Awo kwa rwanesere Jehova

Apa Vaisraeli va kere momburundu, Kora naDatani naAbiramu novantu 250 kwa rwanesere Mosesa. Tava mu tantere asi: ‘Kapi tuna kuhara hena! Morwasinke no karera mupitisili gwetu ano mukuroge Arona a kare mupristeli gomunene? Jehova kwa kara nose natuvenye, kapisi nyovelike naArona.’ Jehova kapi ya mu hafesere. Age kwa yi tere asi yige va rwanesere.

Mosesa ta tantere Kora novakwami vendi asi: ‘Ngomu wize mungura konkongoronzugo ntani ngomu piture yipana yomundiro yomanganganga. Jehova nga tu likida asi yilye ga horowora.’

Ezuva eli lya kweme ko, Kora novantu 250 tava zi kwaMosesa konkongoronzugo. Awo kwa tutumikidisire manganganga ngwendi vapristeli. Jehova ta tantere Mosesa naArona asi: ‘Liporeni ko kwaKora novakwami vendi.’

Apa ga zire Kora kwaMosesa konkongoronzugo, Datani naAbiramu nomapata gawo kwa nyokere kuza. Jehova kwa tanterere Vaisraeli va lipore konotenta daKora naDatani ntani Abiramu. Makura tava lipora ko. Datani naAbiramu kumwe nomapata gawo tava sikama ponze zonotenta dawo. Makura evhu tali ligaunuka li va mine po navenye. Konkongoronzugo, mundiro kwa tundire meguru tagu hwike Kora novantu vendi 250.

Jehova ta tantere Mosesa asi: ‘Gusa mpango kwankenye mugendesi gorudi o tjange po edina lyendi. Nye mpango zomorudi rwaRevhi, tjanga po edina lyaArona. Ka di ture monkongoronzugo, ano mpango zomuntu ogu nina horowora ngazi hokera nombya.’

Ezuva eli lya kweme ko, Mosesa ta reta nompango a di likide vagendesi. Mpango zaArona yizo za hokerere nombya nenyango. Jehova ga yi likidire asi age kwa horowere Arona a kare mupristeli gomunene.