Etumbwidiro lyaJefuta

Vaisraeli kwa sigire hena Jehova, tava tameke kukarera yikarunga yoyimpempa. Apa Vaamoni va rwisire Vaisraeli, yikarunga oyo kapi ya va vaterere. Vaisraeli kwa va hepekere nomvhura dononzi. Makura tava kanderere kwaJehova asi: ‘Ose twa zona. Tu popera kononkore detu.’ Vaisraeli tava zonagura yikarunga yawo yoyimpempa va karere hena Jehova. Jehova kapi ga here asi va twikire kuvahepeka.

Makura ta horowora mugara gependa gedina Jefuta a pitisire vantu va ka rwise Vaamoni. Jefuta ta tantere Jehova asi: ‘Nsene no tu vatera tu funde yita eyi, apa ngani tengura kembo ngani kupa nkenye ogu nga hova kupwaga a hamberere nge.’ Jehova ga purakenene kekanderero lyaJefuta, makura ta mu vatere a funde yita.

Apa Jefuta ga ka tengwire kembo, munwendi gomukadona a huru thi yige ga hovere kumuhamberera. Age kwa dene oku ta siki kangoma. Yisinke ga rugene Jefuta? Age kwa diworokere etumbwidiro lyendi nokutanta asi: ‘Ani nane vakwetu! Ono guvisa mutjima gwange. Ame kwa tumbwidira Jehova. Mokulisikisa mo, na hepa kukugava o ka kare konkongoronzugo poSiro.’ Nye munwendi ta mu tantere asi: ‘Tate, nsene mwa tumbwidira Jehova, yi sikiseni mo. Peni nge ko tupu makwedi gavali ni ze konondundu ni ka kare novakadona vakwetu. Makura ntani ngani ya za.’ MunwaJefuta kwa karerere Jehova noulimburukwi konkongoronzugo eparu lyendi nalinye. Nkenye mvhura, vakwawo ngava zi koSiro va ka mu dingure.