“Mumbyoge na pinduka”

1. Ngapi omu mumati gumwe ga yi likidire asi ga kara nehuguvaro mevhumbuko?

MUMATI gedina Matthew kwa verere unene, yipo nye age ga hepere kuza komatauro gomanzi. Apa ga kere nonomvhura ntambali, nage nepata lyawo kwa tarerere elikwamo lyankenye kwedi ko JW Broadcasting^®. Ngomu va sikire kehagero lyelikwamo olyo, awo kwa mwene rusumo rovidiyo oru rwa likidire kuhamena kutambura vantu ava twa hara.b Apa lya pwire elikwamo olyo, Matthew yipo ga zire kovakondi vendi, noku kwata komawoko gawo nokuuyunga asi: “Yina, tate, mwa mono sa morusumo, nampili ni fe, ngani ka pinduka simpe pevhumbuko. Ngomu ndindire nge tupu nayinye ngayi wapa.” Gazara tupu omu nampo vakurona owo va lizuvhire apa va dimbwilire omu ehuguvaro lyevhumbuko lyakara nomulyo kwamunawo.

2-3. Morwasinke ya karera nomulyo tu gazadare ko kehuguvaro lyevhumbuko?

² Ya wapa tu gazadare ko poyiruwo-noyiruwo ketumbwidiro lyomoBibeli kuhamena ehuguvaro lyevhumbuko. (Joh. 5:28, 29) Morwasinke? Morwa kapi tuna diva asi siruwo musinke nampo ngatu li gwanekera nouvera wounene ndi siruwo apa ngatu fisa hararasi gumwe ogu twa hara. (Muud. 9:11; Jak. 4:13, 14) Ehuguvaro lyetu lyemevhumbuko kuvhura kutuvatera tu lididimikire maudigu gangoso. (1 Tes. 4:13) Matjangwa kutuhuguvaresa asi Guhyetu gemeguru ga tu diva nawa ntani asi ga tu hara unene. (Ruk. 12:7) Jehova ga hepa kutudiva nawa komeho a ka tu vhumbure noyikara yokulifana ntani Jehova ga tu hara unene ntani ga tu pa mpito yipo ngatu ka paruke narunye. Nampili tu fe ngesi, age nga ka tu vhumbura!

³ Mosirongwa esi, pomuhowo natu ka zogera kuhamena nokonda deyi twa hepera kupura mevhumbuko. Ntani natu ka kona-kona sihorokwa somoBibeli esi nasi ka nkondopeka epuro lyetu omu mwa kara nonkango edi dina lizi nononkango dosiparatjangwa setu asi: “Mumbyoge na pinduka.” (Joh. 11:23) Ano konyima natu ka lironga eyi natu rugana yipo tu huguvare unene mevhumbuko.

MORWASINKE TWA PULIRA METUMBWIDIRO LYEVHUMBUKO?

4. Mokuninka asi tu huguvare metumbwidiro, yisinke twa hepa kupura nawa-nawa? Yifanekesa.

⁴ Mokuninka asi tu pure metumbwidiro twa hepa ku yi pura nawa-nawa asi ogu ga tumbwidira etumbwidiro olyo ga kara neharo ntani nononkondo dokulisikisa mo. Mokuyifanekesa: Tu tante asi embo lyoge lina zunguruka momudona kekundungu. Kaume koge ta wiza koge noku kutumbwidira asi ‘Tani kuvatere mokutungurura embo lyoge.’ Age kapi ana kukukumbagera ntani ono yi pura nawa-nawa asi age ana hara kukuvatera. Nsene asi age ga yi diva nawa kutunga ntani nsene asi ga kara noyiruganeso, ove no yi pura asi age sili kuvhura a ku vatere. Makura to huguvara metumbwidiro lyendi. Ngapi nye kuhamena etumbwidiro lyaKarunga lyevhumbuko? Age sili ga kara neharo ntani nononkondo dokuka li sikisa mo ndi?

5-6. Morwasinke natu yi pulira asi Jehova ga kara neharo lyokukavhumbura vafe?

