Lirongera ko kovakareli vaJehova wokuhuguvara

1, 2. Ngapi Ndafita ga yi likidire asi ga huguvarere Jehova? (Tara efano.)

SAURU novakwayita vendi 3 000 kwa paparere Ndafita momburundu zaJuda va mu dipage. Nye esiku limwe, Ndafita novantu vendi kwa gwene Sauru novakwayita vendi mokamba zawo. Awo navenye kwa rere, yipo Ndafita naAbisayi va pitire mokatji kovakwayita nokukagwana Sauru. Abisayi ta wowotere Ndafita asi: “Siga nge ni mu wurure egonga lyamwene rumwe tupu li ka simbame mevhu – kapi na hara ni mu twe ruvali.” Nye Ndafita kapi ga mu pulisilire mokudipaga Sauru. Age kwa tanterere Abisayi asi: “Wa ha mu dipaga! HOMPA nga handukira nawa-nawa ogu ana kuguma hompa gwendi ogu ga horowora.” Ndafita ta twikire ko asi: “HOMPA a kandane nge kweyi yokuguma ogu ga tura HOMPA mouhompa.”—1 Samwere 26:8-12.

² Ndafita ga divire eyi ga hepere kurugana mokuhuguvara Jehova. Age ga yi divire asi ga hepa kufumadeka Sauru, ntani kapi ga gazarere kumukoresa. Morwasinke? Morwa Sauru kwa mu horowere Karunga a kare hompa goVaisraeli. Ngwendi nare, naina Jehova kuna hara vakareli vendi navenye va mu huguvare nokufumadeka ava ga horowora va pitisire.—Resa Mika 6:8.

3. Ngapi omu Abisayi ga huguvarere Ndafita?

³ Abisayi kwa fumadekere Ndafita morwa ga yi divire asi Karunga ga mu horowere a kare Hompa. Nye apa Ndafita ga kere hompa, age kwa tulire nonzo dononene. Age kwa honderere namukadaUliya, makura Ndafita ta tantere Jowabu a ture Uliya komeho oku ayi didi yita yipo va mu dipage. (2 Samwere 11:2-4, 14, 15; 1 Histoli 2:16) Jowabu kwa kere mumbyaAbisayi, nampo Abisayi ga yi zuvhire eyi ga rugene Ndafita, nye Abisayi kwa twikilire kufumadeka Ndafita. Abisayi kwa kere mukondi govakwayita ntani ngano ga ruganesere nonkondo dendi mokulitura mwene hompa, nye kapi ga yi rugene oyo. Age kwa huguvarere Ndafita nokumupopera kononkore dendi.—2 Samwere 10:10; 20:6; 21:15-17.

4. (a) Ngapi Ndafita ga kara sihonena sogu ga huguvarere Karunga? (b) Yihonena musinke natu ka konakona?

⁴ Ndafita kwa huguvarere Jehova meparu lyendi nalinye. Apa ga kere munona, age kwa dipagere Golyata, ogu ga swawire Jehova noVaisraeli. (1 Samwere 17:23, 26, 48-51) Apa Ndafita ga kere hompa, muporofete gwaJehova Natana kwa vyukisire Ndafita kononzo edi ga tulire. Ndafita ga tambwire nzo zendi nokulitezurura. (2 Samwere 12:1-5, 13) Konyima, apa Ndafita ga kurupire, age kwa geve yininke yomulyo mokuvatera kutunga ntembeli zaJehova. (1 Histoli 29:1-5) Ayo kulikida asi nampili ngomu Ndafita ga tulire mapuko gomanene meparu, kapi ga hagekere kuhuguvara Karunga. (Episarome 51:4, 10; 86:2) Mosirongwa esi, tatu ka konakona sihonena saNdafita navamwe ava va parukire mosiruwo sendi ntani neyi natu lirongera ko mokuhuguvara Jehova unene kupitakana nkenye eyi. Ntani natu ka konakona yikara yimwe eyi nayi tu vatera tu yi rugane oyo.

OVE NGO HUGUVARA JEHOVA NDI?

