Jehova ta horowora Josuwa

Konyima zokupitisira Vaisraeli nomvhura dononzi, Mosesa kwa kere pepi nokufa. Jehova yipo ga mu tanterere asi: ‘Kapisi nyove ngo twara Vaisraeli moSirongo sEtumbwidiro. Nye tani kulikida sirongo o si monene koure.’ Mosesa ta pura Jehova a horowore ogu nga pitisira Vaisraeli. Jehova ta mu tantere asi: ‘Zende o ka tantere Josuwa asi yige nga va pitisira.’

Mosesa kwa tanterere Vaisraeli asi ntaantani a fe, nye Jehova ana horowora Josuwa nga va tware moSirongo sEtumbwidiro. Mosesa ta tantere Josuwa asi: ‘Wa ha tjira. Jehova nga ku vatera.’ Makura Mosesa ta zi koNdundu zaNebo, oku Jehova ga ka mu likidire sirongo esi ga tumbwidilire Abirahamu naIsaka ntani Jakopo. Mosesa kwa fire age nomvhura dendi 120.

Jehova ta tantere Josuwa asi: ‘Tagurukeni mukuro gwaJorodana mu ze moKanani. Ngani ku vatera moomu na vaterere Mosesa. Resa nkenye ezuva Veta zange. Wa ha tjira. Kora. Rugana tupu eyi nina kukupangera.’

Josuwa kwa tumine vagara vavali va ka tare sitata saJeliko. Mosirongwa sokukwama ko, ngatu ka lironga eyi ya horokere. Vagara owo apa va ka tengwire, kwa ya tente asi aso kuna kara siruwo sosiwa kuza moKanani. Ezuva lyokukwama ko, Josuwa ta tantere Vaisraeli va rongere. Makura ta tantere vapristeli ava va simbire sikesa segwanekero va pite komeho va vyuke komukuro gwaJorodana. Mukuro kwa hanzere unene. Nye tupu vapristeli va lyete nompadi dawo momema, mukuro tagu hageke kupupa ano mema taga ligaunuka. Vapristeli kwa sikeme momukuro apa Vaisraeli navenye va tagurukire va ze mesinya mwina. Sitetu esi sa va diworokesere eyi ga rugene Jehova pEfuta lyEgeha ndi?

Konyima, Vaisraeli kwa ya hwililire moSirongo sEtumbwidiro. Awo kwa tungire mambo noyitata. Ntani va kere nomapya noyipata. Aso sirongo esi sa zulire masini nousi.