Huguvara mwaJehova ‘Karunga gehengagwido’
“Karunga gedidimiko nogu gehengagwido ngano ta mu pe malizuvho mokatji keni moomu ga yi harera Jesus Kristusa.”—ROM. 15:5.
1. Yisinke ga hepa nkenye muntu?
KUTUNDILIRA kehampuruko lyetu, ose kuhepa ehengagwido. Mukeke kulira mokutudivisa asi ana hepa ehengagwido. Nampo kuna hara va mu kwaterere ndi nzara. Nampili tu kare vakondi, ose nkenye apa kuhepa ehengagwido. Eyi kuhoroka unene po apa atu ligwanekere nomaukaro gomadigu.
2. Ehuguvareso musinke a gava Jehova kowo va mu huguvara?
2 Vemepata ndi vakaume vetu kuvhura va tu pe ehengagwido lyongandi. Nye, kapi tava vhuru kutuhengagwida momaukaro nagenye. Karunga gelike gokuvhura kutuhengagwida mwankenye ukaro. Nonkango dendi kutuhuguvaresa asi: “Age kwa kara pepi nava navenye ava mu zigida, . . . age kuzuvha nkugo zawo.” (Epis. 145:18, 19) Nhi, “meho gaHOMPA kwa tara kovahungami, age kutondoka nonkugo dawo.” (Epis. 34:15) Nye mokugwana evatero nehengagwido lyaKarunga twa hepa kumuhuguvara. Muepisame Ndafita kwa tente asi: “Ano HOMPA yige sihorameno sava vana kuhepeka, age evango lyeyoworokero mosiruwo soudigu. Ava va diva edina lyoge, kwa ku huguvara, yeeyi ove HOMPA, kapi o zumbu ava ava ku papara.”—Epis. 9:9, 10.
3. Ngapi omu Jesus ga fanekesere eharo lyaJehova kovantu vendi?
3 Vakareli vaJehova kwa kara nomulyo kwendi. Jesus ga yi zeresere eyi, apa ga uyungire asi: “Nani manzunge gatano kapi ava ga randa nosenda mbali? Nye nalimwe si eli ga divara ko Karunga. Nye one nonohuki deedi dokonomutwe deni da pwa kuvarura. Ano neisi nomu tjilira, yeeyi asi one mwa pitakana manzunge gomanzi.” (Ruk. 12:6, 7) Jehova kwa tanterere Vaisraeli asi: “Ame kwa ku hara narunye. Ame tani twikire simpe kukulikida eharo lyange lyanarunye lyokukuhara.”—Jer. 31:3.
4. Morwasinke natu huguvarera momatumbwidiro gaJehova?
4 Kuhuguvara Jehova nomomatumbwidiro gendi kutuhengagwida moyiruwo youdigu. Yipo nye twa hepa kukara nehuguvaro mwaKarunga ngwendi lyeli ga kere nalyo Josuwa ogu ga uyungire asi: “HOMPA Karunga gweni ana mu pe yininke nayinye yoyiwa, eyi ga mu tumbwidira. Matumbwidiro nagenye gana siki mo; nalimwe si lya hupa ko.” (Jos. 23:14) Ntani hena, kuvhura tu huguvare asi nampili tu ligwanekere nomaudigu pokaruwogona, “Karunga mulimburukwi” ntani kapi nga zumba vakareli vendi wovalimburukwi.—Resa 1 Vakolinte 10:13.
5. Morwasinke natu vhulira kuhengagwida vapeke?
5 Mupositoli Paurusa kwa tente asi ‘Karunga kutukwafa nkenye apa.’ MoRugereka nkango ‘kukwafa’ kuvhura kuzitoroka hena asi “kuhegangwida” ndi “kumwenekeda” owo vana guwu ndi vana kulira. (Resa 2 Vakolinte 1:3, 4.) Guhyetu gemeguru kwato eyi ayi mu vhuru, age kuvhura kurugana nkenye eyi yina hepa po mokugava ehengagwido kowo va mu hara. Nose kuvhura kuhegangwida vapuli vakwetu ‘momaudigu gawo nagenye.’ Ose kuvhura tu yi rugane oyo kupitira ‘mekwafo eli a tu kwafesa nyamwetu Karunga.’ Kwato gumwe gokuvhura kutuhengagwida nawa kupitakana Jehova.
Kulididimikira eyi ayi retesa po ruguwo
6. Yininke musinke ayi retesa po ruguwo?
6 Twa hepa ehengagwido momaruha gomanzi geparu. Sininke simwe esi asi reta ruguwo rorunene kuna kara nomfa domuhali, unene po domulikwali ndi domunona. Vamwe kuhepa ehengagwido morwa ruguwo rokutundilira kelitondororo. Uvera noukurupe noruhepo nomaudigu gomononkwara ndi maukaro gomadona gomouzuni ou kuvhura kuninkisa muntu a hepe ehengagwido.
