SIRONGWA 12

Uyunga nombili ntani nonkenda

1 Vatesaronika 2:7, 8

EYI NO RUGANA: Uyunga nomalizuvho gousili ntani likida vantu ava vana kupurakena asi ove wa va hara ntani ono hara kuvavatera.

Gazara ko vantu ava no ka uyungisa. Pokuliwapaikira gazara ko maudigu aga ava ligwanekere nago. Hetekera ko kudiva omu ava lizuvhu.
Horowora nawa nonkango edi no ka uyunga. Hetekera ko kuhengagwida nokunkondopeka vantu ono kuronga. Nyokera po nonkango edi nadi ka va handukisa ntani wa ha uyunga momudona epuliro lyoyimpempa lyovantu.
Pakera mbili vantu. Likida vantu asi ove kuvapakera mbili pokuuyunga nezwi lyombili ntani neligumaguro lyewa lyorutu. Ruganesa nawa sipara soge ntani menya-menya.

Nsene to resa ndi to uyunga, wa ha limonekesa pokuruganesa nomandunda eligumaguro lyorutu, eyi kuninkisa vantu va demenene koge mevango lyokupurakena kombudi zoge. Mokumona asi kunkondopeka tupu nonkango kwelike kapi ayi zeresa nawa egano, ya wapa kunkondopeka nondandazwi yipo o pwagese nawa malizuvho.