⁵ Jehova ga kara neharo lyokuka pindura vafe ndi? Yii. Age kwa gendesere vatjangi vamwe woBibeli yipo va tjange kuhamena etumbwidiro lyokomeho lyevhumbuko. (Jes. 26:19; Hos. 13:14; Ehor. 20:11-13) Ntani apa Jehova a tumbwidire, age narunye ku yi sikisa mo. (Jos. 23:14) Jehova kuna kundindira nononkondo mokuka vhumbura vafe. Morwasinke tuna kuuyungira ngoso?

⁶ Gazadareni ko kononkango edi ga uyungire Joba. Age ga yipulire asi nampili a fe, Jehova ga kara neharo lyokuka mu pindura koufe yipo a ka paruke hena. (Joba 14:14, 15) Jehova kwa kara simpe neharo lyokulifana kovakareli vendi navenye ava va fa. Age ana hara kuka va tengwidira keparu nomarutu goukanguki ntani noku ka kara vantu woruhafo. Ngapi omu a lizuvhu Jehova kuhamena vantu navenye ava va fire awo va hana kugwana mpito zokulironga usili kuhamena Jehova? Karunga gwetu geharo ana hara kuka va vhumbura nawo. (Yirug. 24:15) Ana hara ngava ka gwane mpito zo kuka kara vakaume vendi ntani noku ka paruka narunye paapa pevhu. (Joh. 3:16) Yosili Jehova ga kara neharo lyokukavhumbura vafe.

7-8. Morwasinke natu yi pulira asi Jehova ga kara nononkondo dokukavhumbura vafe?

⁷ Ngoso Jehova ga kara hena nononkondo dokukavhumbura vafe ndi? Yii! Age “Munankondo nadinye.” (Ehor. 1:8) Age ga kara nononkondo dokufunda po nkenye ezi nkore, kukwatera mo nampili nomfa. (1 Kol. 15:26) Ayo kutupa nonkondo noku tu hengagwida pokudiva usili owo. Tu zeni tu ka tare sihonena samunazinyetu gomukadi Emma Arnold. Nage nepata lyawo kwa li gwanekerere noudigu wounene ou wa hetekere epuro lyawo posiruwo soYita yaUvali yoUzuni mudima. Emma kwa hengagwidire munendi gomukadona kweyi va zumbanesere vantu ava va here mokamba zounkwate moNazi. Emma kwa uyungire asi: “Nsene asi vantu ava va fa kapi ngava ka paruka hena eyi kutanta asi nkore zetu nomfa, nonkondo unene kupitakana Karunga. Nye ayo kapisi usili. Yosili, kwato eyi ya kara nononkondo unene kupitakana Jehova!” Karunga munankondo nadinye ogu ga retesa po eparu ga kara nononkondo do kuka vhumbura ava va fa.

⁸ Konda zimwe zeyi twa yi pulira asi Karunga ga kara nevhuliko lyokukavhumbura vafe kuna kara asi morwa age kapi a divara. Age kutumbura nkenye mbungururu kedina lyazo. (Jes. 40:26) Age hena kudiworoka ava va fa. (Joba 14:13; Ruk. 20:37, 38) Age kudiworoka nampili yininke yoyinunu kuhamena vantu ava nga ka vhumbura, kukwatera mo monkedi omu va va sita, yininke eyi va li gwanekera nayo meparu ntani noyininke eyi ngava gazara.

9. Morwasinke wa pulira metumbwidiro lyaJehova lyevhumbuko lyokomeho?

⁹ Yosili, ose kuvhura tu pure nawa-nawa metumbwidiro lyaJehova lyokomeho lyevhumbuko morwa ose twa yidiva asi age ga kara neharo ntani nononkondo do kuka li sikisa mo. Koneka konda hena zimwe zeyi natu huguvarera metumbwidiro lyaKarunga lyevhumbuko, azo kuna kara asi Jehova ga vhumbwire nare vantu mosiruwo sanare. Mosiruwo sanare, age kwa geve nonkondo kovagara wovalimburukwi, kukwatera mo Jesus, yipo va vhumbure vafe. Tu zeni tu ka tare evhumbuko limwe eli ga rugene Jesus eli va tumbura mwaJohanesa egaununo 11.