7. (a) Momaukaro gokuguvisa, ehengagwido musinke twa hepa? (b) Yisinke na vhura kurugana Jehova mokuverura mutjima ‘gokudompa’?
7 Moyiruwo yomaudigu, ose kuvhura kuhepa ehengagwido eli nali tendeka mutjima gwetu nomagazaro getu nomalizuvho getu ntani nokutuverura parutu nopampepo. Pasihonena, gazadara ko kuhamena mutjima. Nonkango daKarunga kuuyunga asi mutjima gwetu kuvhura ‘kudompa.’ (Epis. 34:18) Jehova kuvhura kukohonona po udigu ou, morwa “age kuverura ava va gwa nomutjima, ta dingi yironda yawo.” (Epis. 147:3) Nampili momaukaro gomadigu unene, Karunga kuvhura kutendeka nomutjima detu dokudompa nsene tu kanderera kwendi mepuro nokusikisa mo nompango dendi.—Resa 1 Johanesa 3:19-22; 5:14, 15.
8. Ngapi omu Jehova atu vatere nsene magazaro getu gana hepa ehengagwido?
8 Maudigu gokulisiga-siga kuvhura kuturetera sinka sosinene, makura magazaro getu ga hepa ehengagwido. Twa hepa evatero pokuligwanekera nomaudigu aga. Muepisarome kwa dimbire asi: “Nsene nina kara noyinka momutjima gwange, makura ove to gu tendekere nge.” (Epis. 94:19) Paurusa nage kwa tjenge hena asi: “Walye omu kara nosinka soyuma. Nye momakanderero geni omu hundire nkenye eyi muna hepa kwaKarunga. Omu yi hundire nkenye apa nonomutjima dompandu. Ano mbili zaKarunga, ezi za pitakana unene nondunge nadinye, ngazi kungira nomwenyo deni nomagazaro geni mwaJesus Kristusa.” (Fil. 4:6, 7) Apa magazaro getu aga hepa ehengagwido, twa hepa kuresa Matjangwa nokuteda ko.—2 Tim. 3:15-17.
9. Yisinke nayi vhura kutuvatera nsene tuna kara nomalizuvho gomadona?
9 Poyiruwo yimwe, kuvhura tu dompe unene mutjima dogoro yi tu twaredese komalizuvho gomadona. Nampo tatu lizuvhu asi kapi tatu vhuru kusikisa mo situmbukira songandi sopampepo. Moukaro wangesi, Jehova kuvhura kutuvatera nokutuhengagwida. Pasihonena: Apa Jehova ga tanterere Josuwa a pitisire Vaisraeli mokurwanesa nonkore dononkondo, Mosesa kwa tanterere vantu asi: “Kareni nononkondo noupenda. Nokuditjira si nomuhoko edi. Karunga gweni, HOMPA mwene, nga kara neni. Kapi ngayi mu tjindira ndi asi a mu zumbe.” (Deut. 31:6) Mevatero lyaJehova, Josuwa ga vhulire kupitisira vantu vaKarunga moSirongo sEtumbwidiro nokufunda nonkore dawo nadinye. PEfuta lyEgeha, Mosesa nage ga gwene evatero lyaJehova.—Ex. 14:13, 14, 29-31.
10. Nsene maukaro gokuguvisa gana kutuveresa parutu, yisinke nayi vhura kutuvatera?
10 Maukaro gokuguvisa kuvhura kutuveresa parutu. Yosili, kulya nawa nokugwana epwizumuko lyokugwanena po nokudeura rutu rwetu nokukara tuna zere kuvhura kutuvatera. Kukara nomutaro goBibeli kuhamena meho kuvhura kuvatera ukanguki wetu. Yipo nye, nsene kuna kuligwanekera nomaudigu, ayo ya wapa kwetu tu diworoke sihorokwa saPaurusa nononkango dendi dokukorangeda edi asi: “Ose mompatakani twa kara, nye kapi va tu diinina po, ose kwa kara momalimbiliro, nye kapi twa lisigilira; kutuhepeka, nye Karunga kapi ga tu zumba, kuturugana momudona, nye kapi va tu zonagura po.”—2 Kol. 4:8, 9.
11. Yisinke natu vhura kurugana nsene kuna kuvera pampepo?
11 Maudigu gamwe kuvhura kutuveresa pampepo. Jehova kuvhura a tu vatere. Nonkango dendi kutuhuguvaresa asi: “Age kukwafa navenye ava ava kara moudigu; age kuzerura ava va nunupa.” (Epis. 145:14) Mokugwana evatero kouvera wopampepo, twa hepa kupapara evatero kovakuronambunga. (Jak. 5:14, 15) Ntani kudiworoka nkenye apa ehuguvaro lyetu lyomwenyo gwanarunye kuvhura kutunkondopeka nsene epuro lyetu kuna kuliheteka.—Joh. 17:3.
