Omu ligusa-gusire po

1, 2. Morwasinke natu konakonena eharo lyetu lyokugusira po vakwetetu?

BIBELI kutuvatera tu dive omu Jehova a tara nonzo neyi a rugana ko apa atu zono. Nonkango dendi kutuhorwera eharo lyendi lyokutugusira po. Mosirongwa sa ka pita, ose twa lirongere eyi Jehova ga dongwenenene po Ndafita naManase. Awo kwa liverere kweyi va rugene nokuhundira egusiropo kwaJehova ntani va tokomenene mokudira hena kutura nonzo dokulifana. Awo kwa litezwilire yiyo Jehova ga va fililire nkenda.

² Ngesi tu konakoneni eharo lyetu lyokugusira po vakwetetu. Ngano ngapi wa lizuvhire nsene gumwe gowo ga dipagere Manase kwa kere gekoro lyoge? Ngano wa vhulire kugusira po Manase ndi? Naina ose kuna kuparuka mouzuni woudona wonyanya wa zura elinenepeko. Morwasinke natu tungira po nkareso zokugusira po vakwetetu? Nsene ove kwa ku tekwire momudona, yisinke nayi ku vatera o pangere malizuvho goge, o kare monkedi omu ana ku harere Jehova nokugusira po?

EYI NATU GUSILIRA PO VAKWETETU

3-5. (a) Esimwititi musinke ga ruganesere Jesus eli nali tu vatera tu gusire po vakwetetu? (b) Yisinke natu lirongera ko kononkango daJesus domwaMateusa 18:21-35?

³ Twa hepa kukara neharo lyokugusira po owo ava tu zono, va kare asi womombunga ndi woponze, ano kurugana ngoso ngayi tu vatera tu kare nombili nava vemepata novakaume nava wopeke ntani naJehova. Matjangwa kulikida asi twa hepa kukara neharo lyokugusira po wopeke yi kare asi yikando yingapi va tu zonena. Jesus kwa simwitilire esimwititi lyomukareli ogu ga korotere makongo gomanzi hompa gwendi, ano esimwititi eli tali tu vatere tu dimburure eyi twa hepera kugusira po.

⁴ Mukareli kwa lililire hompa gwendi makongo gomayovi gonoranda, nye hompa ga mu gusilire po. Konyima zoyo, mukareli ta pwaga taka gwana mukareli mukwawo ogu ga mu lililire makongo gonosenda dingapi tupu. Mukareli mukwawo kwa mu likwamberere, nye age kapi ga mu gusilire po makura ta mu pakesa modorongo. Nkareso zangoso kwa handukisire unene hompa gwawo. Hompa ta mu pura asi: “‘Nani nove nokuvhura si kufira nkenda mukareli mukweni, moomu kani ku fililire ame nkenda?’ Makura hompa gwendi ta handuka, ta mu gava kovahepeki, dogoro noku nga mane kufuta nzo zendi mudima.”—Mat. 18:21-34.

⁵ Yisinke Jesus ana tu harere tu lirongere ko kesimwititi eli? Jesus kwa hulisire ngesi: “NaTate gemeguru nage yimo nga mu ninka nkenye ogu a dili kudongwenena po mukwawo nzo zendi nomutjima nagunye.” (Mat. 18:35) Nonzo edi atu tura morwa kudira kusikilira mo kwetu kulikida asi ose nokuvhura si kusikisa mo nompango daJehova. Nye age ga kara neharo lyokutugusira po nokudongonona po nonzo detu nadinye. Yipo nye, nsene tuna hara Jehova a kare kaume ketu, twa hepa kugusira po vakwetu. Eyi yiyo ga uyungire Jesus pEudiso lyopoNdundu asi: “Nsenesi mu dongwenena po vantu maunzoni gawo, Guhyeni gemeguru ngano nage nga mu dongwenena po aga geni. Ano nsenesi mu dira kudongwenena po vantu mauzoni gawo, Guhyeni gemeguru nage ngano kapi nga mu dongwenena po maunzoni geni.”—Mat. 6:14, 15.