JESUS TA FISA KAUME KENDI GOMUNENE

10. Yisinke ya horokere moBetani ngomu Jesus ga zuvhisilire mesinya mwina lyaJorodana ntani yisinke ga rugene? (Johanesa 11:1-3)

¹⁰ Resa Johanesa 11:1-3. Gazadara ko kosihorokwa esi sa horokere moBetani koyiha yehagero lyomvhura 32 mosiruwo setu. Jesus ga kere novakaume vendi wovanene momukunda ogo, Rasarusa ntani novampanza vendi vavali, oMariya naMalita. (Ruk. 10:38-42) Nye Rasarusa ta tameke kuvera ntani vampanza vendi ta va tameke kukara nosinka. Makura yipo va tumine mbudi kwaJesus, ogu ga kere mesinya mwina lyaJorodana, mukunda ogu ngava gendi ure womazuva gavali noharufa kutundilira koBetani. (Joh. 10:40) Nye ehudi Rasarusa ta dogoroka, hambara posiruwo sokulifana nesi Jesus ga ka gwene mbudi ezi va mu tuminine. Nampili ngomu Jesus ga yi divire asi kaume kendi ana dogoroka, age kwa twikilire kukara oku ga kere ure womazuva gavali ano kutunda opo yipo nye ga zire koBetani. Yipo nye, apa Jesus ga ka sikire age Rasarusa opo ana kara montoko mazuva gane. Makura Jesus yipo ga rugene sininke simwe esi sa reterere vakaume vendi mauwa ntani noku yererepeka Karunga.—Joh. 11:4, 6, 11, 17.

11. Yisinke natu lirongera ko kosihorokwa esi kuhamena ukaume?

¹¹ Kosihorokwa esi ose kulirongera ko kuhamena ukaume. Konekeni asi, apa Mariya naMalita va tuminine Jesus mbudi, awo kapi va mu pulire a wize koBetani. Awo kwa uyungire tupu asi kaume kendi kuna kuvera. (Joh. 11:3) Apa Rasarusa ga fire, Jesus ngano ga vhulire ku mu vhumbura nampili ngomu ga kere ure. Nye nampili ngoso, Jesus kwa tokwere ku za koBetani yipo a ka kare novakaume vendi oMariya naMalita. Wa kara nakaume ogu a ku vatere wa hana ku mu pura ndi? Yipo nye ove wa yi diva asi kuvhura o mu huguvare asi age nga kukwafa moyiruwo yomaudigu. (Yis. 17:17) Ngwendi Jesus, ngano tu kareni ngwendi kaume gokufana ngoso. Ngesi tu zeni tu ka zogerehena sihorokwa oso ntani noku tara asi yisinke eyi ya kweme ko.

12. Yisinke Jesus ga tumbwidilire Malita ntani morwasinke ga heperere kupura metumbwidiro olyo? (Johanesa 11:23-26)

¹² Resa Johanesa 11:23-26. Malita yipo ga dimbwilire asi Jesus pepi ana kara noku sika koBetani. Makura yipo ga genderere ku za a ka gwanekere kumwe nendi noku mu tantera asi: “Hompa, ngano yipo ko kere, ngano mumbyange kapi ka fire.” (Joh. 11:21) Yosili, age ngano ga verwire Rasarusa. Nye Jesus kwa here kurugana sininke simwe sokutetukisa. Age kwa tumbwidilire asi: “Mumbyoge na pinduka.” Age kwa tanterere hena Malita konda zimwe zeyi ga heperere kupura metumbwidiro olyo, pokuuyunga asi: “Nyame evhumbuko nomwenyo.” Yosili Karunga kwa pa Jesus nonkondo dokuvhumbura vafe. Komeho zosihorokwa esi, age kwa vhumbwire munona gomukadona konyima tupu zapa ga fire ntani age kwa vhumbwire hena mugara gomudinkantu, nampo kwa mu vhumbwire ezuva lyoolyo ga fire. (Ruk. 7:11-15; 8:49-55) Nye age sili kuvhura a vhumbure montoko muntu ogu ana kara mo ure womazuva gane ntani ogu ana kara norutu oru runa tameke kuwora ndi?

“RASARUSA, PWAGA MO!”

