SIRONGWA 54

Yilye “mukareli gokulimburukwa gonondunge” ntani yisinke a rugana?

Printed Edition

Jesus yige a pitisire mbungakriste. (Vaefeso 5:23) Naina, age kuna kupitisira varongwa vendi kutundilira meguru kupitira ‘momukareli gokulimburukwa gonondunge.’ (Resa Mateusa 24:45.) Nampili ngomu mukareli ogu ga kara nositumbukira sosinene esi ga mu pa Jesus, age nga twikira kukara mukareli gwaJesus nokupakera mbili vamumbya vendi. Yilye mukareli ogo ntani ngapi a tu pakere mbili?

1. Yilye “mukareli gokulimburukwa gonondunge”?

Kutunda pwanare, Jehova nga ruganesa vagara va pitisire vantu vendi. (Marakiya 2:7; Vahebeli 1:1) Konyima zonomfa daJesus, vapositoli ntani novakuronambunga womoJerusarema yiwo ngava pitisire varongwa vaJesus. (Yirugana 15:2) Mokulifana, Mbungagendesi zoNombangi daJehova yizo azi gava nondya dopampepo nokugendesa yirugana yokuzuvhisa. Amo kwa hamena mo vakuronambunga. Awo yiwo “mukareli gokulimburukwa gonondunge, ogu ga tumbire hekurwendi [Jesus].” (Mateusa 24:45a) Navenye womoMbungagendesi kuna kara vagwavekwa ava ngava ka pangera naKristusa moUhompa, konyima zapa ngava dogoroka.

2. Nondya musinke a gava mukareli gokulimburukwa?

Jesus kwa tente asi mukareli gokulimburukwa ‘nga pa [Vakriste vakwawo] nondya posiruwo sado.’ (Mateusa 24:45b) Ngwendi moomu tupu nondya edi atu li adi tu pe nonkondo noukanguki wouwa, nondya dopampepo ndi Nonkango daKarunga kutupa nonkondo tu twikire kulimburukwa Jehova nokusikisa mo sirugana esi ga tu sigira Jesus. (1 Timoteusa 4:6) Ose kugwana nondya dopampepo kupitira komapongo, koyigongi, moyimbapiratjangwa yetu ntani monovidiyo. Ayo kutuvatera tu kwate egano mpango zaKarunga ntani nokunkondopeka elikwatakano lyetu nage.

LIRONGA KO YOYINZI

Lironga eyi twa hepera “mukareli gokulimburukwa gonondunge” ndi Mbungagendesi.

Mafano: Nombangi daJehova kuna kugwana nokusikisa mo mavyukiso gokutunda koMbungagendesi. 1. Epata kuna kutarera elikwamo lyoBroadcasting. 2. Nombangi kuna kurongerera yininke yokukavatera vanavazinyetu ava yina gwana yimpagwa. 3. Nombangi mbali kuna kuzuvhisa nositoroli. 4. Mukuronambunga kuna kuresera mbungakriste mbilive. — Mbungagendesi kugava nondya dopampepo, mavyukiso ntani evatero koNombangi daJehova uzuni mudima

3. Vantu vaJehova kapi va kara mepiyagano

Kupitira mwaJesus, Mbungagendesi kugendesa yirugana yoNombandi daJehova. Jesus nga gendesa Vakriste vanare monkedi zokulifana. Likida VIDIYO.

VIDIYO: Jehova kugendesa vantu vendi (6:18)

Resa 1 Vakolinte 14:33, 40, makura zogereni epuro eli:

Ngapi novelise edi adi likida asi Jehova kapi ana hara Nombangi dendi di kare mepiyagano?

4. Mukareli gokulimburukwa yige a gendesa sirugana sokuzuvhisa

Kuzuvhisa kuna kara sirugana somulyo esi ngava rugana Vakriste womosiruwo sovapositoli. Resa Yirugana 8:14, 25, makura zogereni mapuro aga:

Yilye nga pitisire sirugana sokuzuvhisa posiruwo sovapositoli?
Yisinke va rugene oPeturusa naJohanesa apa va gwene mavyukiso gokutunda kovapositoli vakwawo?

Kuzuvhisa kuna kara sirugana somulyo po esi azi gendesa Mbungagendesi. Likida VIDIYO.

VIDIYO: Litura mo mosirugana sokuzuvhisa (1:24)

Jesus kwa likidire mulyo gokuzuvhisa. Resa Marukusa 13:10, makura zogereni mapuro aga:

Morwasinke sirugana sokuzuvhisa sa karera nomulyo koMbungagendesi?
Morwasinke twa hepera “mukareli gokulimburukwa gonondunge” a gendese sirugana sokuzuvhisa uzuni mudima?

5. Mukareli gokulimburukwa kugava mavyukiso

Mbungagendesi kugava mavyukiso koVakriste uzuni mudima. Ngapi azi tokora asi mavyukiso musinke nazi gava? Tara omu za yi rugene mbungagendesi zomosiruwo sovapositoli. Resa Yirugana 15:1, 2, makura zogereni mapuro aga:

Yisinke ya retere nompata moVakriste womosiruwo sovapositoli?
Kwalye va zire oPaurusa naBaranabasa va ka kohonone po udigu owo?

Resa Yirugana 15:12-18, 23-29, makura zogereni epuro eli:

Komeho zokutura po etokoro, yisinke ngazi rugana mbungagendesi yipo zi gwane mavyukiso kwaKarunga kuhamena ukaro wongandi?—Tara velise 12, 15, ntani 28.

Resa Yirugana 15:30, 31 ntani 16:4, 5, makura zogereni mapuro aga:

Yisinke va rugene Vakriste womosiruwo sovapositoli apa va gwene mavyukiso gokutunda kombungagendesi?
Ngapi omu Jehova ga va tungikire morwa ulimburukwi wawo?

Resa 2 Timoteusa 3:16 ntani Jakopo 1:5, makura zogereni epuro eli:

Kupi azi gwana Mbungagendesi mavyukiso apa azi tura po matokoro?

VAMWE KUTANTA ASI: “Nsene o purakena komavyukiso gokutunda koMbungagendesi, ove vantu oku kwama.”

Yisinke ya kukuninkisa o yi pure asi Jesus yige a pitisire Mbungagendesi?

YINKE ONO LIRONGO?

Mbungagendesi kuna kara “mukareli gokulimburukwa gonondunge” ogu ga horowora Kristusa. Azo kugava mavyukiso ntani nondya dopampepo koVakriste uzuni mudima.