Yihonena yehengagwido lyokutunda kwaKarunga
12. Ngapi omu Jehova ga hengagwidire Abirahamu?
12 Muepisarome kwa tente asi: “Diworoka eyi wa tumbwidira nge, ame mukereli goge; ayo kwa pa nge ehuguvaro. Nomoruhepo rwange moomu yeeyi etumbwidiro lyoge lya pa nge mwenyo.” (Epis. 119:49, 50) Naina, twa kara noNonkango daJehova, omu mwa kara yihonena yoyinzi yowo va gwene ehengagwido lyokutunda kwaKarunga. Pasihonena, Abirahamu kwa guvire unene apa ga zuvhire asi Jehova ta ka zonagura po Sodoma naGomora. Age kwa pulire Karunga asi: “Ee, novahungami to va zonagura po kumwe novadinikarunga ndi?” Jehova ga hengagwidire Abirahamu pokumutumbwidira asi kapi nga zonagura po Sodoma nsene mu kara vahungami 50. Nye Abirahamu kwa twikilire kupura Jehova yikando yitano asi: Ngapi nsene mu kara vahungami 45? ndi 40? ndi 30? ndi 20? ndi 10? Nkenye sikando, Jehova nelididimiko kwa tumbwidilire Abirahamu asi kapi nga zonagura po Sodoma. Nampili ngomu mwa dilire kukara vahungami murongo moyitata yina, Jehova simpe ga parwire Roto novana vendi wovakadona.—Gen. 18:22-32; 19:15, 16, 26.
13. Ngapi omu Hana ga likidire asi ga huguvarere Jehova?
13 MukadaElikana, Hana kwa here kukara nomunona. Nye age kwa kere nganze, ano eyi kwa mu guvisire. Age kwa kanderere kwaJehova kuhamena udigu wendi, ano mupristeli Eli ta mu tantere asi: “Karunga gwaIsraeli ngano ta ku pe eyi ono mu hundire.” Eyi ya hengagwidire Hana, “makura sipara sendi tasi runduruka.” (1 Sam. 1:8, 17, 18) Hana kwa huguvarere Jehova, nokusiga udigu wendi momawoko gendi. Nampili ngomu ga dilire kudiva eyi ngayi horoka, Hana kwa kere nombili zomomutjima. Konyima zosiruwo, Jehova ga limbwilire ekanderero lyendi. Ta kara nomarutu gavali nokuhampuruka munona gomumati, makura ta mu ruku Samwere.—1 Sam. 1:20.
14. Morwasinke Ndafita ga hepererere ehengagwido, ntani kwalye ga li pulire?
14 Sihonena sagumwe ogu ga hengagwidire Karunga kuna kara Hompa Ndafita. Jehova ‘kumona momutjima.’ Apa Jehova ga horowere Ndafita a kare hompa gwaIsraeli, age ga divire asi Ndafita kwa here kurugana uwa noukareli wousili. (1 Sam. 16:7; 2 Sam. 5:10) Nampili ngoso, konyima zosiruwo, Ndafita kwa honderere naBateseba nokuhetekera ko kuhoreka nzo zendi pokudipagesa mugara gwendi. Apa Ndafita ga dimbwilire unene wonzo zendi, ta kanderere kwaJehova asi: “Komba po nonzo dange, morwankenda zoge zonene! Kuhwa po udona wange, o zerese nge kononzo dange! Na dimburura mausima gange; ame kuna kulivera nkenye apa nonzo dange.” (Epis. 51:1-3) Ndafita kwa litezwilire nawa-nawa kononzo dendi, ano Jehova ga mu gusilire po. Nampili ngoso, Ndafita simpe ga ligwanekerere noyitundwamo yonzo zendi. (2 Sam. 12:9-12) Nye, nkenda zaJehova kwa hengagwidire Ndafita.
15. Evatero musinke Jehova ga pere Jesus komeho zonomfa dendi?
15 Apa ga kere pevhu, Jesus kwa ligwanekere nomaukaro gomanzi gomadigu. Karunga kwa pulisilire maheteko ogo, nye Jesus kwa kwatererere koulimburukwi wendi ngomuntu gokusikilira mo ogu ga huguvarere nkenye apa mwaJehova nokukwaterera koupangeli wendi. Apa sa sikire mo siruwo sokumuhorora nokumudipaga, Jesus kwa kanderere kwaJehova asi: ‘Kapisi moomu na panga ame, nye mpango zoge zi sike mo.’ Muengeli ta monekere Jesus, ta mu koreke. (Ruk. 22:42, 43) Karunga kwa pere Jesus ehengagwido, nokumunkondopeka nokumuvatera, morwa ga yi hepere posiruwo sina.
