Sindongi saBaramu tasi uyunga

Vaisraeli kwa kere momburundu konyara nomvhura 40. Awo kwa fundire yitata yoyinzi. Apa va ya dikire kamba zawo momazana gaMowaba koUpumezuva womukuro Jorodana, aso kwa kere siruwo sokuhwilira moSirongo sEtumbwidiro. Baraka hompa goVamowaba kwa tjilire asi nampo Vaisraeli nava gusa sirongo sendi. Yipo ga zigidire mugara gedina Baramu a ya finge Vaisraeli.

Nye Jehova kwa tanterere Baramu asi: ‘Kapisi o ka finge Vaisraeli.’ Baramu ta nyoka kuza. Hompa Baraka ta mu zigida rwauvali nokumutantera asi nsene ngo wiza ngani ya kupa nkenye eyi ono hara. Nye Baramu simpe ta nyoka. Makura Karunga ta mu tantere asi: ‘Kuvhura o ze, nye to ka uyunga yeeyi ngani ka kutantera.’

Baramu ta katuka a ze nosindongi sendi koMowaba. Age kwa here kukafinga Vaisraeli nampili ngomu ga mu silikire Jehova. Muengeli ta mu monekere rutatu monzira. Baramu kapi ga mwene muengeli, nye sindongili sa mu mwene. Sikando sokuhova, sindongi tasi zapuka monzira. Sauvali, sindongi tasi likura kekuma nokusenenekeda mpadi zaBaramu. Sikando sokuhulilira, sindongili tasi bwakama monzira. Yikando nayinye oyo, Baramu kwa toonene sindongi nositji.

Konyima zoyo, Jehova ta ninki sindongi si uyunge. Sindongi tasi pura Baramu asi: ‘Morwasinke ono kutoonena nge?’ Baramu ta tanta asi: ‘Yeeyi ono monesa nge ugova. Ngano kani gendi nombere ngano nina ku dipaga.’ Aso tasi mu tantere asi: ‘Nare wa gusa kuronda nge, na kurugana rumwe ngesi ndi?’

Makura Jehova ta ninki Baramu a mone muengeli. Muengeli ta mu tantere asi: ‘Jehova ana ku rondora asi kapisi o ka finge Vaisraeli.’ Baramu ta tanta asi: ‘Nina zono. Tani tengura kembo.’ Nye muengeli ta mu tantere asi: ‘Kuvhura o ze, nye ka uyunge yeeyi na ka ku tantera Jehova.’

Baramu ga limburukwire nonkango odo ndi? Hawe. Apa ga ka sikire, ta hetekere ko kufinga Vaisraeli yikando yitatu, nye Jehova ta mu ninkisa a va tungike. Konyima, Vaisraeli tava rwisa Mowaba makura Baramu tava mu dipaga. Omu ono kugazara, ngano Baramu ga limburukwire Jehova, ngano ya mu waperere ndi?