“Omu kare meharo lyaKarunga”
“Omu kare meharo lyaKarunga mokundindira ufenkenda waHompa gwetu Jesus Kristusa, ou ngau tu twaresa komwenyo gwanarunye.”—JUDA 21.
1, 2. Ngapi omu ga tu likida Jehova eharo lyendi, ntani ngapi omu tuna yi diva asi Jehova kapi tupu nga tu tura meharo lyendi?
JEHOVA KARUNGA kwa tu likida eharo lyendi mononkedi dononzi. Pwa hana esinganyeko, umbangi wounene weharo lyaJehova kwetu kuna kara nzambo zosizoweseso. Eharo lyendi kovantu enene unene yiyo ga tumininine Munwendi ogu ga hara pevhu a ya tu fire. (Joh. 3:16) Jehova kwa yi ruganena eyi morwa kwa tu harera tu paruke narunye ntani nokugwanena mo mauwa meharo lyendi lyanarunye.
2 Nampili ngoso, ose kuvhura tu gazare asi Jehova nga tu tura meharo lyendi nsene tu tokora kurugana nkenye eyi tupu ndi? Hawe. Morwa ekorangedo lya kara mwaJuda velise 21, kututantera asi: “Omu kare meharo lyaKarunga mokundindira ufenkenda waHompa gwetu Jesus Kristusa, ou ngau tu twaresa komwenyo gwanarunye.” Ntanto ‘omu kare meharo lyaKarunga’ kulikida asi twa hepa kurugana ko yuma mokukara meharo lyaKarunga. Yisinke twa hepa kurugana yipo tu kare meharo lyaKarunga?
Ngapi omu natu vhura kukara meharo lyaKarunga?
3. Yisinke ga tente Jesus eyi ya kere nomulyo kwendi mokukara meharo lyoGuhwe?
3 Ose kugwana elimbururo kepuro eli mononkango daJesus, edi ga uyungire momasiku gokuhulilira geparu lyendi pevhu. Age kwa tente asi: “Nsene mu sikisa mo yipango yange, tomu kara meharo lyange, moomu ani sikisa mo yipango yaTate, yiyo na kara meharo lyendi.” (Joh. 15:10) Ngomu zina yi likida velise ezi, Jesus ga divire asi kusikisa mo yipango yaJehova kwa kere nomulyo kwendi mokukara nelikwatakano lyewa kumwe naGuhwe. Nsene asi oyo kwa kere mulyo kwaMunwaKarunga gokusikilira mo, nayo kuna kara nomulyo hena noku kwetu.
4, 5. (a) Nkedi musinke zokuhova omu atu vhura kulikida eharo kwaJehova? (b) Morwasinke twa dilira kukara nokonda zokunyoka kulimburukwa yipango yaJehova?
4 Nkedi zokuhova omu atu likida eharo kwaJehova kuna kara pokumulimburukwa. Mupositoli Johanesa kwa tente asi: “Eharo lyetu lyokuhara Karunga lyeli asi, ose atu sikise mo yipango yendi. Ano yipango yendi, kapi ya paka udigu.” (1 Joh. 5:3) Vantu wovanzi naina kapi vana hara kulimburukwa kwankenye ogu. Nampili ngoso, koneka tanto ezi asi: “Ano yipango yendi, kapi ya paka udigu.” Jehova kapi a ndindire ko kwetu tu rugane yininke eyi natu dira kuvhura kurugana.
5 Mokuyifanekesa: Kuvhura nye o pure kaume koge a damune sininke esi ono diva asi udigu ndi? Hawe. Jehova kwa kara nonkenda zonene kutupitakana ntani ga diva maupirankondo getu. Bibeli kwa tu tumbwidira asi Jehova “kudiworoka asi ose mbundu zevhu.” (Epis. 103:14) Age kapi a tu pura yoyinzi kupitakana eyi natu vhura kusikisa mo. Yipo nye asi ose kapi twa kara nokonda zokunyoka kulimburukwa yipango yaJehova. Mokulisiga, ose kunongonona asi kulimburukwa Jehova kutupa mpito zongwa mokulikida Guhyetu gemeguru asi yosili twa mu hara ntani twa hara kukara meharo lyendi.
Uhwi wokulikarera wokutunda kwaJehova
6, 7. (a) Yisinke ezwi lyokomutjima? (b) Yifanekesa omu ezwi lyokomutjima nali vhura kutuvatera mokukara meharo lyaKarunga.
