Yisinke ayi horoka apa muntu a fu?

Pweli gumwe wa hara ogu ga dogoroka ndi? Poyiruwo yangoso, kuvhura o lipure asi: ‘Yisinke ayi horoka apa muntu a fu? Ngatu ka mona hena vantu ava twa hara ava va dogoroka ndi?’ Sirongwa esi nesi sokukwama ko, kwa gava malimbururo gokuhengagwida.

1. Yisinke ayi horoka apa muntu a fu?

Jesus kwa fanekesere nomfa konompofu dononene. Muntu ogu a pwire monompofu dononene kapi a diva eyi yina kuhoroka. Ngapi omu nomfa da lifana nonompofu? Muntu nsene ana fu, kapi a zuvhu hena kukora ndi asi a hepe. Bibeli kwa tanta asi: “Vafe kutupu eyi va diva.”—Resa Muudisi 9:5.

2. Uwa musinke atu gwanene mo pokudiva usili kuhamena nomfa?

Sinzi sovantu kwa tjira nomfa ntani vantu wokufa. Nye eyi azi uyunga Bibeli kuhamena nomfa, kuvhura yi ku hengagwide. Jesus kwa tente asi: “Usili ngau mu zowora.” (Johanesa 8:32) Mokulisiga neyi aga rongo maukarelikarunga gomanzi, Bibeli kapi azi rongo asi kosili sininke esi asi paruka apa a fu muntu. Yipo nye, vafe kapi vana kuhepa. Mokumona asi vafe kwato eyi va diva, awo kapi tava vhuru kutukoresa. Kapisi hepero tu karere vafe ndi tu va hafese nokuvakanderera po.

Vantu vamwe kutanta asi awo kuvhura kuuyunga novafe. Nye ayo kapisi usili, morwa tuna lirongo asi “vafe kutupu eyi va diva.” Ava ava gazara asi kuna kuuyunga novafe, awo kuuyunga nonompepo donondona edi adi lininkisa di moneke ngwendi vantu ava va fa. Kudiva usili wokuhamena vafe, kutupopera konompepo donondona. Jehova kutunyokesa kuuyunga novafe, morwa age ga yi diva asi nsene tu uyunga nonompepo donondona, ado nga di tu pukisa.—Resa Deuteronomium 18:10-12.

3. Lironga kuhamena eyi ayi horokere vantu apa ava fu

Vantu mouzuni mudima kwa pura yininke yokulisiga kuhamena eyi ayi horokere vantu apa ava fu. Nye yininke eyi va pura kapisi nayinye usili.

• Yisinke va pura sinzi sovantu womomukunda gweni kuhamena vafe?

VIDIYO: Yisinke ukaro wovafe?—Karuhagona (1:19)

Resa Muudisi 3:20, makura zogereni mapuro aga:

• Kuliza novelise ozo, yisinke ayi horokere muntu nsene ana fu?

• Kosili sininke asi paruka nsene muntu ana fu ndi?

Bibeli kwa uyunga kuhamena Rasarusa, kaume kaJesus ogu ga fire. Ngomu no resa Johanesa 11:11-14, koneka eyi ga uyungire Jesus kuhamena ukaro waRasarusa. Makura zogereni mapuro aga:

• Kosinke ga hetakanesere Jesus nomfa?

• Yisinke adi likida nonkango edi kuhamena eyi ayi horokere vantu apa ava fu?

• Ngapi ono kulizuvha kuhamena eyi za uyunga Bibeli kuhamena nomfa?

4. Ose kugwanena mo uwa pokudiva usili kuhamena nomfa

Kudiva usili kuhamena nomfa kutuvatera tu dire kutjira vafe. Resa Muudisi 9:10, makura zogereni epuro eli:

• Kuvhura vafe va tu korese ndi?

Usili womoBibeli kuhamena vafe kutupopera yipo tu dire kukarera vafe ndi tu va hafese. Resa Jesaya 8:19 ntani Ehororo 4:11, makura zogereni epuro eli:

• Ngapi ono kugazara a lizuvhu Jehova kuhamena muntu ogu a karere vafe ndi a papara evatero kovantu ava va fa?

5. Usili wokuhamena nomfa kutuhengagwida

Sinzi sovantu kwa va ronga asi apa ngava fa, awo ngava ka hepa morwa yirugana yawo yoyidona. Nye ayo kutuhengagwida pokudiva asi vafe kapi vana kuhepa, nampili vaava ngava rugana yoyidona. Resa Varoma 6:7, makura zogereni epuro eli:

• Nsene Bibeli kwa tanta asi apa a fu muntu age kumanguruka kononzo dendi, omu ono kugazara, vantu ava va fa kuvhura va va tengeke morwa yirugana yawo yoyidona yanare ndi?

Ngomu tuna kudiva nawa Jehova, ose ngatu ya dimburura asi age kapi a hepeke vafe. Resa Deuteronomium 32:4 ntani 1 Johanesa 4:8, makura zogereni mapuro aga:

• Karunga ogu ga kara noyikara eyi vana tumbura monovelise edi, kuvhura a tarerere vafe va va hepeke ndi?

• Ove kukuhengagwida usili wokuhamena nomfa ndi? Morwasinke ono kuuyungira ngoso?

YINKE ONO LIRONGO?

Apa muntu a fu, eparu lyendi kuhaga. Vafe kapi vana kuhepa ndi asi va korese ava vana kuparuka.

Erugururomo

• Yisinke ayi horoka apa muntu a fu?

• Uwa musinke atu gwanene mo pokudiva usili kuhamena nomfa?

• Ngapi omu au tu hengagwida usili wokuhamena nomfa?

MAUZERA GAMWE

Tara eyi za uyunga Bibeli kuhamena eyi azi tanta nkango “mwenyo.”

“Yisinke mwenyo?” (Sirongwa sokoIntaneta)

Lironga yipo o dive nsene asi Karunga kutengeka vantu momundiro.

Mundiro gwanarunye omu ava hepere vantu yipo gwa kara ndi? (3:07)

Hepero tu tjire vafe ndi?

Nompepo dovafe—Kuvhura di ku kwafe ndi di ku zonagure? Yipo da kara nawa-nawa? (sifo)

Tara omu ya hengagwidire mugara gumwe apa ga lirongere usili kuhamena eyi ayi horokere vantu apa ava fu.

“Ga tetukisire nge malimbururo gomoBibeli” (Ruhungu, 1 Nsinano 2015)