Siruwo musinke ga tamekere Karunga kusita uzuni?

Eyi za uyunga ko Bibeli

Bibeli kapi za uyunga siruwo esi Karunga ga tamekere kusita uzuni ntani siruwo esi ya mu gusire mokuusita. Azo kwa uyunga asi: “Pomuhowo Karunga kwa sitire eguru nevhu.” (Genesis 1:1) Bibeli kapi za vyukilira kutumbura siruwo esi ga tamekere kusita. Nye kuliza naGenesis age kwa mene kusita uzuni “mezuva lyautano-nalimwe.”

• Mazuva ntazimwe kwatamba mazuva ntazimwe gonovili 24 ndi?

• Yisinke ya horokere mezuva lyauntazimwe lyesito?

• Eyi va tumbura mwaGenesis ya liza nounsitwe ndi?

• Siruwo musinke ezuva, nokwedi nonombungururu va yi sitire?

• Kuliza noBibeli evhu nomvhura dalyo dingapi?

Mazuva ntazimwe kwatamba mazuva ntazimwe gonovili 24 ndi?

Hawe. MoBibeli nkango “ezuva” kuvhura kutamba komazuva gomanzi kuliza nosihorokwa. Pasihonena, kuvhura kufaturura yihorokwa yimwe younsitwe ngwendi kwa yi sitire mezuva limwe.—Genesis 2:4.

Yisinke ya horokere mezuva lyauntazimwe lyesito?

Karunga kwa ninkire evhu eli lya kere “mawokowoko” li kare evango eli nava vhura kutunga vantu. (Genesis 1:2) Makura ta tura eparu pevhu. Bibeli za faturura eyi ya horokere momazuva ntazimwe gesito lyouzuni:

• 

  Mezuva lyokuhova: Karunga kwa tulire po uzera pevhu, makura ta hangura nye uzera komundema.—Genesis 1:3-5.

• 

  Mezuva lyauvali: Karunga kwa tulire po mbando zokuhangura mema gokontunda zevhu ntani gamwe ga kare keguru lyazo.—Genesis 1:6-8.

• 

  Mezuva lyautatu: Karunga kwa ninkire evhu limoneke.—Genesis 1:9-13.

• 

  Mezuva lyaune: Karunga kwa sitire ezuva, kwedi ntani nombungururu yipo di minikire uzuni.—Genesis 1:14-19.

• 

  Mezuva lyautano: Karunga ta siti yinamwenyo nayinye yomomema, noyidira yomarudi peke-peke.—Genesis 1:20-23.

• 

  Mezuva lyauntazimwe: Karunga kwa sitire yikorama novantu.—Genesis 1:24-31.

Konyima zezuva lyauntazimwe lyesito, Karunga kwa pwizumukire ndi kwa hagekere kusita.—Genesis 2:1, 2.

Eyi va tumbura mwaGenesis ya liza nounsitwe ndi?

Esimwititi lyoBibeli kuhamena esito ureru kulikwata egano. Nye azo kwafaturura unsitwe monkedi omu vantu nampili vena va parukire posiruwo sanare vakwate egano nkendi zounsitwe. Eyi za uyunga ko Bibeli kounsitwe kapi ya patanesa eyi ava uyunga valirongi wounsitwe. Mukonakoni gounsitwe Robert Jastrow kwa tjenge asi: “Mauzera aga va gava valirongi wonombungururu naga ga kara moBibeli mobuke zaGenesis kuhamena unsitwe kapi ga lisiga, yihorokwa eyi ya twa redesere kesito lyomuntu kwa tamekere hararasi posiruwo songandi.”

Siruwo musinke ezuva, nokwedi nonombungururu va yi sitire?

Ezuva, kwedi nonombungururu kwahamenene ‘keguru’ eli ga sitire Karunga ‘pomuhoverera.’ (Genesis 1:1) Nye site sayo kapi ngasi siki pevhu morwa mukarompepo ogu gwa kere ko. (Genesis 1:2) Nampili ngomu site sa tamekere kumoneka mezuva lyokuhova, kapi ya kere ureru kudiva ntundiliro zosite oso. Mezuva lyaune, Bibeli kuuyunga asi site sezuva, nokwedi nonombungururu kwatamekere kutemena pevhu.—Genesis 1:17.

Kuliza noBibeli evhu nomvhura dalyo dingapi?

Bibeli kapi za uyunga ko asi evhu nomvhura dalyo dingapi. Genesis 1:1 kutanta asi uzuni kwakara netameko. Egano eli kapi ali lirwanesa nomagano govadivi unsitwe kuhamena nomvhura devhu.