Wolye vaengeli ntani yisinke ava rugana?

Jehova ana hara tu dive epata lyendi lyemeguru. Mepata olyo kwa hamena mo vaengeli, ava ava tumbura asi “vana vaKarunga.” (Joba 38:7, NW) Yisinke za uyunga Bibeli kuhamena vaengeli? Ngapi omu vaengeli ava kundama vantu? Vaengeli navenye kwa hamena kepata lyaKarunga ndi?

1. Wolye vaengeli?

Jehova kwa sitire vaengeli komeho a site evhu. Awo yisitwa yopampepo ntani awo kwa kara meguru. (Vahebeli 1:14) Pwa kara mamiliyona govaengeli ntani awo kwa kara noyikara yokulisiga. (Ehororo 5:11) Awo ‘kulimburukwa yipango nokupurakena eyi a tanta’ Jehova. (Episarome 103:20) Pwanare, Jehova nga tumu vaengeli va tware nombudi nokuvatera vakareli vendi. Nye naina, vaengeli kuvatera Vakriste va gwane vantu ava vana hara kulironga kuhamena Karunga.

2. Yilye Satana ntani nompepo donondona?

Vaengeli vamwe kapi va twikilire kulimburukwa Jehova. Muengeli gokuhova ogu ga rwanesere Jehova kuna kara ‘Muzonaguli ndi Satana, ogu ana kupukisa uzuni naunye.’ (Ehororo 12:9) Satana kwa here kupangera, eyi yiyo ga pukisilire Adamu naEva. Konyima, age kwa pukisire hena vaengeli vamwe va rwanese Jehova. Vaengeli owo wovarwanesi yiwo ava tumbura asi nompepo donondona. Jehova kwa va tjidire mo meguru nokuvazugumina pevhu, ntani awo ngava ka va zonagura po.—Resa Ehororo 12:9, 12.

3. Ngapi omu Satana nonompepo donondona adi hetekere ko kutupukisa?

Satana nonompepo donondona kupukisa vantu kupitira moumpure ndi kuuyunga nonompepo donondona. Pasihonena, vantu vamwe kuza kovalirongi wonombungururu, koyimbanda ntani kovantu ava ava pumbu. Ano vamwe kupapara uhaku omu mwa hamena umpure. Vantu vamwe kwa va pukisa yipo va gazare asi kuvhura va uyunge novantu ava va fa. Nye Jehova kuturondora asi: “Walye omu zi kovantu ava ava hara-hara egwanekero kumwe nonompepo dovafe.” (Levitikus 19:31) Karunga kuturondora, morwa ana hara a tu popere kwaSatana ntani konompepo donondona. Ado nonkore daKarunga ntani ado kuna hara di tu korese.

LIRONGA KO YOYINZI

4. Vaengeli kuvatera vantu va lironge kuhamena Jehova

Vaengeli vaKarunga kapi ava zuvhisire vantu. Nye awo kuvatera vakareli vaKarunga va gwane vantu ava vana hara kulironga kuhamena Karunga. Resa Ehororo 14:6, 7, makura zogereni mapuro aga:

• Morwasinke twa hepera evatero lyovaengeli mokuzuvhisa?

• Ayo kukukorangeda pokudiva asi vaengeli kuvhura va kuvatere o gwane vantu ava vana hara kulironga Bibeli ndi? Morwasinke?

5. Nyokera po umpure

Satana nonompepo donondona kuna kara nonkore daKarunga. Ado hena nonkore detu. Resa Rukasa 9:38-42, makura zogereni epuro eli:

• Yisinke adi rugana nompepo donondona kovantu?

Ose kapi tuna hara kulikwatakana nonompepo donondona. Resa Deuteronomium 18:10-12, makura zogereni mapuro aga:

• Mononkedi musinke nompepo donondona adi hetekere ko kutupukisa? Yirugana musinke youmpure ava rugana vantu womomukunda gweni?

• Ngapi ono kugazara, Jehova ga wapeka mokunyokesa umpure ndi? Morwasinke ono kuuyungira ngoso?

Likida VIDIYO, makura zogereni mapuro aga naga kwama ko.

VIDIYO: “Nyokera po Muzonaguli” (5:02)

• Sininke esi ga menge Palesa munendi kwa kere siponga ndi? Morwasinke ono kuuyungira ngoso?

• Yisinke ga hepere kurugana Palesa mokulipopera konompepo donondona?

Vakriste wousili kunyokera po nompepo donondona. Resa Yirugana 19:19 ntani 1 Vakolinte 10:21, makura zogereni epuro eli:

• Morwasinke no zonagwira yininke nayinye eyi ya likwatakana noumpure?

6. Funda Satana nonompepo donondona

Satana yige a pangere nompepo donondona. Nye vaengeli ava ava limburukwa Karunga kuvapitisira Mikayera, muengeli gomunene. Mikayera kuna kara edina limwe lyaJesus. Nonkondo dokuhura kupi ga kara nado Mikayera? Resa Ehororo 12:7-9, makura zogereni mapuro aga:

• Yilye ga kara po nononkondo dononene? Mikayera novaengeli vendi ndi Satana nonompepo dendi donondona?

• Vasikuli vaJesus hepero va tjire Satana nonompepo dendi donondona ndi?

Ove kuvhura yi kutompoke kurwanesa Satana kumwe nonompepo dendi donondona. Resa Jakopo 4:7, makura zogereni epuro eli:

• Ngapi omu no lipopera nyamoge kwaSatana ntani konompepo donondona?

YINKE ONO LIRONGO?

Vaengeli wovalimburukwi kutuvatera. Satana nonompepo dendi donondona kuna kara nonkore daJehova ntani ado kuruganesa umpure di pukise vantu.

Erugururomo

• Ngapi omu vaengeli ava vatere vantu va lironge kuhamena Jehova?

• Yilye Satana ntani nompepo donondona?

• Morwasinke natu nyokera po umpure?

MAUZERA GAMWE

Tara maumbangi aga aga likida asi Jesus yige Mikayera, muengeli gomunene.

“Yilye Mikayera muengeli gomunene?” (Sirongwa sokoIntaneta)

Tara umbangi ou au likida asi Muzonaguli yipo ga kara.

“Muzonaguli yipo ga kara ndi?” (Sirongwa sokoIntaneta)

Tara omu mukadi gumwe ga nyokerere po nompepo donondona.

“Ame na gwene konda zokutwikira kuparuka” (Ruhungu, 1 Pembankuru 1993)

Lironga omu Satana a ruganesa umpure yipo a pukise vantu.

“Usili wokuhamena umpure nounganga ntani nourodi” (Nzira zokutwara komwenyo gwanarunye, ruha 5)