6 Mouzuni ou womaudigu tuna kuparuka, twa hepa kutura po matokoro gomanene aga ga kwatera mo ulimburukwi wetu kwaKarunga. Ngapi omu natu diva asi matokoro ogo kuna kuliza nompango zaKarunga? Jehova kwa tu pa uhwi ou au tu vatere, unene po kombinga zoulimburukwi. Awo kuna kara ezwi lyokomutjima. Yisinke ezwi lyokomutjima? Alyo kuna kara evhuliko lyokulikarera omu atu likonakona nyamwetu kuhamena yirugana yetu nonkareso zetu ntani nomatokoro getu. Alyo kuvhura kutupangura yipo tu vhure kutarurura matokoro aga atu ligwanekere nago meparu ndi lilikide yirugana yetu eyi twa rugene nare ntani nokuyikonakona nsene asi yiwa ndi yidona, youhunga ndi yepuko.—Resa Varoma 2:14, 15.
7 Mononkendi musinke nali vhura kutuvatera ezwi lyetu lyokomutjima? Mokuyifanekesa: Mugara kuna rara nombili pombete zendi masiku. Haruka ko tupu, mbwa zendi tazi zuvhu ezogerero lyomuwidi makura tazi tameke kuhuda. Mugara makura ta pinduka nokupwaga ponze, ano muwidi ta tundu po ta ka za. Mugara makura ta hafa morwa kwato yoyidona eyi yina horoka. Yisinke ngano ya horokere nsene ngano mbwa kapi za vangarere nokuhuda? Mugara gwina ngano kwa mu veke yuma yendi ndi ngano kwa mu zuvhisire kukora ndi nampo kumudipaga. Mokulifana, muntu ga hana ezwi lyokomutjima narunye kuzumbanesa ehuguvaro nsene ana hara kutura po matokoro gokukuhuka ntani gouhunga meparu.
8, 9. (a) Yininke musinke twa hepa kutura megano kuhamena ezwi lyokomutjima? (b) Yisinke natu vhura kurugana mokudivilisa asi ezwi lyokomutjima li vhure kutuvatera?
8 Ngwendi mbwa, ezwi lyokomutjima poyiruwo yimwe kuvhura li kare mepuko. Nsene mbwa kapi azi vangarara azo kwato sikwafo ntani kuvhura kureta siponga. Mokulifana, nsene tu pulisira madowo getu gokomutjima ga pangere matokoro getu, yisinke nayi tu horokera? Madowo getu gomadona kuvhura kupukisa ezwi lyokomutjima. Bibeli kwa kurondora asi: “Yilye gokuvhura kukwata egano mutjima gomuntu? Kutupu yapeke eyi ya pitakana po moyimpempa; gwa vera unene, kwa tjinda kuveruka.” (Jer. 17:9; Yis. 4:23) Mokugwederera ko, nsene mugara kapi ga deura mbwa zendi mokuhuda vageni, azo kapi ngazi mu vatera ntani kwato sikwafo. Mokulifana, nsene tu dira kuhuguvara momavyukiso goNonkango daKarunga, ezwi lyetu lyokomutjima kapi ngali tu vatera. (Epis. 119:105) Eguwo, vantu wovanzi mouzuni ou kukwama unene madowo gawo gokomutjima mokudira kupurakena nompango edi da kara moNonkango daKarunga. (Resa Vaefeso 4:17-19.) Vantu wovanzi nampili ngomu va kara nezwi lyokomutjima, nye awo kurugana yininke yoyidona.—1 Tim. 4:2.
9 Twa hepa kutokomena asi twa ha kara ngwendi yiwo. Nye, tu twikireni kulironga Nonkango daKarunga nokudeura ezwi lyetu lyokomutjma yipo li vhure kutuvatera. Twa hepa kukwama ezwi lyokomutjima eli va deura kuliza nonompango doBibeli mevango lyokukwama madowo getu gomadona ga tu pangere. Posiruwo sooso, twa hepa kufumadeka mazwi gokomutjima govanavazinyetu wopampepo. Ose kukondjera mokudira kuvapundukisa, nokutura megano asi mazwi govanavazinyetu kwa lisiga naga getu.—1 Kol. 8:12; 2 Kol. 4:2; 1 Pet. 3:16.
