“Yirugana yokurugana yinene”

MOJERUSAREMA kwa kere mo sigongi sosinene. Makura hompa Ndafita ta zigida masimbi novakurona ava ava pitisire yirugana yombara ntani novanekuto. Awo kwa hefe sili unene pokuzuva eyi ga va tanterere. Jehova kwa geve situmbukira kwaSaromo munwaNdafita sokutunga ntembeli evango lyokukarera Karunga gosili. Karunga kwa likidire Ndafita mafaneko nagenye omu ngava tunga ntembeli makura ta yi gava kwaSaromo. Ndafita kwa tente asi: “Yirugana yokurugana yinene, morwa ayo kapisi yombara zovantu, nye nani ntembeli zaHOMPA Karunga.”—1 Hist. 28:1, 2, 6, 11, 12; 29:1.

Kutunda opo, Ndafita ta pura asi: “Yilye ogu ana hara kugava kwaHOMPA uhwi nomwenyo guna lizamba?” (1 Hist. 29:5) Ngano nove yipo wa kere, yisinke ngano wa rugene? Ngano wa kwatesere ko sirugana oso sosinene ndi? Vaisraeli kwa si kwatesere ko. Awo ‘kwa geve nonomwenyo donongwa kwaHOMPA. Awo kwa hefe mokumona asi eyi va geve yina vhuka unene.’—1 Hist. 29:9.

Konyima zonomvhura mafere, Jehova ga tulisire po ewapaiko lya pitakana ntembeli ezi va dikire moJerusarema. Age kwa tulisire po ntembeli zopampepo, omu nava vhura kumukarera vantu kupitira monzambo zaJesus. (Heb. 9:11, 12) Ngapi Jehova ana kuvatera vantu va tulise po ukaume nendi? Kupitira moyirugana yokuzuvhisa. (Mat. 28:19, 20) Ngoyitundwamo, nkenye mvhura malirongo goBibeli gokusika pomamiliyona kuna kugarugana ntani varongwa mayovi kuna kugwana ekuho ntani nombungakriste dokusika pomafere kuna kuditulisa po.

Morwa eligwederero olyo, pana kara hepero zokunduruka yimbapiratjangwa yoBibeli yoyinzi ntani zokudika nokuwapukurura Yinyanga yoUhompa ntani mavango gokuruganena yigongi. Sirugana sokuzuvhisa kuna kureta yitundwamo yoyiwa.—Mat. 24:14.

Eharo lyokuhara Karunga novakwawo ntani sirugana sokuzuvhisa esi sina kara songenderera kutumangeda vantu vaKarunga va ‘gave kwaHOMPA uhwi nomwenyo guna lizamba.’ Ayo kuhafesa ‘pokufumadeka HOMPA pokumupa nzambo zeyi yoyiwa po,’ ntani pokumona omu vana kuruganesa yigava oyo monkedi zongwa mokukwatesa ko sirugana sokuzuvhisa uzuni mudima.—Yis. 3:9.

Omu Ava Gava Vamwe Yigava Yokoyirugana Yomouzuni Mudima

Wovanzi naina ‘kupungura’ ndi kuyereka ko yimaliwa yimwe yokugava ngoyigava nokukayitura mosikesa va tjanga “Yirugana yomouzuni mudima.” (1 Kol. 16:2) Nkenye kwedi, nombungakriste kutuma yimaliwa eyi komberewa zoNombangi daJehova zomosirongo sawo. Yigava yoyimaliwa nayo hena kuvhura kuyituma kuvyukilira komberewa zomutayi zoNombangi daJehova zomosirongo seni. Mokudiva edina lyoaderesi ezi adi ruganesa Nombangi daJehova mosirongo seni, gwanekera ndi toonena mberewa zomutayi zomosirongo seni. Aderesi zomberewa zomutayi kuvhura kuzigwana ko-www.pr2711.com. Yigava eyi yina kukwama ko kuvhura kuyituma kuvyukilira:

YIGAVA

Yigava yoyimaliwa, yoyilifuwiso ngwendi nolinga noyiranda noyimbilingwa nonovili ndi nayimwe hena yomulyo eyi wa weka. Wa hepa kuyituma kumwe nombilive ezi zina kufaturura asi yuma yangoso kuna kara yigava.

EWAPAIKO LYOYIGAVA

Kugusa ko yigava yoyimaliwa nayimwe hena yomulyo eyi wa weka, pwa kara hena nonkedi dimwe dokugava koyirugana yoUhompa yomouzuni mudima. Ado kwa di tumbura konhi. Yi kare asi monkedi musinke ono hara kugava, ya wapa pomuhowo kugwanekera nomberewa zomutayi zomosirongo seni o dive nonkedi edi da kara po. Mokumona asi noveta dosirongo nedi domutero kwa lisiga, ayo ya wapa kupura tanko vagendesi mutero nonoveta dosirongo komeho o horowore nkedi zongwa ezi no gava.

Upungwiromeho: Sigava esi kuvhura kusigava pokutjangesa Nombangi daJehova ngovagwaneni mo uwa moyimaliwa youpungwiromeho.

Stocks ntani Bonds: Stocks nobonds kuvhura kuyigava koaderesi zoNombangi daJehova ngoyigava ndi kuvhura kuzitjangesa ngoupingwa nsene ngo fa.

Evango ndi etungo: Evango ndi etungo kuvhura kuyigava ngosigava ndi kugava nonkondo kogu lina tumbukire ogu na li ruganesa eparu lyendi nalinye. Divisa mberewa zomutayi zomosirongo seni komeho zokugava evango ndi etungo.

Kutjangesa upingwa: Etungo ndi yimaliwa kuvhura kuyitjangesa ngoupingwa pokuruganesa aderesi zoNombangi daJehova. Mutjangesi ogo kapi nga futa mutero gomunzi.

Komauzera gomanzi, diva poruha “Gava yigava koYirugana yetu yokuzuvhisa uzuni mudima,” oru rwa kara ketamekero lyointaneta zetu jw.org ndi kuvhura kugwanekera nomberewa zomutayi zomosirongo seni.