13. Ngwendi moomu tupu va yi tjanga mwaJohanesa 11:32-35, ngapi omu ga lizuvhire Jesus apa ga mwene Mariya novakwawo kuna kulira? (Tara hena efano.)

¹³ Resa Johanesa 11:32-35. Gazadara ko eyi ya kweme ko. Mariya, mpanza Rasarusa, kwa zire a ka gwanekere naJesus. Age kwa rugurukire kuuyunga nonkango edi ga uyungire Malita asi: “Hompa, ngano yipo ko kere, mumbyange ngano kapi ka fire.” Nage novakwawo ava ga kere nawo kwa guvire sili unene. Jesus kwa guvire unene apa ga va mwene noku va zuvha omu vana kulira. Age kwa va fililire nkenda makura ta lili. Age kukwata egano kukora oku ava lizuvhu vantu apa ava fisa gumwe ogu va hara. Yosili age ana hara kuka gusa po yininke eyi ayi ninkisa vantu va lire.

14. Yisinke natu lirongera ko kuhamena Jehova monkedi omu Jesus ga lizuvhire apa ga mwene Mariya kuna kulira?

¹⁴ Monkedi omu Jesus ga lizuvhire apa ga mwene Mariya kuna kulira, kuturonga asi Jehova Karunga gonkenda. Morwasinke tuna kuuyungira ngoso? Ngwendi moomu tupu ka tu yi lirongere mosirongwa sina kapita, Jesus kulikida nawa-nawa magazaro nomalizuvho goGuhwe. (Joh. 12:45) Jesus kwa lilire morwa age kwa fililire nkenda vakaume vendi ava va guvire. Yipo nye, nose twa yidiva asi Jehova nage kutufira nkenda apa atu mono kuna kulira morwa ruguwo. (Epis. 56:8) Yosili eyi kukuninkisa o hedere pepi Karunga gwetu gonkenda.

15. Ngwendi moomu tupu va yi tjanga mwaJohanesa 11:41-44, yisinke eyi ya horokere pontoko zaRasarusa? (Tara hena efano.)

¹⁵ Resa Johanesa 11:41-44. Jesus ta ka sika pontoko zaRasarusa ntani noku pura vantu va guse ko emanya kontoko zendi. Makura Malita ta uyunga asi rutu rwendi ngesi kuna kunuka. Jesus ta limburura asi: “Nani kapi nina kutantere asi nsene no pura no mona uyerere waKarunga?” (Joh. 11:39, 40) Makura Jesus ta tara keguru ntani ta kanderere moyitarameho yovantu. Age ana hara kugava efumano nalinye kwaJehova kwa nayinye eyi na yi kwama ko. Makura Jesus ta zigire asi: “Rasarusa, pwaga mo!” Makura Rasarusa ta pwaga mo montoko. Jesus kwa rugene yininke eyi va gazarere vamwe asi kapi ta vhuru kuyirugana.

16. Ngapi omu sihorokwa esi sa kara mwaJohanesa egaununo 11 asi nkondopeke epuro lyetu mehuguvaro lyevhumbuko?

¹⁶ Sihorokwa esi atu gwana mwaJohanesa egaununo 11 kunkondopeka epuro lyetu mehuguvaro lyevhumbuko. Monkedi musinke? Diworokeni asi Jesus kwa tumbwidilire Malita asi: “Mumbyoge na pinduka.” (Joh. 11:23) Ngwendi oGuhwe, Jesus nage ga kara neharo ntani nononkondo dokuka sikisa mo etumbwidiro olyo. Mahodi gendi kwa likidire asi age ga kara neharo lyenene lyokukapindura vantu koufe ntani noku ka gusa po ruguwo oru adi retesa po nomfa. Ntani apa Rasarusa ga pwege mo montoko, Jesus kwa yi likidire hena asi age ga kara nononkondo dokuvhumbura vafe. Ntani gazadara ko kononkango edi Jesus ga diworokesere Malita pokutanta asi: “Nani kapi nina kutantere asi nsene no pura no mona uyerere waKarunga?” (Joh. 11:40) Ose twa kara nonokonda donongwa deyi natu yi pulira asi etumbwidiro lyaKarunga lyokukavhumbura vantu nga li ka sika mo. Yisinke natu rugana yipo tu huguvare unene metumbwidiro eli?