5. Yisinke natu lirongera ko kepuro lyaAbisayi?

⁵ Apa Abisayi ga here kudipaga Sauru, age kwa hetekerere ko kuhuguvara Ndafita. Morwa Ndafita ga divire asi epuko kukoresa “ogu ga horowora” Jehova, makura kapi ga pulisilire Abisayi a dipage hompa. (1 Samwere 26:8-11) Eyi kuturonga sirongwa somulyo: Nsene kuna kutokora ogu natu huguvara, twa hepa kugazara nompango daKarunga edi nadi tu vatera moukaro wangoso.

6. Nampili ngomu ya dira kukara epuko kuhuguvara vanekoro ndi vakaume, morwasinke twa hepera kutakamesa?

⁶ Kapisi epuko kuhuguvara vantu ava twa hara, ngwendi vakaume ndi vanekoro. Nye morwa kapi twa sikilira mo, malizuvho getu kuvhura ga tu pukise. (Jeremiya 17:9) Nsene muntu ogu twa hara a rugana udona ndi a siga usili, twa hepa kudiworoka asi ya kara nomulyo kuhuguvara Jehova kupitakana nkenye ogu.—Resa Mateusa 22:37.

7. Ngapi munazinyetu gumwe ga huguvarere Jehova posiruwo soudigu?

⁷ Nsene gumwe gemepata lyeni kwa mu gusa mombungakriste, ove kuvhura o yi likide asi wa huguvara Jehova. Pasihonena, ezuva limwe ozina vaAnne, ava va gusa mombunga, kwa mu toonene ngodi nokumutantera asi vana hara kuyamudingura.^[1] Ozina vaAnne kwa tente asi awo kwa guvire unene morwa epata lyawo kwa nyokere kuvauyungisa. Eyi kwa guvisire Anne nokuvatumbwidira asi nga va tjangera mbilive. Komeho a tjange mbilive ozo, Anne kwa tedere ko konompango domoBibeli. (1 Vakolinte 5:11; 2 Johanesa 9-11) Makura mombilive omo ta va fatwilire monkedi zongwa asi awo yiwo va sigire epata lyawo apa va zonene ntani nokunyoka kulitezurura. Anne kwa tanterere ozina asi mokukara noruhafo, ntudi va hepa kutengura kwaJehova.—Jakopo 4:8.

8. Yikara musinke nayi tu vatera tu huguvare Jehova?

⁸ Vakareli vaJehova womosiruwo saNdafita kwa kere wokulinunupika, wonkenda ntani wouradi. Tu konakoneni omu yikara oyo nayi tu vatera tu huguvare Jehova.

TWA HEPA KULINUNUPIKA

9. Morwasinke Abineli ga harerere kudipaga Ndafita?

⁹ Jonatana munwaSauru ntani Abineli mukondi govakwayita woVaisraeli, kwa mwene omu Ndafita ga retere mutwe gwaGolyata kwahompa Sauru. Jonatana kwa ya kere kaume kaNdafita nokutwikira kumuhuguvara. (1 Samwere 17:57–18:3) Nye Abineli kapi ga huguvarere Ndafita. Ntani konyima ga ya vaterere Sauru, ogu ga here kudipaga Ndafita. (1 Samwere 26:1-5; Episarome 54:3) Jonatana naAbineli va yi divire asi Karunga kwa here Ndafita a kare hompa gwaIsraeli. Apa ga fire Sauru, Abineli kapi ga kwatesere ko Ndafita. Nye age kwa here kutura munwaSauru Isiboseti a kare hompa. Konyima, Abineli nampo kwa here kukara hompa yipo ga rere nosihora sahompa Sauru. (2 Samwere 2:8-10; 3:6-11) Morwasinke Jonatana naAbineli va karerere nomalizuvho gokulisiga kuhamena Ndafita? Morwa Jonatana kwa huguvarere Jehova ntani ga linunupikire kapisi ngwendi Abineli.

10. Morwasinke Abisaromo ga dilire kuhuguvara Karunga?

¹⁰ Abisaromo munwaNdafita, kapi ga huguvarere Karunga morwa kapi ga linunupikire. Age kwa here kukara hompa, yipo ga “lipaparere karukara koyita nononkambe novagara nomurongo ntano.” (2 Samwere 15:1) Age hena kwa ninkisire Vaisraeli va mu huguvare. Age kwa here kudipaga oguhwe Ndafita, nampili ngomu ga yi divire asi Jehova yige ga tulire oguhwe mouhompa waIsraeli.—2 Samwere 15:13, 14; 17:1-4.

