“Hareni vapuli vakweneni”
Pana piti nomvhura mayovi gavali kutunda apa va tjenge nonkango dosiparatjangwa esi. (1 Pet. 2:17) Twa hepa kuditura pasirugana ngesi kupitakana pwanare. Ngapi natu hara vapuli vakwetetu uzuni mudima? Mouzuni ou wokudira eharo ngapi omu natu divilisa asi eharo lyetu lya ha sesupa? (Mat. 24:12) Kuvhura o limburure mapuro gana kukwama ko ngomu no ka tarere vidiyo Our Whole Association of Brothers.
(1) Sirowoke twa tameka kukara ruha rovapuli vakwetetu? (2) Yirugana musinke yitatu yokulifana atu lihameke mo unene novapuli vakwetetu uzuni mudima? (3) Ngapi vapuli vakwetetu va likidire etokomeno lyawo lyokuzuvhisa (a) momawiza gaAlaska, (b) momazenga gomanene gaEuropa ntani (c) nomonomusitu daPeru? (4) Morwasinke natu dilira kulizuvha asi sirugana setu sokuzuvhisa kapi sa kara nomulyo? (5) Gava yihonena omu Nombangi daJehova da hengagwida nokuvatera vapuli vakwawo (a) konyima zekankamo lyevhu, (b) konyima zekundungu lyenene ntani (c) poyiruwo yoyita? (6) Mononkedi musinke natu likida eharo kovapuli vakwetetu? (Joh. 13:35) (7) Mauwa musinke atu gwanene mo apa atu rugana kumwe pokutunga Yinyanga yoUhompa? (8) Ngapi vapuli vakwetetu wokoEuropa ntani naRusia va kerere ngorooro noulimburukwi apa yirugana yawo va yi silikire? (9) Mawapaiko musinke sinzi soNombangi adi tura po yipo va ka kare koyigongi, ntani morwasinke? (10) Ngapi vidio ezi zina nkondopeke etokomeno lyoge (a) lyokukarera Jehova komapongo goSikriste mouumwe novapuli vakwetetu, (b) lyokuvatera wopeke vana kara momaudigu ntani (c) lyokuzuvhisa noulimburukwi nkenye oku kuliza noukaro woge? (11) Ngapi ntani siruwo musinke natu ruganesa vidio ezi moyirugana yokuzuvhisa?
Sitambo setu sosinene sokukara ruha rovapuli vakwetetu kuna kara eharo lyetu lyokuhara Jehova. Ose kwa hara kulironga kumuhamena nokuronga wopeke kumuhamena. Ntani ose kwa hara vantu ava ga hara Jehova. Apa atu va va tere poyiruwo yomaudigu, kapi atu ndindire asi Karunga a tu pandure. Nye ose kupandura Karunga morwa ose kutara vapuli vakwetetu ngouhwi wokutunda kwendi. Ngomu mazuva gouhura gana kuhedera pepi mouzuni ou wokudira eharo, ngano tu twikire ngorooro kulikida eharo kovapuli vakwetetu uzuni mudima!