YISINKE NATU RUGANA YIPO TU NKONDOPEKE EHUGUVARO LYETU MEVHUMBUKO?

17. Yisinke twa hepa kudiworoka nsene kuna kuresa yihorokwa yomoBibeli eyi ya zogera kuhamena evhumbuko?

¹⁷ Resa ntani noku teda ko koyihorokwa yovantu ava va vhumbwire nare. MoBibeli kwa kara mo yihonena ntantatu yovantu ava va vhumbwire keparu paapa pevhu.c Litulira po siruwo yipo o lironge nawa yihorokwa oyo. Ngomu ono kulironga yihorokwa oyo, diworoka asi awo kwa kere vantu wosili omu mwa hamenene vagara novakadi ntani novanona. Papara yirongwa eyi no vhura kulirongera ko. Gazadara omu nkenye sihonena asi likida asi Karunga ga kara neharo ntani nononkondo dokuka tengwidira vafe keparu. Somulyo po unene, teda ko komavhumbuko gomulyo unene aga ga rugene Jesus. Diworoka asi vantu wovanzi va mwene mavhumbuko aga ga rugene Jesus ntani ayo kutupa konda zongwa zeyi natu pulira mevhumbuko.—1 Kol. 15:3-6, 20-22.

18. Ngapi noruganesa nawa nonsumo edi da uyunga kuhamena ehuguvaro lyevhumbuko? (Tara hena nonkango dokonhi.)

¹⁸ Purakena nonsumo doukareli wetu edi da uyunga kuhamena ehuguvaro lyevhumbuko.d (Efe. 5:19) Nonsumo edi kutuvatera tu huguvare unene mevhumbuko ntani kutuvatera tu nkondopeke epuro lyetu. Purakeneni kononsumo odo, liyombereseni yipo mu di dimbe nawa ntani noku zogera eyi a di tanta nonkango da mo poukareli weni wepata. Kwateni nonkango odo monomutwe deni ntani noku gazadara ko momunene yipo di nkondopeke epuro lyeni ntani noku mu guma komutjima. Makura nsene ngomu ligwanekera nomaudigu ndi nsene ngo mu fisa gumwe ogu mwa hara, mpepo zaJehova nga zi mu vatera yipo mu diworoke marusumo aga ntani noku gwana ehengagwido mononsumo edi ntani noku mu nkondopeka.

19. Yininke musinke yimwe natu vhura kugazadara ko kuhamena evhumbuko? (Tara kakende “Yisinke ngo ka va pura?”)

¹⁹ Gazadara ko. Jehova kwa tu pa evhuliko lyokulimona nyamwetu ngwendi mouzuni woupe tuna kara. Munazinyetu gumwe gomukadi kwa faturura asi: “Ame kwa ruganesa siruwo sange sosinzi mokuligazara nyamwange asi mouzuni woupe nina kara ntani ngwendi asi ame kuna kufumbwira nombya donongwa moParadisa.” Gazadara ko apa ngo ka limona novagara ntani novakadi ava va kere nepuro mosiruwo sanare. Yilye ogu ono hara kuka mona mouzuni woupe? Mapuro musinke ngo ka mu pura? Gazadara ko hena apa ngo ka kara kumwe novantu ava wa hara, ava va dogoroka. Gazadara ko kuhamena yininke yokuhova eyi ngo ka uyunga nawo nomu ngo ka va morora ntani ruhafo oru ngo ka kara naro apa ngo ka va mona.

20. Yisinke natu tokomena kurugana?

²⁰ Ose kupandura unene Jehova ketumbwidiro lyendi lyokukavhumbura vantu ava twa hara. Ose kuvhura tu yi pure nawa-nawa asi etumbwidiro eli nga li ka sika mo morwa Jehova ga kara neharo ntani nononkondo dokuka li sikisa mo. Ngano tu tokomeneni kunkondopeka epuro lyetu mehuguvaro eli lyewa. Pokurugana ngoso, ose ngatu hederera unene pepi Karunga, ogu ga tumbwidira nkenye gumwe gwetu asi, ‘vantu ava mwa hara nga va pinduka.’