11. Ngapi natu gwanena mo uwa mosihorokwa saAbineli nesi saAbisaromo ntani saBaruku?

¹¹ Apa muntu a dili kulinunupika ntani nokuhara kukara mupangeli, ayo kudigopera muntu ogo mokuhuguvara Karunga. Nye, ose twa hara Jehova ntani kapi tuna hara kuligazara tupu nyamwetu nokukara vadona ngwendi Abineli naAbisaromo. Nye twa hepa kutakamesa mokudira kukara nedowo lyoyimaliwa ndi yirugana eyi nayi tu ninkisa tu lizuvhe asi ose mulyo. Eyi ngayi zonagura po elikwatakano lyetu naJehova. Sikando simwe, Baruku, hamutjanga gwaJeremiya, kwa dowokerere yininke eyi ga dilire kukara nayo ntani kapi ga hefe mokukarera Karunga. Yipo Jehova ga tanterere Baruku asi: “Ame HOMPA tani bamagura po eyi na tunga nokudura mo eyi na tapeka. Yangesi, tani ka yi rugana kevhu nalinye. Ove kuna kulipaparera yininke yoyinene nyaamoge? Wa ha yi lipaparera.” (Jeremiya 45:4, 5) Baruku ga purakenene kwaJehova. Nose twa hepa kupurakena kwaJehova, morwa ntaantani a ya zonagure po uzuni ou woudona.

12. Faturura omu natu dira kuhuguvara Karunga nsene tu ligazara tupu nyamwetu.

¹² Daniel gomoMeksiko, ga hepere kutokora ogu na huguvara. Age ga here kukwara mukadona ogu nga dili kukarera Jehova. Daniel kwa tanta asi: “Ame kwa twikilire kumutjangera nampili konyima zapa na ya kere muzuvhisi gokukarerera.” Nye ga ya yi dimbwilire asi eyi ga rugene kwa here kulihafesa tupu mwene. Age kapi ga huguvarere Jehova, ntani ga hepere kulinunupika. Yipo ga tanterere mukuronambunga gumwe kuhamena mukadona. Daniel kwa faturura asi: “Mukuronambunga ga vaterere nge ni dimburure asi mokuhuguvara Karunga, na hepa kuhageka kutjangera mukadona. Apa na kandererere dogoro tani lilire mo, yipo na hagekere. Makura, tani litura mo unene mokuzuvhisa.” Daniel ga kwara mukadi ogu ga hara Jehova, ntani age ngesi mutareli gonombunga.

KUHUGUVARA KARUNGA KUTUVATERA TU KARE NONKENDA

13. Apa Ndafita ga zonene, ngapi Natana ga huguvarere Karunga naNdafita?

¹³ Apa atu huguvara Jehova, ose kuhuguvara hena wopeke nokuvavatera. Muporofete Natana kwa huguvarere Jehova naNdafita. Apa Ndafita ga ya gusire mukadamukwawo nokudipagesa mugara gwendi, Jehova kwa tumine Natana a ka mu pukurure. Natana kwa kere nouradi ntani ga limburukwire Jehova. Nye ga rugene nonondunge ntani ga uyungisire Ndafita monkedi zongwa. Age kwa here kuvatera Ndafita a kwate egano unene wonzo zendi. Yipo ga mu tanterere esimwititi lyomugara gongawo ogu ga hakanene nzwigona zomugara goruhepo. Apa ga yi zuvhire eyi Ndafita, age kwa handukilire unene mugara ogo gongawo kweyi ga rugene. Natana yipo ga tente asi: “Mugara ogo nyove.” Ndafita ga yi dimbwilire asi ga zona kwaJehova.—2 Samwere 12:1-7, 13.