10. Maruha musinke gatatu meparu natu ka tarurura?
10 Tu zeni tu ka tarurure maruha gatatu meparu omu natu vhura kulikida eharo lyetu kwaJehova kupitira moulimburukwi. Mwankenye ruha, ezwi lyetu lyokomutjima kwa hamena mo, nye mokuninka asi li tu pitisire monaruwa, nompango dokupongoka domoBibeli da hepa kugendesa ezwi lyetu lyokomutjima. Nonkedi ntatu omu natu vhura kulikida eharo lyetu kwaJehova nokumulimburukwa kuna kara asi: (1) kuhara ava ga hara Jehova, (2) kulikida efumadeko koupangeli, ntani (3) kukara ono kuhuka kosipara saKarunga.
Hara ava ga hara Jehova
11. Morwasinke natu harera ava ga hara Jehova?
11 Ruha rokuhova, kuhara ava ga hara Jehova. Kuhamena ukaume, vantu kwa lifana norugongoro. Ose kutemwinina nkenye eyi ayi tu kundurukida. Musiti gwetu ga diva siponga esi sa kara koukaume wovantu wokudira kusikilira mo. Yipo nye, age kutupa mapukururo aga gomawa asi: “Kara ukwawo novanongo ngo kare munongo. Nsene o kara ukwawo novagova, ngo hanauka po.” (Yis. 13:20; 1 Kol. 15:33) Kwato ogu ana hara ‘kuhanauka po.’ Natuvenye tu na hara kukara ‘vanongo.’ Jehova munongo unene kwato ogu ga mu pitakana, ntani kwato gokuvhura kumupukisa. Age ga tu pa sihonena sosiwa kuhamena ukaume. Tu tarurureni ogu Jehova ga horowere a kare kaume kendi.
12. Vakaume musinke ava a horowora Jehova?
12 Jehova kwa tumbwire esimbi Abirahamu asi “mukwetu.” (Jes. 41:8) Age kwa kere mugara ogu ga kere noulimburukwi nouhungami ntani nepuro lyokulikarera. (Jak. 2:21-23) Vakaume vangoso yiwo a horowora Jehova. Nampili naina age kuna kuhorowora vantu vangoso va kare vakaume vendi. Nsene asi Jehova kuhorowora vakaume vangoso, ayo ngano mulyo kwetu mokuhorowora nawa, yipo tu kare ukwawo novanongo ngatu kare vanongo.
13. Kombinga zokuhorowora vakaume, yisinke nayi tu vatera tu ture po matokoro gomawa?
13 Yisinke nayi vhura kutuvatera tu ture po matokoro gomawa moyuma eyi? Kulironga yihonena yomoBibeli kuvhura kututumangeda. Tarurura ukaume wa kere pokatji kaNaomi nangumweyi zendi Rutu, nou wa kere pokatji kaNdafita naJonatana ndi ou wa kere pokatji kaPaurusa naTimoteusa. (Rutu 1:16, 17; 1 Sam. 23:16-18; Fil. 2:19-22) Awo kwa kere vakaume wovanene morwa eharo lyosili eli va kere nalyo lyokuhara Jehova. Kuvhura o gwane vakaume ava ga hara Jehova ngwendi moomu wa mu hara ove ndi? Kara nehuguvaro asi kuvhura kugwana vakaume vangoso mombungakriste. Vakaume vangoso kapi ngava kutumangeda o rugane nkenye eyi ayi dili kuhafesa Jehova. Nye, awo ngava kuvatera o limburukwe Jehova nokumuheda pepi ntani nokukuna mepya lyompepo. (Resa Vagarata 6:7, 8.) Awo hena ngava kuvatera o kare meharo lyaKarunga.
Kulikida efumadeko koupangeli
14. Morwasinke ayi tu karere udigu poyiruwo yimwe kulikida efumadeko koupangeli?
14 Ruha rwauvali omu natu likida eharo lyetu kwaJehova kwa kwatera mo upangeli. Twa hepa kulikida efumadeko koupangeli. Morwasinke ayi karere udigu poyiruwo yimwe kulikida efumadeko koupangeli? Morwa vantu ava ava tu pangere kapi va sikilira mo. Mokugwederera ko, nanyamwetu kapi twa sikilira mo. Ose kukondja morwa kwa tu reta nompepo zourwanesi.