16. Ngapi omu Jehova na tu vatera nsene eparu lyetu kuna kara mosiponga morwa epuro lyetu?
16 Nampili eparu lyetu li kare mosiponga morwa epuro lyetu, Jehova nga tu vatera tu kare valimburukwi kwendi. Ntani hena, ehuguvaro lyevhumbuko kutuhengagwida. Omu tuna kundindira nononkondo ezuva olyo apa ‘nkore zokuhulilira nomfa ngava ka zi zonagura po’! (1 Kol. 15:26) Vakareli vaKarunga wovalimburukwi ava va fa navamwe hena, moveli simpe momagano gaJehova ntani nga ka va vhumbura. (Joh. 5:28, 29; Yirug. 24:15) Kuhuguvara metumbwidiro lyaJehova lyevhumbuko kutuhengagwida ntani kutupa ehuguvaro nampili moyiruwo yomahepeko.
17. Ngapi omu Jehova na tu hengagwida nsene tuna zumbanesa vahali vetu monomfa?
17 Ee, omu tupu ayi tu hengagwida pokudiva asi vahali vetu ava vana rara ngesi monontoko ngava ka va tengwidira hena keparu mouzuni woupe omu ngamu ka pira nayinye eyi ayi reta ruguwo! Ee, situmbukira musi ngasi ka kara ‘kemukurumbunga’ lyovakareli vaJehova ava ngava ka paruka kezonaguro lyouzuni ou woudona mokukatambura nokukaronga owo ngava ka vhumbura!—Ehor. 7:9, 10.
Mawoko gaKarunga ganarunye yiwo ukorero wetu
18, 19. Ngapi omu Karunga ga hengagwidire vakareli vendi apa va ligwanekerere nomahepeko?
18 Mosesa kwa tjenge rusumo rokunkondopeka rokuhengagwida Vaisraeli, pokutanta asi: “Karunga yige ga kara nkenye apa mupopeli goge, ano mawoko gendi ganarunye yiwo ukorero woge.” (Deut. 33:27) Muporofete Samwere konyima kwa tanterere Vaisraeli asi: “Mwa ha zumba HOMPA, nye mu ruganeneni nonomutjima nadinye. . . . HOMPA kwa tumbwidira nomugano, ano age kapi nga mu zumba.” (1 Sam. 12:20-22) Nsene tu kwaterera koukareli wousili waJehova, kapi nga tu zumba. Nga tu pa nkenye apa evatero eli twa hepa.
19 Karunga kuna kugava evatero nehengagwido kovantu vendi momazuva aga gopouhura goudigu. Monomvhura dantani, vanavazinyetu wovanzi mouzuni mudima kwa va hepeka nokuvatura monodorongo morwa kukarera Jehova. Yilimonena yawo kulikida asi Jehova kuhengagwida vakareli vendi moyiruwo yoyidigu. Pasihonena, munazinyetu gumwe mEgwanekero lyaSoviet zanare kwa kere modorongo nomvhura 23 morwa epuro lyendi. Nampili ngomu ga kere modorongo, simpe nga gwana yimbapiratjangwa yoBibeli eyi ngayi mu nkondopeke nokumuhengagwida. Age kwa uyungire asi: “Nomvhura nadinye odo, ame kwa lirongere kuhuguvara Jehova ntani na gwene nonkondo kwendi.”—Resa 1 Peturusa 5:6, 7.
20. Morwasinke natu huguvarera asi Jehova kapi nga tu zumba?
20 Yi kare asi udigu musinke ngatu ligwanekera nawo, ya wapa mokudiworoka nonkango domuepisarome dokuhengagwida edi asi: “HOMPA kapi nga zumba vantu vendi.” (Epis. 94:14) Nampili ngomu twa hepa ehengagwido, nose twa kara nositumbukira sosinene sokuhengagwida wopeke. Mosirongwa sokukwama ko, ngatu ka lironga omu natu kuvhura kuhengagwida owo vana guwu mouzuni ou womaudigu.
Ngapi omu no limburura?
• Yininke musinke ayi retesa po ruguwo?
• Ngapi omu Jehova a hengagwida vakareli vendi?
• Nsene eparu lyetu kuna kara mosiponga, yisinke nayi vhura kutuhengagwida?
[Kakende/Mafano gepepenuno 25]
OMU NO LIDIDIMIKIRA YININKE EYI NAYI KUNDAMA . . .
▪ mutjima Epis. 147:3; 1 Joh. 3:19-22; 5:14, 15
▪ magazaro Epis. 94:19; Fil. 4:6, 7
▪ malizuvho Ex. 14:13, 14; Deut. 31:6
▪ ukanguki woparutu 2 Kol. 4:8, 9
▪ ukanguki wopampepo Epis. 145:14; Jak. 5:14, 15