14. Ngapi no huguvara Jehova nokuhuguvara hena kaume ndi ekoro lyoge?

¹⁴ Nose kuvhura kuhuguvara Jehova ntani nokuhuguvara wopeke pokukara nonkenda. Pasihonena, kuvhura o kare noumbangi asi munazinyetu ga tura nzo zonene. Kuvhura o hare kumuhuguvara, unene po nsene kaume goge gomunene ndi gekoro lyoge. Nye wa yi diva asi mulyo unene kuhuguvara Jehova. Ngwendi Natana, limburukwa Jehova nye kara nonkenda namunanyoko. Mu tantera asi ga hepa kupura evatero kovakuronambunga ntani asi a va tantere nzo zendi. Nsene a dira kuyirugana, makura yi tantera vakuronambunga. Pokurugana ngoso, ove ngo huguvara Jehova. Ntani hena, ngo kara nonkenda namunanyoko morwa vakuronambunga ngava mu vatera a tengwidire po elikwatakano lyewa naJehova. Awo ngava mu pukurura monkedi zongwa zombili.—Resa Levitikus 5:1; Vagarata 6:1.

TWA HEPA URADI MOKUHUGUVARA KARUNGA

15, 16. Morwasinke Husayi ga heperere uradi mokuhuguvara Karunga?

¹⁵ Husayi kwa kere kaume kaNdafita gokuhuguvara. Apa vantu va here kutura Abisaromo hompa, Husayi ga hepere uradi mokuhuguvara Ndafita ntani naKarunga. Age ga divire asi Abisaromo ana ya siki moJerusarema novakwayita vendi ano Ndafita ga hepere kutjwayuka. (2 Samwere 15:13; 16:15) Nye yisinke ga rugene Husayi? Age ga zumbire Ndafita nokukwatesa ko Abisaromo ndi? Hawe. Nampili ngomu Ndafita ga kere mukurupe ntani vantu wovanzi kwa here kumudipaga, Husayi ga mu huguvarere ngorooro morwa Jehova yige ga tulire Ndafita mouhompa. Makura Husayi ta zi koNdundu zoMauzwe a ka gwane Ndafita.—2 Samwere 15:30, 32.

¹⁶ Ndafita kwa pulire Husayi a tengure koJerusarema a ka lininkise ngwendi kaume kaAbisaromo yipo nga zede Abisaromo a purakene komavyukiso gendi mevango lyaAhitofeli. Husayi ga kere nouradi ntani ga tulire eparu lyendi mosiponga yipo a limburukwe Ndafita nokuhuguvara ngorooro Jehova. Ndafita ga kanderere asi Jehova ngano a vatere Husayi, ano yimo ya horokere. Abisaromo kwa purakenene kwaHusayi mevango lyaAhitofeli.—2 Samwere 15:31; 17:14.

17. Morwasinke twa hepera uradi mokukara wokuhuguvara?

¹⁷ Nose twa hepa uradi mokuhuguvara Jehova nokumulimburukwa mevango lyokurugana eyi vana tu harere vemepata lyetu ndi varugani vakwetu ndi mapangero. Pasihonena, Taro, gomoYapani, kutunda unona, age nga rugana eyi ngayi hafesa vakurona vendi. Age ngava limburukwa nokuvahuguvara, kapisi morwa ga hepere kuyirugana nye morwa kwa va here. Nye apa ga tamekere kulironga noNombangi daJehova, vakurona vendi kwa mu harere a hageke. Eyi ya mu guvisire, ntani ya mu digoperere kuvatantera asi ana tokora kuza komapongo. Taro kwa tanta asi: “Awo kwa handukire makura tava silike nge kukavadingura. Ame kwa hundilire Karunga uradi yipo ni kwaterere ketokoro lyange. Ngesi nkareso zawo za runduruka, ntani ame kuvhura kukavadingura nkenye apa.”—Resa Yisewe 29:25.

18. Ngapi ono gwanene mo uwa mosirongwa esi?

¹⁸ Ngwendi Ndafita naJonatana naNatana naHusayi, ngano tu lizuvhe ruhafo oru aru tundu mokuhuguvara Jehova. Kapi tuna hara kukara ngwendi Abineli naAbisaromo ava va dilire kukara wokuhuguvara. Yimo, ose kapi twa sikilira mo ntani kutura mapuko. Nye tu likideni Jehova asi kumuhuguvara kuna kara sininke somulyo po meparu lyetu.