15, 16. (a) Morwasinke ya karera nomulyo tu fumadeke ava ga pa Jehova yitumbukira va pakere mbili vantu vendi? (b) Sirongwa musinke somulyo tuna kulirongera ko omu Jehova ga tere Vaisraeli ava va rwanesere Mosesa?
15 Kuvhura o lipure asi: ‘Nsene asi ayo udigu unene kwetu mokulikida efumadeko koupangeli, morwasinke twa hepera kuyirugana?’ Elimbururo kwa hamena mo nompata doupangeli wanayinye. Yilye ogu no vhura kuhorowora ngomupangeli goge gwanayinye? Nsene tu horowora Jehova ngoMupangeli gwetu gwanayinye, twa hepa kufumadeka upangeli wendi. Nsene kapi tuna kuyirugana oyo, kuvhura tu mu tumbure sili asi Mupangeli gwetu ndi? Mokugwederera ko, Jehova kulikida upangeli wendi kupitira movantu wokudira kusikilira mo ava ga pa yitumbukira va pakere mbili vantu vendi. Nsene tu rwanesa vantu owo, ngapi omu Jehova na tara yirugana yetu?—Resa 1 Vatesaronika 5:12, 13.
16 Pasihonena, apa Vaisraeli va sivanene ntani nokurwanesa Mosesa, Jehova kwa tere eyi va rugene ngwendi kwendi va yi vyukisire. (Num. 14:26, 27) Karunga kapi ga runduruka. Nsene tu rwanesa ava ga tura po Jehova va tu pangere, ayo ngano tayi moneka ngwendi yige tuna kuvyuka.
17. Nkareso musinke zongwa twa hepa kutunga po kwava va kara noyitumbukira mombungakriste?
17 Mupositoli Paurusa kwa horwere nkareso zongwa ezi natu vhura kutunga po kwava va kara noyitumbukira mombungakriste. Age kwa tjenge asi: “Omu limburukwe oku tomu zuvhu vapitisili veni, yeeyi awo kutakamesa nomwenyo deni, ngwendi vava ava di zeresere Karunga. Nsene mu va limburukwa, tava yi rugana nehafo, kapisi nomutjimakoka, yeeyi kapi yi mu kwafe.” (Heb. 13:17) Ayo kuna kara usili asi twa hepa kurugana unene tu tunge po nkareso zoulimburukwi. Diworoka asi twa hepa kurugana unene tu kare meharo lyaKarunga. Sitambo sangoso kuna kara nomulyo kwetu.
Kara ono kuhuka kosipara saJehova
18. Morwasinke ana tu harere Jehova tu kare tuna kuhuka?
18 Ruha rwautatu omu natu likida eharo lyetu kwaJehova twa hepa kukara tuna kuhuka kosipara saJehova. Vakurona narunye kurugana unene va divilise asi vana vawo vana kuhuka. Morwasinke? Konda zimwe kuna kara asi ukuhuki hepero koukanguki nokoukalinawa womunona. Mokugwederera ko, ukuhuki womunona kulikida ukalinawa wepata, eyi kuhorora eharo nepakerombili lyovakurona vendi. Mokulifana, Jehova kuna tu harere tu kuhuke. Age ga diva asi ukuhuki mulyo unene koukalinawa wetu. Age ga diva asi ukuhuki wetu kuretera mfumwa Guhyetu gemeguru. Eyi kwa kara nomulyo unene, ayo kuninkisa vantu va hare kukarera Karunga morwa awo kunongonona omu twa lisiga nava womouzuni ou wokunyata.
19. Ngapi omu twa yi diva asi kukuhuka parutu mulyo?
19 Monkedi musinke twa hepa kukara tuna kuhuka? Momaruha getu nagenye geparu. MoIsraeli zanare, Jehova ga yi zeresere asi kukuhuka parutu mulyo unene kovantu vendi. (Lev. 15:31) Veta zaMosesa kwa kere nompangera zokuzeresa yininke nayinye yokunyata nokukuhwa mawoko nonompadi noyikoverero yawo. (Ex. 30:17-21; Lev. 11:32; Num. 19:17-20; Deut. 23:13, 14) Vaisraeli kwa va diworokesere asi Karunga gwawo, Jehova, kwa pongoka, eyi kutanta asi kwa zera ntani kwa kuhuka. Vakareli vaKarunga gokupongoka nawo va hepa kukuhuka.—Resa Levitikus 11:44, 45.
