Nzogera zokuhagesa kumwe novagwani ekuho

Ekuho nkenye apa kulirugana poyigongi yoNombangi daJehova. Kehagero lyosiuyungwa sekuho, muuyungi kupura ava vana kugwana ekuho va sikame nokulimburura mapuro gavali gana kukwama ko nezwi lyokudameka lyokuzera:

1. One mwa litezurura kononzo deni nokuligava nyamweni kwaJehova ntani nokutambura ewapaiko eli ga tura po kupitira mwaJesus yipo ngomu ka gwane eparu ndi?

2. Mwa yi kwata egano asi ekuho lyeni kumudimbwilisa asi one ngesi Nombangi daJehova ava muna ya hamene kombunga zendi ndi?

Pokulimburura “nhi” komapuro aga, ava vana kugwana ekuho tava gava ‘undipo nokana kawo’ asi va pura mosizoweseso ntani asi awo va ligava kwaJehova nomutjima nagunye. (Rom. 10:9, 10) Yipo nye, ava vana kugwana ekuho va hepa kugazadara ko nokukanderera kuhamena mapuro aga komeho zosiruwo yipo va vhure kulimburura kuliza nepuro lyawo.

Wa ligava nyamoge kwaJehova mekanderero, pokumutumbwidira mokumukarera gelike ntani nokutura mpango zendi muhowo meparu lyoge ndi?

Ove ngesi ono liwapaikire mokukagwana ekuho posigongi sokukwama ko ndi?

Mudwaro musinke gwa wapera ekuho? (1 Tim. 2:9, 10; Joh. 15:19; Fil. 1:10)

Twa hepa kudwara yidwara “yoyiwa yokuliza nonkareso zongwa” yipo tu likide asi twa “tjira Karunga.” Yipo nye, ava vana kugwana ekuho kapisi va dware yokumonekesa rutu ndi yokutjangagura ndi yokufanaika yininke. Va hepa kudwara nawa ntani monkedi zokulikida efumadeko kosilika.

Nkareso musinke na likida muntu pokugwana ekuho? (Ruk. 3:21, 22)

Ekuho lyaJesus kwa kara sihonena sosiwa komakuho goVakriste naina. Age ga nongwenene asi ekuho ntambo zomulyo unene, ano eyi kwa yi likidire monkareso nomoyirugana yendi. Yipo nye, kevango lyokukuhwira kapi tali kara evega lyonomuteu ndi lyokuzogana ndi lyonomukaro dapeke edi ngano nadi yipikisa mulyo gosilika. Ogu ana kukagwana ekuho konyima zekuho kapisi a likide nkareso zokudira kuzira mo ngwendi googu asi kuna gwana efundo lyenene. Nampili ngomu ekuho aso silika soruhafo, ruhafo oro rwa hepa kurulikida monkedi zefumadeko.

Ngapi kulipakerera nombungakriste ngayi ku vatera o sikise mo eligawo lyoge kwaJehova?

Nampili konyima zekuho lyoge, morwasinke ngayi karera mulyo koge mokukara nelikwamo lyewa lyelirongo lyanyamoge ntani nokulihameka mosirugana sokuzuvhisa nkenye apa?

MAPUKURURO KOVAKURONAMBUNGA

Nsene muzuvhisi gokudira kugwana ekuho a divisa vakuronambunga asi ana hara kumukuhwa, va hepa kumukorangeda a konakone nawa ruha “Mapuro kwava vana hara kugwana ekuho,” pepenuno 185-207 mobuke ezi. Ntani a ka tare hena ruha “Mbudi komuzuvhisi gokudira kugwana ekuho,” ezi za tamekera pepununo 182 nokufaturura omu na vhura kuliwapaikira nonzogera kumwe novakuronambunga. Ngomu va yi didilika, muntu ogu ana hara kugwana ekuho kuvhura a ruganese madidiliko gamwene goposipepa sokulikarera ntani kuvhura a penune buke ezi posiruwo sonzogera. Nampili ngoso, kapisi hepero kukonakona mapuro ogo nomuntu ogu komeho a ka ga zogere novakuronambunga.

Nkenye ogu ana hara kugwana ekuho ga hepa kudivisa muwapaiki gombunga zovakuronambunga. Nsene muntu ogu ana hara ekuho ga mana kukonakona “Mapuro kwava vana hara kugwana ekuho,” muwapaiki gombunga zovakuronambunga nga mu pura nsene ga ligava nare mwene kwaJehova mekanderero mokurugana mpango zendi. Nsene ga ligava nare kwaJehova, makura muwapaiki gombunga zovakuronambunga nga tura po mawapaiko novakuronambunga vavali va zogere nomuntu ogo “Mapuro kwava vana hara kugwana ekuho.” Ya wapa nkenye ruha aru rugane mukuronambunga gwapeke. Kapisi hepero kundindira dogoro va divise mazuva gosigongi ntani nomu puragera ava vana hara kugwana ekuho.

Nkenye ruha va hepa kururugana konyara vili zimwe, nampili ngomu pwa pira kukara esiliko lyokuruganesa siruwo sosinzi nsene hepero. Ntani ya wapa nkenye ruha va ru tameke nokukaruhagesa nekanderero. Ogu ana hara kugwana ekuho ndi mukuronambunga kapi va hepa kumugenderesa pokurugana mapuro. Nsene kuvhura, mukuronambunga a tare ruha rwendi asi mulyo nokulitulira po siruwo sokururugana.

Ya kara nomulyo kuzogera mapuro nankenye muntu pwagelike, kapisi ngombunga. Pokuzuvha malimbururo gogu ana hara kugwana ekuho mwankenye epuro, vakuronambunga ngava yi dimburura nsene asi ana yi kwata sili egano ntani nsene asi ana wapere kugwana ekuho. Kugwederera ko, tayi rerupire muntu ogo mokuuyunga nemanguruko. Valikwali kuvhura kuvapuragera kumwe.