6. Morwasinke ayi dilire kukara ureru kugusira po vakwetetu?

⁶ Kuvhura o yi kwatese ko asi twa hepa kugusira po wopeke nye nampo kuvhura o lizuvhe asi kapisi ureru kuyirugana. Yimo ya kara ngorooro nsene gumwe ana tu handukisa. Pasihonena, kuvhura tu handuke ndi tu hare kutengeka muntu ogo ndi tu mu rugwidire kuwoko. Nampo kuvhura tu lizuvhe asi kapi ngatu mu gusira po. Nsene to lizuvhu ngoso, yisinke no vhura kurugana yipo o kare neharo lyokugusira po ngomu ana yi tu harere Jehova?

KWATA EGANO MALIZUVHO GOGE

7, 8. Yisinke nayi ku vatera o gusire po muntu ogu ana ku tekura monkedi zondona?

⁷ Apa atu lizuvhu asi kuna tu tekura momudona, ose pamwe kuhanduka unene. Mudinkantugara gumwe kwa singonona eyi ya horokere ezuva limwe apa ga handukire unene asi: “Ame kwa tundire mo membo nokutanta asi kapi ngani ka tengwira mo hena. Ako kwa kere ko mukarompepo gomuwa, makura yipo na gendere monzira zonunu zokulimwenena, ha na hokwa kugenda ehandu lyange tali tameke kulitura. Konyima zonovili dongandi yipo na tengwire kembo nokulivera kweyi na handukilire.” Nsene o litulira po siruwo sokumwenekeda ehandu lyoge ngwendi googu mudinkantugara, ove ngo gazadara ko nawa koukaro woge mevango lyokurugana yininke eyi no ya livera konyima.—Epis. 4:4; Yis. 14:29; Jak. 1:19, 20.

⁸ Nye yisinke wa hepa kurugana nsene malizuvho gomadona kuna kutwikira? Hetekera ko kugazadara ko kweyi ono handukire. Morwa eyi yina horoka yidona ndi morwa kapi vana kutekura monkedi zongwa? Ndi morwa kuna kugazara asi muntu ogo kuna yi ruganene a ku korese mowina? Eyi ana rugana sili kuna kara yininke yoyidona ndi? Kugazadara ko nokukwata egano eyi ono kulizuvhira ngoso nayi ku vatera o rundurure malizuvho goge kuliza nomu ga yi harera Jehova. (Resa Yisewe 15:28; 17:27.) Magazaro gangoso ngaga ku vatera o kare neharo lyokugusira po. Nampili yi kare asi udigu oyo kuyirugana, Bibeli kuvhura zi ku vatere o kwate egano ‘matedo noyigazo yoge yokomutjima’ nokuhonena eharo lyaJehova lyokugusira po.—Heb. 4:12.

HEPERO O HANDUKE NDI?

9, 10. (a) Yisinke twa hepa kurugana nsene vana tu handukisa? (b) Ngapi omu kukwata egano naku tu vatera tu rundurure malizuvho getu kogu ana tu handukisa?

⁹ Pwa kara maukaro gomanzi aga naga vhura kuhandukisa muntu. Pasihonena, ove kuna kusinga, nampo gumwe kuvhura a hare kuyakumbwanda. Yisinke no rugana ko? Vantu vamwe kuhanduka unene nokuhomokera ogu nkare a mu mbwande. Nye ngoMukriste, kapi nayi wapa o rugane yokufana ngoso.

¹⁰ Ayo ya wapa kugazadara ko komeho o rugane ko yuma. Nampo nove kuna gwederere ko koudigu owo morwa koyili yimwe yina ku donganesa. Ndi nampo ogu nkare a ku mbwande etuwa lyendi lina kara noudigu. Kuvhura tu dire kuhanduka nsene tu hetekera ko kukwata egano eyi lina horokere epuko lyangoso, nokudimburura asi kapi tatu diva mauzera nagenye makura eyi ngayi ku ninkisa o kare neharo lyokugusira po. Twa ha genderera kuhanduka. MwaMuudisi 7:9 kutanta asi: “Walye o genderere kuhandukisa mutjima goge, yeeyi ehandu kwa kara monturo zegova.” Yiruwo yimwe kuvhura tu gazare asi kuna yi ruganene nositambo sokutuhandukisa, nye pamwe morwa kudira kusikilira mo yiyo vana ruganene epuko olyo. Kuhetekera ko kudiworoka asi kapi tuna diva mauzera nagenye eyi ana uyungire ndi ana ruganene ngoso, ngayi tu vatera tu likide eharo komuntu ogo nokumugusira po. Ove ngo hafa nsene ngo rugana ngoso.—Resa 1 Peturusa 4:8.

