Hepero vanona va lironge kuhamena Karunga ndi?

NAINA pana kara magano gomanzi kuhamena kuronga vanona kombinga zoukarelikarunga. Moyirongo yimwe, mwa kara vantu ava va pura asi vakurona kapi va kara nounankondo wokuronga vana vawo kuhamena ukarelikarunga. Awo kulizuvha asi vanona ava ava kulire momapata ga hamena koukarelikarunga kuzumbanesa yoyinzi.

Ove ngapi ono kugazara ko? Nonkango musinke dina ka kwama ko douhunga?

● Vakurona kapisi va va pulisire mokuronga vana vawo kuhamena Karunga.

● Vakurona va hepa kundindira dogoro vana vawo vana kuru komeho zokuvaronga yininke youkarelikarunga.

● Siruwo esi vana kara vanona, vakurona va hepa kuronga vana vawo eyi va pura kuhamena Karunga. Nye apa ngava kura vanona, vakurona va hepa kukorangeda vanona va gazadare ko vene.

● Vanona va hepa kutambura epuliro lyovakurona vawo li kare asi usili ndi hawe.

Ukarelikarunga kuzonagwisa vanona ndi?

Kwato mukurona geharo ga hara kukoresa munwendi. Nye maumbangi kuna kukwatesa ko eyi ava uyunga ava vana kusilika vanona mokulironga kuhamena Karunga ndi? Nomvhura nonomvhura, vakonakoni kwa lironga omu mapuliro govakondi aga kundama vanona. Yisinke vakonakoni va lironga apa va rugene mapaparo?

Vakonakoni va yi dimbururura asi mevango lyokuzonagura vanona, ukarelikarunga kukundama monaruwa ekuro lyomunona. Mo-2008 erapoto limwe eli va pwagesere mosaitunga kwa tente asi: “Ukarelikarunga kuwapukurura elikwatakano lyovanona novakondi.” Erapoto olyo kwa tente hena asi: “Ukarelikarunga kuna kara ruha romulyo momaparu govanona wovanzi ntani hena mulyo kelikwatakano lyemepata” (Social Science Research.a) Oyo kwa lifana neyi ga uyungire Jesus Kristusa asi: “Ava ava zuvhu nonkango daKarunga nye tava di pungura, yiwo po verago.”—Rukasa 11:28.

Ngapi egano eli asi vanona va hepa kukura tanko komeho va ka lironge kuhamena Karunga noukarelikarunga? Egano olyo kupatanesa usili ou asi: Magano gomunona kwa fana ngwendi ehemere lina pili yuma. Yipo nye, vakurona va kara netokoro nsene asi tava zwida magano govana vawo nonompango nomapuliro gokukuhuka ndi tava pulisire vana vawo va lironge nkenye eyi vana kuzuvha kovakwawo.

Yisinke twa hepa kurugana?

Yihorokwa yomouzuni kulikida asi ukarelikarunga kuvhura kutumangeda vantu mokulitondora nokunyenga vakwawo. Ngapi omu vakurona nava nyokera po yitundwamo oyo yoyidona? Ngapi omu nava ronga vana vawo mapuliro aga nga va vatera mokuhara vakwawo?

Elimbururo kuligwana pokulimburura mapuro aga gatatu: (1) Yisinke va hepa kulironga vanona? (2) Wolye va hepa kuvaronga? (3) Nondongeseso musinke donongwa po?

[Nondanda dokonhi]