20. Mononkedi musinke twa hepa kukara tuna kuhuka?
20 Twa hepa kukara tuna kuhuka monda ndi pontunda. Twa hepa kukondjera kukuhuka pamagazaro. Ose kukwaterera noulimburukwi konompango daJehova dokukuhuka pamukaro, u kare asi ngapi omu wa nyata uzuni ou wa tu kundurukida. Somulyo po, twa hepa kukondja asi ukareli wetu u kare una kuhuka, pokunyokera po nkenye eyi yokunyata ayi tundu koukarelikarunga woyimpempa. Ose kapi atu divara erondoro va tjanga mwaJesaya 52:11 asi: ‘Tundeni mo moBabironiya. Mwa ha guma kweyi yokunyata; likuhureni nyaamweni mu tunde mo.’ Ose naina kukara tuna kuhuka pampepo pokunyokera kuguma kwankenye eyi a tara Guhyetu gemeguru asi ya nyata ngwendi ukareli woyimpempa. Pasihonena, ose kudivilisa asi kapi tuna kulihameka moyipito nomomapwizumuko gomaukarelikarunga goyimpempa aga gana divikwa naina mouzuni. Yosili, ayo udigu kukara tuna kuhuka. Nye vantu vaJehova awo kukondjera mokurugana ngoso morwa eyi kuvavatera va kare meharo lyaKarunga.
21. Ngapi omu natu divilisa asi tuna kara meharo lyaKarunga?
21 Jehova kuna tu harere tu kare meharo lyendi narunye. Nye natuvenye pwanyamwetu twa hepa kudivilisa asi tu rugane paapa twa hulira tu kare meharo lyaKarunga. Eyi kuvhura tu yi rugane pokukwama sihonena saJesus nokulikida eharo lyetu kwaJehova pokulimburukwa nompango dendi. Nsene tu rugana ngoso, ngatu divilisa asi kwato esi “sokutugusa mo meharo lyaKarunga eli twa kara nalyo mwaJesus Kristusa, Hompa gwetu.”—Rom. 8:38, 39.
Kuvhura o diworoke ndi?
• Ngapi omu ezwi lyetu lyokomutjima nali vhura kutuvatera tu kare meharo lyaKarunga?
• Morwasinke natu harera ava ga hara Jehova?
• Morwasinke ya karera mulyo mokulikida efumadeko koupangeli?
• Morwasinke ya karera nomulyo kovantu vaKarunga va kare vana kuhuka?
[Kakende/Efano pepenuno 28]
SIPAMBIRATJANGWA ESI ASI DIVISA NKARESO ZONGWA
Posigongi sonomukunda somomvhura 2008/ 2009 kwa pwagesere buke zosiparatjangwa “Omu kare meharo lyaKarunga” ezi za kara nomapenuno 224. Yisinke sitambo sobuke ezi zompe? Azo kwa zi wapaikira mokuvatera Vakriste va dive nompango daJehova nokudihara, unene po kwa demenena konkareso zoSikriste. Pokulironga nawa buke ezi “Omu kare meharo lyaKarunga” ngazi nkondopeka epuro lyetu tu paruke kuliza nonompango daJehova, azo kuna kara nkedi zongwa zeparu zokutwaredera komwenyo gwanarunye.
Mokugwederera ko, buke ezi kwa zi wapaikira hena mokutuvatera tu mone asi kulimburukwa Jehova kapisi udigu. Ntani kuna kara nkedi omu atu likida Jehova asi ngapi omu twa mu hara. Yipo nye, buke ezi nga zi tu tumangeda tu lipure nyamwetu asi: ‘Morwasinke na hepere kulimburukwa Jehova?’
Apa vamwe ava tundu meharo lyaJehova, kapisi asi kapi ava kwata egano marongo gendi nye morwa kulihameka monkareso zondona. Ayo mulyo asi tu nkondopeke eharo lyetu nokulikida rupandu konoveta nokonompango daJehova edi adi tu pitisire meparu lyetu lyankenye ezuva. Ose tuna si huguvara asi sipambiratjangwa esi sosipe ngasi vatera nonzwi daJehova mouzuni mudima di kwaterere kweyi youhunga, nokulikida asi Satana munayimpempa, ano unene po di kare meharo lyaKarunga!—Juda 21.