‘MBILI ZOGE TAZI KU TENGWIRE NYAMOGE’

11. Ngapi omu twa hepa kukara yi kare asi monkedi musinke vana tu tekura vantu moyirugana yokuzuvhisa?

¹¹ Ngapi omu no likida elipangero nsene muntu kuna kukutekura momudona posiruwo oso ove mokuzuvhisa ono kara? Apa Jesus ga tumine vazuvhisi 70, age kwa va tanterere va morore nkenye embo eli va dingwire. Jesus kwa tente asi: “Nsene si muntu gombili, mbili zeni tazi wiza pwendi. Nsene yimo sa, mbili zeni tazi mu tengwire nyamweni.” (Ruk. 10:1, 5, 6) Ose kuhafa apa vantu ava tambura mbudi zongwa ezi atu zuvhisa, morwa ngava gwanena mo uwa. Nye poyiruwo yimwe vantu kapi ava tu tambura nombili. Yisinke twa hepa kurugana? Jesus kwa tente asi twa hepa kukara nombili. Twa hepa kukara nombili pwankenye nzugo yi kare asi monkedi musinke vana tu tekura. Nsene tu handuka morwa kututekura momudona, ose ngoso kapi tuna kara nombili ezi ga uyungire Jesus.

12. Kuliza nononkango daPaurusa domoVaefeso 4:31, 32, yisinke twa hepa kurugana?

¹² Kondjera kukara nombili momaukaro nagenye kapisi moyirugana yokuzuvhisa tupu. Kugusira po wopeke kapi yina kutanta asi ono kwatesa ko epuko lyawo ndi o lininkise asi kapi yina ku koresa. Ayo kutanta asi kapi to kara nehandu nye to hetekere ko kukara nombili zomomutjima. Vantu vamwe kutwikira kugazara yininke yoyidona eyi ya va horokerere nare makura tayi donganesa po mbili zawo. Wa ha pulisira magazaro gangoso ga ku pangere. Diworoka asi kapi ngo hafa nsene o kwatera vakweni nkoko. Yipo nye, kara neharo lyokugusira po.—Resa Vaefeso 4:31, 32.

KARA MONKEDI EZI AZI HAFESA JEHOVA

13. (a) Ngapi Mukriste na ‘rundaika makara gomundiro pomutwe’ gonkore zendi? (b) Yisinke nayi vhura kuhoroka nsene o kara nombili komuntu ogu ana ku tekura momudona?

¹³ Poyiruwo yimwe nsene muntu kuna ku tekura monkedi zondona, kuvhura o hetekere ko kumuvatera a likide eharo kweyi azi rongo Bibeli. Mupositoli Paurusa kwa tjenge asi: “‘Nkore zoge nsene ana fu nzara mu pa nondya a lye. Nsene ana fu enota, mu pa mema a nwe. Nsene o yi rugana eyi, ngwendi nyove ogu ono kumurengwesa.’ Walye omu tarerere udona u mu funde, nye one fundiseni udona kouwa.” (Rom. 12:20, 21) Ntanto zomovelise ezi asi “ngwendi nyove ogu ono kumurengwesa,” moRugereka kwa zi toroka asi “ngwendi kuna kumurundaika makara gomundiro pomutwe gwendi.” Mbuungofano ezi kwa tamba kongendeseso zanare zokuhemuna yivera. Pokukara nombili apa ava ku handukisa vantu, ayo kuvhura kurundurura nkareso zawo nokutameka kukutekura monaruwa. Nsene o kwata egano nokukara nonkenda komuntu ogu ana kutekura momudona, kuvhura yi mu tumangede a hare kulironga ko yoyinzi kuhamena Bibeli. Yi kare asi monkedi musinke, elimbururo lyoge lyombili kuvhura kuninkisa muntu a gazadare ko konkareso zoge.—1 Pet. 2:12; 3:16.

