Lirongera ko kononkango daKarunga

Ngapi no dimburura ukarelikarunga wousili?

Sirongwa esi kwa tumbura mapuro gamwe aga nampo wa lipura nokukakulikida asi kupi oku no vhura kuresa moBibeli zoge o gwane malimbururo. Nombangi daJehova nava ka yi hafera pokukazogera kumwe nove malimbururo ogo.

1. Pwa kara ukarelikarunga umwe tupu wousili ndi?

Jesus kwa rongere varongwa vendi ukareli umwe tupu wousili. Awo kwa fana ngwendi nzira zokutwara komwenyo gwanarunye. Kuhamena nzira ozo Jesus kwa tente asi: “Ava ava zi gendi vasesu.” (Mateusa 7:14) Karunga kutambura tupu ukareli ou au rongo usili womoNonkango dendi. Vakareli navenye wousili kwa kara mepuro limwe.—Resa Johanesa 4:23, 24; 14:6; Vaefeso 4:4, 5.

2. Morwasinke womomaukarelikarunga gomanzi ava litumbwire asi Vakriste?

Vaporofete woyimpempa kwa zonagwisa ukarelikarunga woUkriste nokuuruganesa va gwanene mo uwa wavene. Ngwendi moomu ga yi pumbire Jesus, awo kumoneka ngwendi ‘nonzwi’ dendi nye awo ngwendi mambungu gonzara. (Mateusa 7:13-15, 21, 23) Ukarelikarunga woyimpempa kwa tamekere apa vapositoli vaJesus va fire.—Resa Yirugana 20:29, 30.

3. Ngapi no dimburura ukarelikarunga wousili?

Vakriste wousili kufumadeka Bibeli asi Nonkango daKarunga. Awo kukondja kuparuka kuliza nonompango damo. Yipo nye ukareli wousili wa lisiga komaukarelikarunga aga aga kwama noveta dosintu. (Mateusa 15:7-9) Vakareli wousili kapi ava udisa yininke nokurugana nayopeke.—Resa Johanesa 17:17; 2 Timoteusa 3:16, 17.

Vakriste wousili kufumadeka edina lyaKarunga, Jehova. Jesus kwa divisire edina lyaKarunga. Age kwa vaterere vantu va dive Karunga nokuvaronga omu nava kanderera yipo edina lyaKarunga ngava li pongore. (Mateusa 6:9) Momukunda gweni, ukareli musinke au tumangeda vantu va ruganese edina lyaKarunga?—Resa Johanesa 17:26; Varoma 10:13, 14.

4. Ngapi no dimburura vakareli wousili?

Vakriste wousili kuzuvhisa kuhamena Uhompa waKarunga. Karunga kwa tumine Jesus a ya udise kuhamena Uhompa. Uhompa waKarunga yiwo welike wokukohonona po maudigu govantu. Jesus nga uyunga kuhamena Uhompa dogoro kezuva lyonomfa dendi. (Rukasa 4:43; 8:1; 23:42, 43) Age kwa rongere vasikuli vendi va zuvhise kuhamena Uhompa waKarunga. Nsene gumwe a ku hedera nokuuyunga nove kuhamena Uhompa waKarunga, koukareli musinke ga hamena?—Resa Mateusa 10:7; 24:14.

Vasikuli vaJesus awo kapisi wouzuni ou woudona. Awo kapi ava lihameke moupolitika ndi monomutangu donomuhoko. (Johanesa 17:16) Awo hena kapi ava honene nonkareso noyirugana yoyidona youzuni ou.—Resa Jakopo 1:27; 4:4.

5. Sikara musinke sosinene asi dimbwilisa Vakriste wousili?

Vakriste wosili kwa lihara-hara. Awo kwa lironga moNonkango daKarunga mokufumadeka vantu womarudi nagenye. Nampili ngomu ukarelikarunga woyimpempa au kwatesa ko unene yita, vakereli wousili kapi ava yi rugana. (Mika 4:1-4) Nye, vakareli wousili kuruganesa siruwo noyiweka yawo mokuvatera nokukorangeda wopeke.—Resa Johanesa 13:34, 35; 1 Johanesa 4:20, 21.

Ngombunga, Nombangi daJehova kurongo usili womoNonkango daKarunga nokufumadeka edina lyaKarunga nokuudisa asi Uhompa waKarunga yiwo welike wokukohonona po maudigu govantu. Awo kulikida eharo ntani kapi ava lihameke moyita.—1 Johanesa 3:10-12.

Komauzera gomanzi tara egaununo 15 mobuke ezi Yinke azi rongo Bibeli sili? va nduruka Nombangi daJehova.

[Efano lyepepenuno 16]

“Awo kulikoreka asi va diva Karunga, nye awo kumupatana moyirugana yawo.”—Titusa 1:16