Morwasinke Karunga a dilire kulimburura makanderero gamwe?

Guhyetu gemeguru, Jehova Karunga ga liwapaikira ntani kumuhafesa mokuzuvha makanderero getu gokomutjima. Nye koyili yimwe ayi mu ninkisa a dire kulimburura makanderero getu. Yininke musinke oyo ntani yisinke twa hepa kudiworoka nsene kuna kukanderera? Tara nompango dimwe domoBibeli.

Mbunga zovantu mongereka kuna kukanderera pokuruganesa buke zomakandero.

“Nsene tomu kanderere, kapisi mu rugurure nonkango dokulifana.”—Mateusa 6:7, NW.

Jehova kapi ana tu harere tu rugurure makanderero aga twa kwata momutwe ndi tu ga rese mobuke zomakanderero. Age kuna tu harere tu kanderere kutundilira komutjima. Gazara tupu omu no lizuvha nsene kaume koge a rugurura nonkango dokulifana nkenye apa nomu uyunga. Vakaume wovawa kuuyunga nemanguruko ntani kutundilira komutjima. Apa atu kanderere kwaGuhyetu gemeguru mononkango danyamwetu, ayo kulikida asi age kaume ketu.

Mugara kuna kutara keguru oku ta para sikarata zokuvenena yimaliwa.

“One nampili ngomu omu hundire, nye kapi omu yi gwana, morwakuhundira momudona.”—Jakopo 4:3.

Ose twa yi diva asi Karunga kapi ta limburura makanderero getu nsene tu mu hundira yininke eyi ga nyenga ndi ga silika. Pasihonena, tu tante asi muntu kuta ukarata ndi Jakpot makura ta kanderere kwaKarunga yipo a vene yimaliwa yoyinzi, Karunga kuvhura a limburure ekanderero lyangoso ndi? Age kwa tu rondora kudowokera yimaliwa ndi kupura moyininke ya hana asi usili. (Jesaya 65:11; Rukasa 12:15) Yosili, twa ha ndindira asi Jehova na limburura ekanderero lyangoso! Mokuninka asi Karunga a limburure makanderero getu, twa hepa kukanderera kuliza nompango zendi ngamoomu va yi tjanga moBibeli.

Mupitisili kuna kukanderera po vakwayita.

“Nsene kapi o limburukwa koVeta, Karunga nga tara makanderero goge noutondwe mokugapurakena.”—Yisewe 28:9.

Mosiruwo sanare, Karunga kapi nga limburura makanderero govantu ava ngava dili kulimburukwa konoveta dendi. (Jesaya 1:15, 16) Karunga kapi ga runduruka. (Marakiya 3:6) Nsene tuna hara Karunga a limburure makanderero getu, twa hepa kukondja kuparuka kuliza nonoveta dendi. Ngapi nsene twa rugene yininke yoyidona nare? Ngoso eyi kutanta asi Jehova kapi nga tu purakena ndi? Hawe! Nsene tu siga udona ou twa rugene nokulitura mo unene mokuhafesa Jehova, age nga tu gusira po.—Yirugana 3:19.