14. Morwasinke no karera neharo lyokugusira po nampili va ku tekure momudona?

¹⁴ Pwa kara vantu vamwe ava natu dira kulikwatakana nawo, ngwendi ava va gusa mombunga. Awo kwa va gusa mombunga morwa kwa tura nzo zonene ntani kapi va litezurura. Nsene muntu gwangoso ga ku koresa komutjima, kuvhura yi kare udigu kumugusira po nampili a litezurure morwa kukora kopamalizuvho kugusa siruwo. Momaukaro gangoso, wa hepa kutwikira kuhundira Jehova a ku vatere o kare neharo lyokugusira po muntu ogo. Eyi mulyo morwa kapi ono diva eyi ana kugazara muntu ogo nye Jehova ga yi diva. Age kukonakona mutjima nomagazaro gomunzoni ntani age kulididimikira. (Epis. 7:9; Yis. 17:3) Eyi yiyo ga uyungira Matjangwa asi: “Walye omu likwatere-kwatere nonkoko. Omu rugane eyi ya wapera vantu navenye. Kombinga zeni, one kareni nombili kovantu navenye ntani. Vakwetu, walye omu lirugwidire-rugwidire udona noudona. Sigireni ehandu lyaKarunga evega. Yeeyi kwa tjanga asi, ‘Ame nyame ani tengwida kuwoko nehandu, nyame ani futu, yimo ana kutanta’” Jehova. (Rom. 12:17-19) Kuvhura tu pangure vakwetetu ndi? Hawe. (Mat. 7:1, 2) Jehova yige ya fira yokupangura.

15. Yisinke nayi tu vatera tu sesupike ehandu lyetu kogu ana tu zonene?

¹⁵ Nsene kuna kukudigopera kugusira po ogu ga ku tekure momudona ntani ga litezurura, ayo ngayi ku vatera pokudiworoka asi nage kuna kara moukaro wokulifana. Ngwendi nyove, nage kapi ga sikilira mo. (Rom. 3:23) Jehova kufira nkenda vantu navenye morwa kudira kusikilira mo kwawo. Yipo nye ya wapera asi tu kanderere po ogu ana tu zonene. Nsene tu kanderera po ogu ana tu zono, ehandu lyetu kwendi ngali sesupa. Jesus ga yi zeresere asi twa hepa kunyokera po kukwatera vakwetu nkoko, pokutanta asi: “Omu hare wonkore zeni, omu va ruganene yoyiwa ava va mu nyenga, one tomu kandererere mo ava ava mu rundire oku tava mu hepeke.”—Mat. 5:44.

16, 17. Yisinke no rugana nsene vakuronambunga vana tokora asi muntu ana litezurura, ntani morwasinke?

¹⁶ Jehova ga pa vakuronambunga situmbukira sokutokora nsene asi muntu ogu ga tura nzo zonene ana litezurura ndi hawe. Vakuronambunga owo kapi va diva nayinye eyi ga diva Jehova kuhamena ukaro owo, nye awo kuhetekera ko kutura po matokoro kuliza neyi za uyunga ko Bibeli ntani negendeso lyompepo zokupongoka. Yipo nye apa ava kanderere kwaJehova a va vatere va ture po matokoro, ayo kulikida asi matokoro gawo gana lizi nomutaro gwaJehova.—Mat. 18:18.

¹⁷ Moukaro wangesi, twa hepa kulikida ulimburukwi. Ove ngo gusira po muntu ogo vakuronambunga vana tokora asi ana litezurura nokumulikida eharo ndi? (2 Kol. 2:5-8) Eyi kuvhura yi kare udigu, unene po nsene kwa ku koresa komutjima ndi gumwe gekoro lyoge ga koresa. Nye nsene o huguvara mwaJehova nomu a gendesa yininke mombungakriste, ove ngo mu gusira po. Ngayi likida asi ove wa kara neharo lyokugusira po.—Yis. 3:5, 6.

18. Mauwa musinke no gwanena mo nsene o kara neharo lyokugusira po?

¹⁸ Ose ngatu gwanena mo mauwa nsene tu gusira po vakwetu. Ayo kutuvatera tu kare noruhafo ntani nelikwatakano lyewa nava wopeke. Nye nsene tu dira kukara neharo lyokugusira po, ayo ngayi tu veresa, kapi ngatu kara nelikwatakano lyewa nava wopeke ntani kapi ngatu hafa. Nye yomulyo po unene mokukara neharo lyokugusira po kuna kara asi ose ngatu kara nelikwatakano lyewa naGuhyetu gemeguru, Jehova.—Resa Vakorosi 3:12-14.