvhura, kuna hepa vagara ava va tjira Karunga yipo va pakere mbili mbungakriste. Kuvhura o yi sikise mo pokutunga po eharo lyokuvatera wopeke. Nkedi zimwe zokuyisikisa mo oyo kuna kara pokugazadara ko kosihonena saJesus sosiwa. (Mat. 20:28; Joh. 4:6, 7; 13:4, 5) Ngomu ngo limonena ruhafo rokuvatera wopeke, eharo lyoge ngali kura. (Yirug. 20:35) Yipo nye, lizambera mokugava evatero kwava wopeke nokuvatera kuwapukurura Sinyanga soUhompa ndi kuvatera pokugava siuyungwa somurongwa ogu ana dili kumoneka somoMbapira zetu zekEpongo. Mokuyisikisa mo oyo, kwa kwatera mo kutunga po yikara yoSikriste pokukara nelikwamo lyewa lyelirongo lyanyamoge. (Epis. 1:1, 2; Gar. 5:22, 23) Ntani hena, munazinyetu gomugara ogu ana hara kukara mupitisili ga hepa kukara gokulimburukwa ntani gokuhuguvara nsene vana mu pe yirugana yomombungakriste.—1 Kol. 4:2.

¹⁵ Vakwafimbunga kuvahorowora kupitira mompepo zokupongoka yipo mbungakriste zi gwanene mo uwa. Womombungakriste kuvhura kulikida rupandu kelituromo lyovakwafimbunga pokuruganena kumwe nawo ngomu vana kupakera mbili yitumbukira yawo. Monkedi zangoso, mbungakriste ngazi likida rupandu kewapaiko lyaJehova lyokugendesa yininke monkedi zongwa zokuliza.—Gar. 6:10.