Nsene ogu ana hara kugwana ekuho munazinyetu gomukadi, nzogera va hepa kuziruganena kevango apa nava va mona vantu, nye kapisi va zuvhe eyi vana kuzogera. Nsene hepero kupitura ko muntu gumwe, ga hepa kukara mukuronambunga ndi mukwafimbunga, kuliza noruha oro vana kuzogera, ngomu va yi likida moparagarafu zokukwama ko.

Nsene mombungakriste vakuronambunga vasesu mo, vakwafimbunga wokuwapera kosirugana oso kuvhura va zogere mapuro nomuntu ogu ana hara kugwana ekuho “Ruha 1: Eyi va pura Vakriste.” Ano “Ruha 2: Mparukiso zoVakriste,” vakuronambunga tupu wokuhepa kururugana. Nsene mombungakriste kapi mwa kara vanavanzinyetu wovagara wokuwapera sirugana oso, mutareli gonombunga ga hepa kuhundira mbungakriste zapeke yipo zi vhure kuvatera.

Nsene ogu ana hara kugwana ekuho munona, vakondi vendi woNombangi va hepa kukara po. Nsene vakondi vendi nokuvhura si kukara po, makura mwankenye ruha va hepa kuhamena mo vakuronambunga vavali (ndi mukuronambunga nomukwafimbunga, kuliza noruha oru vana kuzogera nage).

Vakuronambunga ngava divilisa asi muntu ogu ana hara kugwana ekuho ga kara nediwo lyokugwanena po lyomadi gerongo lyoBibeli. Ntani, awo ngava divilisa nsene ga hara usili nokulikida efumadeko kombunga zaJehova. Nsene muntu ogo kapi ana kwata egano madi gerongo lyoBibeli, vakuronambunga ngava mu wapaikira a gwane evatero yipo ngayi mu tompoke kugwana ekuho sikando sokukwama ko. Vamwe va hepa kuvapa siruwo sokugwanena po va yi likide asi sirugana sokuzuvhisa mulyo ndi va likide ulimburukwi kongendeseso zombunga zaJehova. Vakuronambunga va hepa kuruganesa nondunge pokugaununa siruwo esi naru gusa nkenye ruha yipo va divilise nsene ogu ana hara kugwana ekuho ana wapere. Nampili ngomu nava ruganesa siruwo sosinzi komapuro gamwe ano gamwe sosisupi, nye mapuro nagenye va hepa kugarugana.

Vakuronambunga ava va rugene mapuragero gekuho tava gwanekere konyima zokumanesa ruha rwauvali nokutokora nsene asi muntu ogu kuvhura a wapere ekuho. Vakuronambunga tava ka tarurura ntundiliro nediwo ntani noukaro wankenye ogu ana hara kugwana ekuho. Sitambo sawo sokutara nsene asi ogo muntu ga hara Jehova nomutjima gwendi nagunye ntani ga kwata egano madi gerongo lyoBibeli. Nevatero lyovakuronambunga, ava vana kugwana ekuho ngayi va tompoka mokusikisa mo sirugana sawo somulyo ngovazuvhisi wombudi zongwa.

Konyima zoyo, mukuronambunga gumwe ndi navenye ava va rugene mapuro va hepa kugwanekera nomuntu ogo va mu tantere asi ana wapere ekuho ndi hawe. Nsene ana wapere, vakuronambunga va hepa kuzogera nage ruha “Nzogera zokuhagesa kumwe novagwani ekuho,” pepenuno 206-207. Nsene muntu ogo kapi ga mana buke Hafera eparu narunye! vakuronambunga va hepa kumukorangeda a twikire kulironga dogoro nga zi mane. Diviseni muntu ogo asi ezuva lyendi lyekuho ngava li didilika posikarata Congregation’s Publisher Record ezi va tjanga edina lyendi. Va hepa kumudiworokesa asi vakuronambunga nava hepa mauzera gendi yipo mbunga zaJehova zi twikire kupakera mbili yirugana yokuzuvhisa yoNombangi daJehova uzuni mudima ntani asi a vhure kulihameka mo yirugana eyi azi wapaike mbungakriste nokugwana makorangedo nomavyukiso kovakuronambunga. Tava mu tantere hena asi nkenye mauzera gomuntu kugaruganesa kuliza noveta Global Data Protection Policy zoNombangi daJehova za kara ko-jw.org. Nzogera ezi za hepa kukara tupu nominute murongo ndi dononsesu.

Konyima zomvhura zimwe, vakuronambunga vavali va hepa kugwana muzuvhisi ogo va kuhwa va mu korangede nokumupa ko magano gamwe. Gumwe govakuronambunga ga hepa kukara mupitisili gokambunga kawo komoyirugana yokuzuvhisa. Nsene age munona, vakondi vendi va hepa kukara po. Nzogera ozo za hepa kukara zongwa zokukorangeda. Vakuronambunga ngava zogera nage ezokomeho lyendi ntani nokumupa magano gomulyo omu na vhura kutwikira kukara nelikwamo lyelirongo lyamwene lyoBibeli nokuziresa nkenye ezuva nokukara noukareli wepata nkenye sivike nokuza komapongo nokukalihameka mo ntani nokuza mokuzuvhisa nkenye sivike. (Efe. 5:15, 16) Nsene kapi ga mana kulironga buke Hafera eparu narunye! vakuronambunga va hepa kutura po mawapaiko yipo gumwe a mu vatere. Vakuronambunga va hepa kugava epandadeko lyewa. Egano limwe ndi gavali kuvhura kugwanena po.