Josuwa noVangibiyoni

Mbudi zokuhamena Jeliko kwa lihene moKanani. Vahompa vawo tava tokora kulipakerera va rwise Vaisraeli. Nye Vangibiyoni kwa kere negano lyapeke. Awo kwa zire kwaJosuwa noyikoverero yokutavauka nokutanta asi: ‘Ose kuna tundu kosirongo sokoure. Twa zuvha eyi ga mu ruganena Jehova moEgipite nomoMowaba. Tu tumbwidireni asi kapi ngomu tu rwisa, makura ngatu kare vakareli veni.’

Josuwa ga yi pulire makura ta tumbwidire asi kapi nga va rwisa. Konyima zomazuva gatatu, ta yi dimburura asi pepi va kara. Awo kwa kere moKanani. Josuwa ta pura Vangibiyoni asi: ‘Morwasinke komu tu kumbagerere?’ Tava limburura asi: ‘Ose kwa tjilire. Tuna yi diva asi Jehova ana kumurwira mo. Mwa ha tu dipaga.’ Josuwa ga sikisire mo etumbwidiro lyendi lyokudira kuvadipaga.

Makura vahompa vatano womoKanani tava tokora kurwisa Vangibiyoni. Josuwa novakwayita vendi yipo va gendere masiku nagenye va ka popere Vangibiyoni. Makura ngurangura tava tameke kurwa. Vakanani kwa va fundire tava duka. Nye nkenye oku va dukilire Jehova kwa va zugumine kamanya gomunene. Josuwa ta kanderere kwaJehova a ninke ezuva li sikame. Morwasinke ga kandererere asi ezuva li sikame, alyo ezuva kapi lya sikama rumwe? Morwa Josuwa ga huguvarere mwaJehova. Ezuva kwa sikeme dogoro Vaisraeli tava mana kufunda vahompa woVakanani novakwayita vawo.