Omu wa lihene Ukriste

Vapositoli kwa limburukwire mpangera zaJesus zokuhanesa mbudi zongwa mouzuni mudima. Momvhura 47, vanavazinyetu womoAntiyokiya kwa tumine Paurusa naBaranabasa va ka zuvhise. Vazuvhisi owo woupampi kwa zire moAsiya zonunu, monomukunda ngwendi Derube naLisitira ntani Ikoniya.

Paurusa naBaranabasa ngava zuvhisire nkenye ogu, a kare asi ngawo ndi hepwere ndi munona ndi mukondi. Vantu wovanzi va tambwire usili kuhamena Kristusa. Apa Paurusa naBaranabasa va zuvhisilire Seregiusi Paurusa, mupangeli gomoKipurusi, mpure zimwe kwa hetekerere ko kuvahagekesa. Paurusa kwa tanterere mpure asi: ‘Jehova ta ku handukire.’ Poopo ngoso, mpure tazi twika. Ano apa ga yi mwene mupangeli Seregiusi, ta kara mupuli.

Paurusa naBaranabasa kwa zuvhisilire nkenye oku, momambo nopomarandesero nomononzira ntani monosinagoge. Apa va verwire mugara gosirema moLisitira, ava va mwene sitetu oso kwa gazarere asi awo vakarunga yipo va here kuvatongamena. Nye Paurusa naBaranabasa tava tanta asi: ‘Tongameneni Karunga gelike! Ose nose tu vantu ngwendi nyone.’ Makura Vajuda vamwe tava wiza nokuzedagwira mbunga zi rwanese Paurusa. Mbunga tazi mu toona nomamanya, tava mu kokere ponze zositata, nokumusiga age mokufa ana karere. Nampili ngoso, Paurusa kapi ga fire! Vapuli vakwawo makura tava mu vatere nokumutwara mositata. Paurusa ta tengura koAntiyokiya.

Momvhura 49, Paurusa kwa zire morugendo rwauvali. Apa ga ka tengwire mokukadingura vapuli vakwawo moAsiya zonunu, age kwa zuvhisire mbudi zongwa dogoro koEuropa. Ta zi hena koAtena nokoEfeso nokoFilipi nokoTesaronika ntani komavango gamwe. Sirasa naRukasa naTimoteusa tava zi kumwe naPaurusa morugendo. Awo kwa ruganenene kumwe va tulise po nombungakriste nokudivatera di pame. Paurusa kwa kere moKolinte mvhura zimwe noharufa, a korangede vapuli vakwawo. Age kwa zuvhisire oku ta rongo nokutjangera nombilive nombungakriste. Age nga rugana notenta. Konyima, Paurusa ta tengura koAntiyokiya.

Momvhura 52, Paurusa kwa zire morugendo rwautatu, makura ta tamekere moAsiya zonunu. Age kwa zire koFilipi dogoro koKolinte. Nomvhura dongandi edi ga kere Paurusa moEfeso, nga rongo nokuverura nokuvatera mbungakriste. Age nga gava yiuyungwa nkenye ezuva momatungo gonosure. Wovanzi ava ngava mu purakene kwa rundwilire nkareso zawo. Apa ga mene kuudisa mbudi zongwa moyirongo yoyinzi, Paurusa ta tengura koJerusarema.