Vatera mbungakriste zeni

Mouzuni mudima, vantu wovanzi kukarera Jehova noruhafo monombungakriste dononzi. Awo kuhafera mavyukiso aga ava gwana ntani awo kuvatera mbungakriste zawo mononkedi dokulisiga-siga. Nove yimo o lizuvhu ngoso kuhamena mbungakriste zeni ndi?

1. Ngapi no ruganesa siruwo nononkondo doge yipo o vatere mbungakriste?

Natuvenye kuvhura tu vatere mombungakriste zetu. Pasihonena, mombungakriste zeni mwa kara vakurupe ndi yirema ndi? Kuvhura o va vatere yipo va ze komapongo ndi? Kuvhura o va vatere noyirugana yepembo ndi kukavarandera yininke yawo ndi? (Resa Jakopo 1:​27.) Kuvhura hena tu zerese nokupakera mbili Sinyanga soUhompa. Kwato ogu atu sininike tu rugane yininke eyi. Nye eharo lyetu kwaKarunga ntani kovanavazinyetu kututumangeda tu ‘ligave’ mokuvatera.​​—Episarome 110:3.

Nombangi edi da gwana ekuho kuvhura di vatere mbungakriste zawo mononkedi dimwe hena. Vanavazinyetu wovagara ava va kura pampepo kuvhura va kare vakwafimbunga ntani konyima, kuvhura va kare vakuronambunga. Vanavazinyetu wovagara nava wovakadi kuvhura va kwatese ko sirugana sokuzuvhisa pokukara vazuvhisi wokukarerera. Ano Nombangi dimwe kuvhura di vatere mokutunga mavango goukareli ndi pokudirukira kombungakriste oku kuna hepa evatero.

2. Ngapi natu ruganesa yiweka yetu yipo tu vatere mbungakriste?

Kuvhura tu “fumadeke HOMPA pokumupa nzambo zeyi yoyiwa po.” (Yisewe 3:9) Ose kuhafa apa atu gava yiwaliwa noyiweka yetu yipo tu kwatese ko mbungakriste zetu ntani nosirugana sokuzuvhisa mouzuni mudima. (Resa 2 Vakolinte 9:7.) Yigava yetu kuvatera vanavazinyetu ava vana kuligwanekera noyimpagwa. Sinzi sovanavazinyetu ‘kupungura ko yuma’ nkenye apa yipo va gave yigava. (Resa 1 Vakolinte 16:2.) Kuvhura tu gave yigava moyimbangu eyi ya kara kosinyanga ndi kupitira ko intaneta, donate.jw.org. Jehova kutupa mpito yipo tu likide nsene asi twa mu hara kupitira monkedi ezi atu ruganesa yiweka yetu.

LIRONGA KO YOYINZI

3. Kuvhura tu ruganese yiweka yetu

Jehova naJesus kwa hara ava ava gava nomutjima nagunye. Pasihonena, Jesus kwa pandadekere mufisayendi goruhepo ogu ga geve kwaJehova, nampili ngomu ga kere noyimaliwa yoyisesu. Resa Rukasa 21:​1-4, makura zogereni mapuro aga:

• Twa hepa kugava yimaliwa yoyinzi yipo tu hafese Jehova ndi?

• Ngapi a lizuvhu Jehova naJesus apa atu gava yigava kutundilira komutjima?

Lironga omu ava ruganesa yigava yetu, pokulikida VIDIYO. Makura zogereni epuro eli nali kwama ko.

VIDIYO: ‘Kugava uhwi kwaJehova’ (4:47)

• Ngapi yigava ayi vatere nombungakriste uzuni mudima?

4. Kuvhura tu vatere

Vakareli vaJehova vanare ngava rugana unene yipo va pakere mbili mavango gawo goukareli. Nye awo kapi ngava gava tupu yimaliwa. Resa 2 Histoli 34:​9-11, makura zogereni epuro eli:

• Ngapi omu Vaisraeli ngava pakere mbili nzugo zaJehova ndi evango lyawo lyoukareli?

Tara omu Nombangi daJehova adi kwama sihonena sovakareli vaJehova vanare, pokulikida VIDIYO. Makura zogereni mapuro aga naga kwama ko.

VIDIYO: Kupakera mbili mavango getu goUkareli (3:31)

• Morwasinke ya karera nomulyo tu zerese nokupakera mbili Sinyanga setu soUhompa?

• Mononkedi musinke dimwe no vatera?

5. Vanavazinyetu wovagara kuvhura va kondjere yitumbukira

Matjangwa kukorangeda vanavazinyetu wovagara va rugane unene yipo va vatere mbungakriste. Tara ko sihonena, pokulikida VIDIYO. Makura zogereni epuro eli nali kwama ko.

VIDIYO: Vanavazinyetu wovagara, tokomeneni sirugana sombeyo (5:19)

• Kuliza novidiyo, yisinke ga rugene Ryan yipo a vatere mombungakriste?

Bibeli kwa faturura yihepwa eyi va hepa kusikisa mo vakwafimbunga novakuronambunga. Resa 1 Timoteusa 3:​1-13, makura zogereni mapuro aga:

• Yisinke va hepa kusikisa mo vanavazinyetu wovagara ava vana hara kukara vakwafimbunga novakuronambunga?

• Yisinke ga hepa kusikisa mo mapata gawo?​—Tara velise 4 ntani 11.

• Uwa musinke ava gwanene mo womombungakriste apa vanavazinyetu wovagara ava sikisa mo yihepwa oyo?

YINKE ONO LIRONGO?

Jehova kumuhafesa apa atu ruganesa siruwo setu nononkondo detu ntani noyiweka yetu yipo tu vatere mbungakriste.

Erugururomo

• Ngapi natu ruganesa siruwo nononkondo detu yipo tu vatere mbungakriste?

• Ngapi natu ruganesa yiweka yetu yipo tu vatere mbungakriste?

• Mononkedi musinke ono hara kuvatera mbungakriste?

MAUZERA GAMWE

Lironga konda zeyi Karunga a dilire kupura vakareli vendi va gave yiumurongo.

“Yisinke za uyunga Bibeli kuhamena kugava yiumurongo?” (Sirongwa sokoIntaneta)

Lironga eyi ayi tanta kukondjera situmbukira mombungakriste.

Ove kuna “hara kukara mupitisili” ndi? (Ruhungu, 15 Sitarara 2014)

Tarera vanavazinyetu ava ava lizambere yipo va tware yimbapiratjangwa kovapuli vakwawo.

Ehaneso lyoyimbapiratjangwa yoBibeli moKongo (4:​25)

Lironga monkedi omu atu gwana yimaliwa za lisiga nomu aga yi rugana maukarelikarunga gamwe.

“Kupi ayi tundu yimaliwa yokukwatesa ko sirugana seni sokuzuvhisa?” (Sirongwa sokoIntaneta)